VOV4.Xơ Đăng - Kơpong Tây Nguyên dế vâ hơ’lêh tơdroăng ki loi tơngah, ƀă 4/5 to kong pơlê kô ai mâu troăng prôk kân tơdrăng tung la ngiâ. Nôkố, Khu kăn pơkuâ mâu kong pơlê tung kơpong dế kơhnâ tơrŭm ƀă mâu khu xiâm, kơvâ cheăng ki ai tơdjâk mơdêk rĕng pơkâ mâu tơdroăng tơkêa pro troăng prôk kân tơdrăng. Khu mơdró kâ ƀă kuăn pơlê tung kơpong xuân dế pơkâ mơ’no hên tơdroăng ki loi tơngah ‘na tơdroăng mơnhông tơƀrê ing mâu troăng prôk kân tơdrăng kố.

Hdrối pơkâ thâ dêi Tơdroăng tơkêa bro mơjiâng troăng kân ăm phêp rơxế kơtâu têi Khánh Hòa – Ƀuôn Ma Thuột ƀă tơdroăng mơnhông mơdêk cheăng kâ – rêh ối pơlê pơla, khế 7 pơla kố nah, Khu hnê mơhno má môi Hô̆i đong Kuăn pơlê kong pơlê Khánh Hòa hiăng tơkŭm po Hneăng hôp tơdroăng cheăng châ hriăn plĕng, ƀă tơbleăng ăm pêi pro Pơkâ ‘na tơkêa xing xoăng kơxô̆ liăn mơ’no cheăng tơnêi têa hneăng hơnăm 2021 – 2025, ing liăn ngân kong pơlê tiô tối hdrối vâ chê 350 rơtal liăn vâ veăng pêi pro tơdroăng tơkêa bro.

Pôa Trần Mạnh Hùng, Kăn phŏ hnê ngăn Hô̆i đong Kuăn pơlê kong pơlê Khánh Hòa tối ăm ‘nâi:

‘’Kố cho tơmeăm ki xiâm, thăm mơnhông ăm tơdroăng mơnhông mơdêk cheăng kâ – rêh ối pơlê pơla dêi 2 kong pơlê Dak Lak ƀă Khánh Hòa. Ki rơhêng vâ tối cho tơdah apoăng tơdroăng mơnhông mơdêk dêi Kơpong cheăng kâ Vân Phong, kơno tuk Vân Phong kum ăm tê tơmeăm ngi kong têa ê hên tơmeăm pêi lo ing chiâk deăng dêi Dak Lak.

Chin phuh ƀă Kuô̆k hô̆i xuân hiăng ai tơmâng tŏng kum, hnoăng cheăng dêi kong pơlê tơniăn kơxô̆ liăn rơtế Tơnêi têa. Hnoăng cheăng dêi Hô̆i đong Kuăn pơlê rơtế ƀă Vi ƀan Kuăn pơlê thế tơmiât pêi nhên tơdroăng cheăng’’.

Pôa Phạm Minh Chính, Ngế pro xiâm hnê ngăn tơnêi têa séa ngăn troăng kân ăm phêp rơxế kơtâu têi Khánh Hòa – Buôn Ma Thuột

Tơdroăng tơkêa bro mơjiâng troăng kân ăm phêp rơxế kơtâu têi Khánh Hòa – Ƀuôn Ma Thuột cho môi tung mâu tơdroăng tơkêa bro ki kal dêi tơnêi têa châ Chin phuh pâ thế Kuô̆k hô̆i pơkâ troăng hơlâ mơ’no liăn cheăng tiô troăng mơ’no liăn cheăng tơnêi têa. Tâi tâng ki xŏn troăng kân dâng 117 km ƀă kân ai 4 troăng rơxế kơtâu ƀă tiô tối hdrối pơxiâm mơjiâng pro hơnăm 2023, kô pêi kêi đeăng a hơnăm 2025. Tơdroăng tơkêa bro troăng kân troh a kong pơlê Khánh Hòa kô kum kong pơlê rĕng tơniăn, mơnhông cheăng kâ – rêh ối pơlê pơla; mơjiâng ki tơdjêp, thăm tơrŭm cheăng pơla Khánh Hòa ƀă mâu kong pơlê kơpong Tây Nguyên.

Peăng hdroh Tây Nguyên, kong pơlê Lâm Đồng hiăng hbrâ tŭm mâu pơkâ, hbrâ pơxiâm mơjiâng pro troăng kân ăm phêp rơxế kơtâu têi Tân Phú – Bảo Lộc ƀă Bảo Lộc – Liên Khương hmâ drêng Ngế pro xiâm hnê ngăn Chin phuh kĭ troăng hơlâ mơ’no liăn cheăng. Troăng kân ăm phêp rơxế kơtâu têi Dầu Giây – Liên Khương ai tâi tâng ki xŏn dâng 200km, châ klâ pro 3 tơdroăng tơkêa bro mê cho:  Dầu Giây – Tân Phú, Tân Phú – Bảo Lộc ƀă Bảo Lộc – Liên Khương.

Văng An Khê, tíu pro pá troăng kân tơnêi têa 19 pơla kong pơlê Gia Lai ƀă kong pơlê Bình Định

Pôa Trần Văn Hiệp, Kăn hnê ngăn Vi ƀan kong pơlê Lâm Đồng tối, ăm ‘nâi, kong pơlê kô xing xoăng 15.300 rơtal liăn ăm 2 tơdroăng tơkêa bro troăng kân ăm phêp rơxế kơtâu têi a kong pơlê, cho kơpong Tân Phú – Bảo Lộc ƀă Bảo Lộc – Liên Khương.

‘’Troăng kân ăm phêp rơxế kơtâu têi mot pêi cheăng tâng rĕng mê mot a mơ’nui hơnăm 2025, tâng hrá a khế 6/2026. Á mơnhên gá kô tơniăn tơdroăng la ngiâ mơnhông mơdêk dêi kong pơlê Lâm Đồng, pơ’lêh tâi tâng ngiâ méa dêi kong pơlê Lâm Đồng. Sap ing kố lăm pơlê kong kân Hồ Chí Minh bu ton 8 – 9 chôu tê, hâi leh mê 10 – 12 chôu kô u ối 3 – 3,5 chôu, hrá má môi cho 4 chôu tê. Tơdroăng pơto kơchâi drêh – reăng, tơmeăm pêi lo ing chiâk deăng chu a Pơlê kong kân Hồ Chí Minh kô tơ’lêi hlâu, klêi mê pơto tơmeăm, kơmăi kơmok, tơmeăm khoăng ki ê hía xuân rĕng tơ’lêi tâ’’.

Môi tiah mê, hâi lơ 17/8 pơla kố nah, Vi ƀan kong pơlê Dak Nông  ƀă Vi ƀan kong pơlê Bình Phước hiăng ai roh pêi cheăng ƀă Grup pơkuâ Vingroup ƀă Hngêi arak liăn Tê mơdró tơlo liăn cheăng Kỹ thương Việt Nam ‘na tơdroăng tơkêa bro mơ’no liăn mơjiâng troăng kân ăm phêp rơxế kơtâu têi Bắc – Nam peăng mâ hâi luô kơpong Gia Nghĩa – Chơn Thành, ƀă troăng xŏn tiô tối hdrối dâng 130 km. A roh pêi cheăng, khu râ kăn pơkuâ mâu khu cheăng, kơvâ cheăng ƀă mâu kong pơlê tíu tơdroăng tơkêa bro prôk hluâ pơrá mơnhên ki kal dêi troăng kân ăm phêp rơxế kơtâu têi Dak Nông – Chơn Thành.

Tơdroăng kố pro ăm hnoăng mơnhông 2 kong pơlê, tơxâng tơdroăng pói vâ dêi kuăn pơlê 2 kong pơlê. Xông tơpui a roh pêi cheăng, pôa Hồ Văn Mười, Kăn hnê ngăn Vi ƀan kong pơlê Dak Nông mơnhên rơtế ƀă Bình Phước tung tơdroăng pêi pro Tơdroăng tơkêa bro. Tơdroăng pêi pro troăng kân ăm phêp rơxế kơtâu têi kố vâ mơnhông mơdêk cheăng kâ – rêh ối pơlê pơla dêi kong pơlê Dak Nông tối krê ƀă Tây Nguyên tối tơdjuôm.

Ƀă peăng kơnhŏng Tây Nguyên, nếo achê kố Vi ƀan kong pơlê Gia Lai xuân hiăng ai mơ-éa pơcháu Khu pơkuâ troăng prôk ƀă rơxế kơtâu kong pơlê tơrŭm rơtế mâu tíu cheăng pêi pro hriăn plĕng troăng mơ’no liăn cheăng, pro hô sơ pơkâ Tơdroăng tơkêa bro troăng kân ăm phêp rơxế kơtâu têi Plei Ku – Quy Nhơn (kong pơlê Bình Định). Tiô mơ-éa tơbleăng hơnăm 2020 dêi 3 kong pơlê Gia Lai, Kon Tum, Bình Định pơtroh Chin phuh, tiô tối hdrối troăng kân ăm phêp rơxế kơtâu têi Plei Ku – Quy Nhơn, xŏn 160 km, ƀă kơxô̆ liăn tiô tối hdrối 56.000 rơtal liăn.

Hâi lơ 22/5/2022, xông tơpui a roh pêi cheăng ƀă pôa Phạm Minh Chính, Ngế pro xiâm hnê ngăn tơnêi têa, pôa Hồ Văn Niên – Kăn pơkuâ hnê ngăn cheăng Đảng kong pơlê Gia Lai pâ thế Chin phuh xing xoăng kơxô̆ liăn mơ’no pêi cheăng hneăng hơnăm 2026 – 2030 lơ pơcháu mâu khu cheăng, khu xiâm, kơvâ Tơnêi têa kum kong pơlê Gia Lai tí tăng khu tơrŭm vâ rĕng pêi pro tơdroăng tơkêa bro hdrối hơnăm 2030.

‘’Ngin xuân tơpui tơno ƀă mâu kăn pêi cheăng a Bình Đình, 2 kong pơlê khŏm mơ-eăm pêi pro mơjiâng troăng kân ăm phêp rơxế kơtâu têi kố. Tâng tối troăng kân ăm phêp rơxế kơtâu têi tung mâu kong pơlê tung tơnêi têa, Tây Nguyên tá hâi ai troăng ăm phêp rơxế kơtâu têi ki lâi ôh. Kố cho tơdroăng ki lŭp kân ăm mâu kong pơlê Tây Nguyên. Ngin tơmiât , tâng môi tiah troăng klông, ki má lối cho troăng klông ôh tá châ tơmâng mơ’no liăn, ki má lối cho troăng kân ăm phêp rơxế kơtâu têi mê pơla Gia Lai tối krê, Tây Nguyên tối tơdjuôm ƀă mâu kong pơlê peăng tơdế Tơnêi têa, peăng mâ hâi lo pá hdroh tơnêi têa, peăng mâ hâi luô pá hdroh tơnêi têa ƀă mâu kong pơlê peăng kơnhŏng cho ai iâ ‘nâng’’.

Lơgât troăng kân ăm phêp rơxế kơtâu têi Dầu Giây – Tân Phú – Bảo Lộc – Liên Khương

Ƀă mâu tơdroăng tơkêa bro troăng kân ăm phêp rơxế kơtâu têi hiăng ƀă dế châ pêi pro, kơpong Tây Nguyên dế ối hdrối mâu tơdroăng pói tơngah châ tơƀrê rĕng nếo. Khu tê mơdró ƀă kuăn pơlê tung kơpong dế pơkâ hên tơdroăng pói tơngah ‘na tơdroăng mơnhông mơdêk rĕng ing mâu troăng kân ăm phêp rơxế kơtâu têi kố.

VOV Tây Nguyên chêh

A Sa Ly tơplôu ƀă tơbleăng