*** A kong pơlê Kon Tum khu kăn pơkuâ ƀă kuăn pơlê hên cheăm, tơring tung kong pơlê hiăng tơkŭm po kân krip hâi tơbâ Khu Pơtáu Hùng hlâ. Po tung 2 hâi sap ing hâi lơ 28 troh 29/4, tơkéa vâ tối cho hâi lơ 9 ƀă hâi lơ 10/3 âm lĭch, Mơdĭng tơbâ hâi Khu Pơtáu Hùng hlâ châ khu kăn pơkuâ ƀă kuăn pơlê tơring Đăk Hà, kong pơlê Kon Tum tơkŭm po a chuô Tháp Kỳ Quang, thôn 3, cheăm Đăk Mar.

Rơtế ƀă tơdroăng Mơdĭng châ tơkŭm po kân krip ƀă tơdroăng ki xiâm cho tơdroăng tơdah mâu mơhúa mơngế hlâ, tâp nhang, pleăng reăng, pleăng tơmeăm tơbâ troh Khu Pơtáu Hùng, peăng rôh mơdĭng po hên tơdroăng môi tiah: tơ’noăng kơxuô kơƀăn chưng, hrot kơxái, hếo trăng ki hliâk, hơdruê xuăng ƀă hên ki ê.

Tối ‘na tơdroăng pâ nhuô̆m a rôh po mơdĭng tơbâ hâi Khu Pơtáu Hùng hlâ khu kăn pơkuâ ƀă mâu khu pú hên tơring Đăk Hà, kong pơlê Kon Tum xuân diâp liăn hriâm rơkê ăm hok tro ai tơdroăng rêh ối xơpá mơ-eăm, tung hriâm tâp ƀă hbru tơmeăm mơhnhôk mâu rơpŏng kơtiê.

Nâ Y Kha, a pơlê Kon Klôk, cheăm Đăk Mar hên hơnăm veăng tung rôh po mơdĭng hâi Khu Pơtáu Hùng hlâ a chuô Tháp Kỳ Quang ăm ‘nâi:

“Hngêi Chuô ƀă pơlê Kon Klôk đi đo ai tơdroăng ki tơrŭm ƀă tŏng kum dêi rơpó. Akố mâu ngế ki tiô khôp Pâ xeăng ƀă mâu ngế ki tiô khôp Phop đi đo tơrŭm, tŏng kum dêi rơpó. Tung mâu rôh tơbâ hâi Khu Pơtáu Hùng hlâ ngin rơtế hơniâp ro ƀă hngêi chuô, vâi krâ nhŏng o ngin veăng tŏn chêng tôu koăng, xuăng, hơdruê mâu ƀai hơdruê vâ tơdah tơmối mot tung hngêi chuô, veăng tung rôh mơdĭng tơbâ hâi Khu Pơtáu Hùng hlâ.

Ƀă vâi krâ nhŏng o akố, hngêi Chuô xuân đi đo tŏng kum ‘na hiâm mơno ƀă liăn ngân, vâi krâ nhŏng o xuân veăng kum môi iâ hnoăng cheăng ki kŭn dêi tơná ăm Chuô, ki nhên cho veăng tung mâu tơdroăng tơ’noăng xah hêi tung rôh Têt vâ tơrŭm pơla hngêi Chuô ƀă pơlê Kon Klôk”.

*** Rôh kố, kong pơlê Lâm Đồng dế tơkŭm pêi pro mâu tơdroăng cheăng tung Măng tĭng pêi pro ‘na Ôm hyô kong pơlê Lâm Đồng hơnăm 2023. Ƀă pơxá inâi  ‘’Lâm Đồng - Kong ngo tơbăng krip krih’’, Măng tĭng pêi pro tơdroăng Ôm hyô Lâm Đồng po sap hâi lơ 27/4 troh hâi lo 3/5 a lâp mâu tơring, pơlê kong kơdrâm tung kong pơlê.

Troh ƀă Măng ting pêi pro ‘na Ôm hyô  Lâm Đồng tung mâu hâi ki kố, tơmối kô châ ngăn, châ hlo hên tơdroăng pro leh ki ro tơviah  mê cho: Leh mơdĭng hơdruê xuâng dêi lâp plâi tơnêi; Tíu mơđah tơbleăng túa lĕm tro mâu hdroâng kuăn ngo tung kong pơlê; tíu tơbleăng kế kâ “Kơchâi kâ kơhiâm Đà Lạt’’;  Tơbleăng um xup, kum kơchuâ’’ Pơlê xiâm – Kuăn mơngế Tây Nguyên- Kơpong kĭng têa kơxĭ tơdế tơnêi têa’’; Tơdroăng mơđah hơdruê xuăng tiô tơdrá ton nah ƀă mơđah sâp ếo chal ton nah - “Ki lĕm Tơmeăm khoăngTúa lĕm tro peăng Hdroh Tây Nguyên’’.

Pakĭng mê, tung Măng tng pêi pro ‘na Ôm hyô Lâm Đồng ối po mơdĭng Tŏn chêng Tây Nguyên “Rơkong krếo Kong ngo”, tơ’noăng to xêi ôh tá ai an; pơtối pro  “Pơkoăng ŏng mế tiô túa mơngế K’Ho’’,  ‘’Po tĭng kâ báu tum’’…

Tơdrêng ƀă mâu tơdroăng pêi pro Măng tĭng pêi pro ‘na Ôm hyô Lâm Đồng, tĭng xối tơbâ Pơtáu Hùng hơnăm kố xuân po a Kơpong tíu tơbâ xí Prenn - Đà Lạt.

Tiô jâ Nguyễn Thị Bích Ngọc, tŭm tơdroăng pêi pro tá ai pơtê, tơniăn ai tiô tơdroăng púi vâ dêi kuăn pơlê ƀă tơmối. Jâ Nguyễn Thị Bích Ngọc, tối:   

“Nôkố mâu tơdroăng cheăng xuân pêi hên troh lâp 12 tơring, pơlê kong kơdrâm tung kong pơlê. Tung pơla po Măng tĭng pêi pro ‘na Ôm hyô hlối po hôp tơdroăng kal kí dêi kong pơlê nếo, mê cho xối tơbâ Khu Pơtáu Hùng. Xối tơbâ Pơtáu Hùng hơnăm kố ai mâu tơdroăng mơhnhôk pơtối rak ki pơxúa túa lĕm tro, tơmeăm kơnía tung lâp kong pơlê.

Hlối vâ pơtối rak vế, hlối pêi pro, chiâng tơmeăm khoăng ki xiâm akố ăm tơmối ôm hyô ngăn drêng troh a pơlê kong kơdrâm Đà Lạt, drêng troh kong pơlê Lâm Đồng”.

*** Veăng a rôh mơdĭng tơbâ hâi Khu Pơtáu Hùng hlâ a pơlê kong kơdrâm Ƀuôn Ma Thuột, kong pơlê Dak Lak, pôa Lê Văn Thông, a bêng Thắng Lợi, pơlê kong kơdrâm Ƀuôn Ma Thuột, kong pơlê Dak Lak ăm ‘nâi:

“Tơkŭm po hâi tơbâ Khu Pơtáu Hùng hlâ ga krip lĕm khât. Cho ngế kuăn pơlê Việt Nam, á phiu ro cho hâi tơbâ Khu Pơtáu Hùng hlâ châ Tơnêi têa tơkŭm po, khu kăn pơkuâ kong pơlê ƀă mâu khu râ, kơvâ cheăng tŏng kum krâu, lĕm tơniăn tung mâu tơdroăng cheăng.

Kuăn pơlê ngin phiu ro khât ƀă hâk vâ môi tuăn khât, tung tơdroăng ki môi tuăn ‘na tơdroăng “Khoh ai hâi kố xua ai vâi krâ nah”, pêi pro tơdroăng ki tơbâ hâi Khu Pơtáu Hùng hlâ môi tiah kố”.

*** Hên tơdroăng po leh mơhno túa lĕm tro, tơbleăng kế kâ, leh mơdĭng hơniâp ro po drêng troh leh hâi lơ 30/4 ƀă lơ 1/5 a Gia Lai kô ăm kuăn pơlê ƀă tơmối châ rah tíu vâ ngăn, xah hêi tung rôh pơtê hên hâi. Ƀă pơla hâi pơtê leh troh 5 hâi mê kuăn pơlê ƀă tơmối ai hên tơdroăng vâ rah tíu xah hêi, hlo ngăn drêng troh a tơbăng kong kong Gia Lai.

Tung mâu hâi sôk ro koh tơbâ Hâi châ tơleăng lĕm peăng Hdroh lâp tơnêi têa tơrŭm môi hâi lơ 30/4 ƀă lơ 1/5, pơlê kong kơdrâm Plei Ku ƀă mâu tíu lĕm ro  thâ ‘mâi rơnêu ăm lĕm tâ nếo troăng kơphô̆ vâ tơdah tơmối troh ƀă kơphô̆ kong ngo; Lâp mâu troăng kơphô̆ ulâi ulâ xuân hlo ƀăng-rôl, hlá cờ kơtúa pro ăm drô troăng tung kơphô̆ thế rế ro tâ klêi kơ’nâi ton hâi ai pơreăng COVID-19.  

Pakĭng mâu tíu xah hêi, ngăn hlo, mâu tơdroăng mơhno túa lĕm tro - Tơ’noăng ivá koh hâk ro hâi leh kân po lâp tíu, mê mâu tíu ki vâi ô eăng ƀă tíu ki lĕm môi tiah Plông kân Đại Đoàn Kết, Công viên Đồng Xanh, Công viên Diên Hồng xuân cho tíu hên tơmối tung kong pơlê kố ƀă kong pơlê ki ê troh, xua ai hên tơdroăng xah hêi pa kong ƀă hlối ai tíu ôm hyô ki nếo pro vâ tơ’mot rế hên tơmối troh lăm ngăn.

Nâ Siu Hương, lo ing tơring Čư̆ Prông tối, rôh Leh hơnăm kố, nâ kố pơtối brôk dêi tâi rơpŏng hngêi tơná lăm ôm hyô a kơpong tíu tơ bâ Biển Hồ cho tíu ki  lĕm, hlối ai tíu rơpŏng hngêi nâ vâ pơtê xah pro hơpăm, xup um, tơtê pơto:

“Tung rôh leh lơ 30/4 ƀă hâi lơ 1/5 kố a djâ dêi mâu ngế tung rơpŏng hngêi xah hêi a Biển Hồ, xua kố têa long lĕm mơhé pro hơngế tơring. A xuân vâ kơ koan rak ngăn ‘mâi rơnêu vâ tíu xah hêi lĕm tâ, tíu hyô ngăn rơtâ tá Biển Hồ ai pơxúa tâ ing mê kô tơ’mot hên tâ tơmối lo ing mâu cheăm, tơring troh ngăn. Rôh lăm hêi hâi lơ 30/4 ƀă lơ 1/5 kố, xuân cho vâ mâu ngế tung rơpŏng hngêi a ‘nâi Biển Hồ a lâi  ối tung kong pơlê Gia Lai dêi tơná’’.

*** A tơring Đăk Đoa, Khu ngăn kuăn pơlê pêi chiâk tung rôh pơtê leh lơ 30/4 ƀă lơ 1/5, khu kố hiăng tơkŭm po ăm hô̆i viên veăng tung tơdroăng ki tơ’noăng ivá vâ mơdêk tơdroăng ki tơrŭm. Ngoh A Lưng - Kăn ƀô̆ khu ngăn kuăn pơlê pêi chiâk tơring Đăk Đoa ăm ‘nâi:

“Tung rôh tơbâ hâi Khu Pơtáu Hùng hlâ ƀă hâi tơleăng lĕm, pro tơnêi têa tơrŭm chiâng môi lơ 30/4, Khu ngăn kuăn pơlê pêi chiâk tơring tơkŭm po hên tơdroăng xah hêi ăm mâu ngế tung khu, xuân vâ rơkâu ăm Hneăng hôp khu kăn kuăn pơlê pêi chiâk tơring ƀlêi chiâng tơniăn lĕm, môi tiah tơkŭm po peăng ƀa long, lăm hyô ngăn, xah hêi ƀă hên tơdroăng ki ê.

Pakĭng mê, hên ngế ai tơdroăng cheăng kâ ki chía tơtêk tâ tơkŭm po ăm rơpŏng hngêi lăm ôm hyô, xah hêi a Plei Ku, Nha Trang tung rôh leh kố. Rơpŏng á xuân tiah mê há, rôh leh kố á djâ mâu vâi kuăn lăm hyôu ngăn a Plei Ku, mê nếo a Quy Nhơn vâ ối pơtê, xah hêi klêi kơ’nâi mâu hâi hriâm tâp hơkăng”.