Rơtế ƀă lâp tơnêi têa, a kơpong Tây Nguyên, tơdroăng ki mơdêk hriâm tâp ƀă pêi pro tiô troăng tơdjâ hiâm mơno, túa cheăng, rêh ối Hồ Chí Minh cho 1 tung mâu hnoăng cheăng ki kal. Nâ H’Giang Niê, Kăn pơkuâ ngăn Đoân Droh rơtăm kong pơlê Dak Lak ăm ‘nâi: Klêi kơ’nâi tơbleăng, troh nôkố, mâu tơdroăng ki kal tung hriâm tâp pêi pro tiô tơdroăng tơdjâ hiâm mơno túa rêh ối dêi Pôa hiăng pro pơxúa khât, pro chiâng tơdroăng ki hơ’lêh tung hlê plĕng dêi rêm ngế đoân viên droh rơtăm.

“Tơdroăng ki hriâm tâp ƀă pêi pro tiô hiâm mơno, troăng tơdjâ túa rêh ối dêi pôa châ ngin tơbleăng tơdâng tơ’mô tung tâi tâng khu pơkuâ. Tơdroăng ki apoăng ngin pêi mê cho hriâm tâp mâu tơdroăng ki kal ing mâu rôh hôp ƀă tơbleăng mâu rôh hôp ‘na tơdroăng kal kí tiô mâu rôh ki kal dêi rêm râ Đoân.

Má péa ngin tơbleăng tŏng kum tung mâu rôh hôp ‘na kal kí, mâu tơdroăng tơ’noăng mâu tơdroăng pêi pro kăch măng.

Pakĭng mê nếo ngin tơbleăng hriâm tâp ƀă pêi tiô Pôa ing mâu rôh po hneăng hôp hneăng tơ’noăng ƀă má mơ’nui mê ngin tơbleăng tơdroăng ki po rơdâ mâu ngế ki djâ troăng ahdrối rơkê vâ ing mê pro chiâng ivá tơdjâk troh lâp lu tung mâu râ Đoân ƀă tung lâp pơlê pơla’’.

*** Hriâm tâp ƀă pêi pro tiô Pôa Hồ, kăn ƀô̆, đảng viên ƀă kuăn pơlê kơpong hdroâng kuăn ngo a kong pơlê Kon Tum hiăng ai hên troăng pêi ki rơkê, troăng pêi châ tơƀrê lĕm tung pơlê pơla kuăn pơlê, môi tiah: pêi pro ƀă Roh mơhnhôk “Pro pơhlêh troăng tơmiât troăng pêi tung kơpong vâi krâ hdroâng kuăn ngo pro ăm vâi krâ hdroâng kuăn ngo mơ-eăm hluăn ing kơtiê krá tơniăn’’.

“Tâi tâng kuăn pơlê tơrŭm môi tuăn mơjiâng thôn pơlê nếo, tíu kơdrâm kuăn pơlê rêh ối rơkê’’, tơdroăng “Lâp tơnêi têa tơdjuôm ivá xua mơngế kơtiê – ôh tá lôi kơbố parŏng’’… Cho môi ngế krê ki kơhnâ rơkê tung hriâm tâp ƀă pêi tiô troăng tơdjâ, hiâm mơno Hồ Chí Minh nếo châ Kăn hnê ngăn Vi ƀan tơring Đăk Hà diâp mơ-éa kheăn kơdeăn, jâ Y Hlá, Kăn ph pơkuâ hnê ngăn Chi ƀô̆ thôn Đăk Wel, cheăm Đăk Pxi, tối ăm ‘nâi:

“Á xuân hâk vâ châ hriâm tâp ƀă pêi tiô troăng tơdjâ, hiâm mơno dêi Pôa Hồ. Xua troăng tơmiât, hiêm mơno, troăng pêi cheăng dêi Pôa Hồ cho tro ‘nâng, kân kĕng. Á xuân môi tiah tâi tâng vâi krâ kuăn pơlê a kố hlo, ki klâi ki Pôa Hồ hiăng hnê mê pin thế pêi pro i krâu lĕm. Rơxông jâ pôa pin nah tá hâi rơkê plĕng hên vâ xúa tung pêi cheăng pêt mơjiâng tơmeăm, tá hâi ‘nâi rah xo hdrê pêt, mơnăn păn, bu ‘nâi pêt mơjiâng tiô khôi ton nah, pêt báu, pôm loăng ƀă hía hé, ôh tá pêi lo châ hên, tơdroăng rêh ối pá puât.

Nôkố, kơnôm Đảng, Tơnêi têa tơmâng tŏng kum, kơnôm Pôa Hồ hnê pin hiăng ‘nâi pơhlêh troăng tơmiât troăng pêi, ‘nâi rah xo hdrê pêt, mơnăn păn ki kơnâ liăn môi tiah loăng plâi ton hơnăm, păn chu, í… cheăng kâ hiăng mơnhông mơdêk tâ, tơdroăng rêh ối thôn pơlê hiăng xông tơtêk hên’’.