Tung kơxô̆ vâ chê 2,6 rơtuh ngế kuăn pơlê tung lâp kong pơlê Lâm Đồng ai 99,66% kuăn pơlê hiăng lăm tâ phĭu. Tung mê, ai 59.124 râ cheăm; 1.951/2.296 kơpong tâ phĭu tâ phĭu cho tâi tâng kuăn pơlê lăm tâ. Tiô mơnhên tối dêi Vi ƀan tâ phĭu kong pơlê Lâm Đồng, kuăn pơlê tung lâp kong pơlê pêi pro kơtăng khât tơdroăng ki lăm tâ phĭu, tối tơdroăng ki môi tuăn, loi khât tung mâu rôh tâ phĭu.

Kuăn pơlê kal vâ ‘nâi plĕng khât troh tơdroăng ki tăng ‘nâi inâi chêh tối dêi ngế ki tơbriât to pro kăn hdrối vâ tâ phĭu. Kuăn pơlê kơhnâ, mơhno hiâm mơno pôu râng tơrŭm ƀă loi tung tơdroăng ki ƀlêi chiâng dêi rôh tâ phĭu.

*** Kong pơlê Gia Lai hiăng ai 99,76% mơngế tâ phĭu lăm tâ phĭu rah xo kăn teăng mâ Kuô̆k hô̆i hneăng má XVI ƀă kăn teăng mâ Hô̆i đong kuăn pơlê mâu râ hneăng hơnăm 2026 – 2031. Kong pơlê Gia Lai mơnhên kơxô̆ mơngế tâ phĭu veăng tâ phĭu cho hên. Tung vâ chê 2,6 rơtuh ngế tâ phĭu ai inâi tung inâi, 99,76% mơngế tâ phĭu hiăng lăm tâ phĭu pêi pro hnoăng kuăn pơlê. Tơtrŏng má môi, 96/135 to cheăm, bêng mơnhên mơngế tâ phĭu lăm tâ phĭu châ 100%.

Tơdroăng châ tơƀrê kố ăm hlo hiâm mơno pôu râng hnoăng cheăng ƀă tơdroăng môi tuăn dêi Kuăn pơlê tung hâi tơkŭm phiu ro kân dêi tơnêi têa, tơdrêng amê mơnhên tơdroăng ki hbrâ inhên dêi kong pơlê. Mơngế ki tâ phĭu kheăn kơdeăn tơdroăng hbrâ, tơkŭm po tâ phĭu dêi mâu râ, mâu kơvâ cheăng kong pơlê Gia Lai. Tơdrêng amê, pói tơngah mâu kăn teăng mâ klêi kơ’nâi châ rah xo kô tơmâng ƀă pêi cheăng cho vâ mơnhông dêi pơlê ƀă tơnêi têa.

*** Khu hnê mơhno cheăng tâ phĭu kong pơlê Khánh Hòa ăm ‘nâi, rôh tâ phĭu pôk kăn Kuô̆k hô̆i hneăng XVI ƀă Hô̆i đong hnê ngăn kuăn pơlê rêm râ pơla hơnăm 2026-2031 a kong pơlê hiăng tơkŭm po tơniăn lĕm, troh 17 chôu, kơxô̆ ngế kuăn pơlê lăm tâ phĭu vâ chê 99%, 47/65 to cheăm, bêng kơpong tíu rêh ối kuăn pơlê hiăng lăm tâ phĭu tŭm.

Pôa Nghiêm Xuân Thành, Kăn pơkuâ hnê ngăn Đảng, Ngế Khu pơkuâ hnê mơhno cheăng tâ phĭu kong pơlê Khánh Hòa pơkâ thế mâu tôh riân phĭu pêi pro kơtăng tơdroăng ki riân phĭu, thăm lăm ngăn, séa ngăn, pôi tá ai tơdroăng ki săm tối, săm tơkêng. Mâu kơ koan cheăng ki ai tơdjâk chêh pro klêi hlá mơ-éa vâ teăm tối tơbleăng klêi kơ’nâi tâ phĭu pôk kăn dêi kong pơlê ăm Hô̆i đong Tâ phĭu tơnêi têa ƀă tơbleăng kơtâ phĭu pôk tro hâi khế pơkâ.