*Ea Sup cho tơring tíu tơkăng kong dêi kong pơlê Dak Lak, kơtăn pơlê kong kơdrâm Ƀuôn Ma Thuột dâng 85 km. Tung 5 hơnăm hdrối mê hía nah, tơring Ea Sup hiăng châ mơ’no liăn mơjiâng pro 80 tơdroăng, cho hngêi trăng, troăng prôk a 9 to cheăm, tâi tâng kơxô̆ liăn ki tŏng kum mơjiâng pro mê lối 91 rơtal liăn. Pakĭng mê, tơring hiăng tơkŭm tŏng kum mơjiâng pro hngêi nếo ƀă ‘mâi rơnêu 637 toăng hngêi, tâi tâng kơxô̆ liăn ai lối 20 rơtal liăn.

Tung lâp tơring ai vâ chê 20 rơpâu rơpŏng kơtiê, rơpŏng vâ chê kơtiê châ mung liăn vâ mơ’no pêi chiâk pêi deăng, tê mơdró kâ châ tơƀrê. Pôa Y Mlai Ƀyă, ối a Ƀuôn Ea Sup, pơlê kân Ea Sup tối ăm ‘nâi, tơdrêng ƀă tơdroăng mơ’no liăn vâ mơnhông pêi cheăng kâ, vâi krâ - nhŏng o hâk git khât kơ tơdroăng rak vế khôi túa lĕm tro dêi hdroâng kuăn ngo.

‘’Mơnê Đảng ƀă Tơnêi têa, mơnê mâu kăn pơkuâ pơlê đi đo djâ troăng khu vâi rơxông nếo nôkố pơtối rak vế khôi túa, vêa vong dêi hdroâng kuăn ngo, mơnhông pêi cheăng kâ, trâm tơpui tơno, tơdroăng rêh ối châ mơnhông ƀă ai hiâm tuăn tơrŭm. Tung hơnăm nếo, á pói rơhêng vâ vâi krâ - nhŏng o pin phâi tơtô, hơniâp ro, kuăn cháu châ hriâm rơkê, mâu vâi krâ pơtối hnê ‘măn ăm kuăn cháu khôi túa, vêa vong dêi hdroâng kuăn ngo Rơđế pin’’.

*Pôa Y Mlŭi, hdroâng kuăn ngo Jarai, mơngế ki châ kuăn pơlê loi tơngah, ối a pơlê Weh, cheăm Hà Bầu, tơring Đăk Đoa, kong pơlê Gia Lai ai tối: Hơnăm 2022, vâi krâ - nhŏng o hâk nâ xua mâu tơdroăng cheăng kâ, rêh ối pơlê pơla, tơdroăng pêi chiâk pêi deăng hiăng vêh tiah hmâ nếo. Vâi krâ - nhŏng o hmiân tuăn pêi cheăng kâ, tê mơdró. Hên rơpŏng hngêi hiăng châ mơjiâng hngêi trăng ki nếo, krá tơniăn.

‘’Troh nôkố, vâi krâ-nhŏng o hơniâp ro xua tơdroăng pêi cheăng kâ tơniăn. Nôkố, vâi krâ - nhŏng o hơniâp ro, tơkŭm pêi chiâk pêi deăng, pêi lo kế tơmeăm ƀă tơniăn tuăn pêi kâ. Pêt ƀă rak ngăn loăng kơphế, mơjiâng pro hngêi kân rơdâ, krá lĕm, ai tíu pơtê, ai tíu koi tơtô. Mâu troăng hơlâ, troăng tơdjâk dêi Đảng, Tơnêi têa hiăng mơ'no tối kuăn pơlê athế rak vế tro; kuăn pơlê châ hơniâp ro châ ai tơdroăng rêh ối tiah hâi kố.

Tơná, rơpŏng hngêi ngin xuân hiăng tơniăn pêi cheăng kâ, xua hơnăm kố, kơphế hiăng ai plâi hên tê xuân châ yă kơnâ, mâu tơdroăng pêi cheăng tung hơnăm nah pơrá châ tơtêk mê vâi krâ-nhŏng o khoh ai tơdroăng hơniâp ro hên luâ tâ’’.

*Ƀon U2 ối tung dế pơlê kân Ea Tling, tơring Čư̆ Jut, kong pơlê Dak Nông. Pơlê nôkố ai lối 320 rơpŏng ai dâng 1 rơpâu 600 pơ’leăng mâ mơngế, tung mê, ai hdroâng M’Nông châ lối 25%. Tơdroăng rêh ối dêi pơlê nôkố ki hên cho kơnôm mâu hdrê loăng ki kơnâ, môi tiah kơphế, tiu, loăng hôt; mâu hdrê loăng ki ê ƀă păn kơpôu ro, í peâp. Pôa Y Ghông, krâ pơlê Ƀon U2 cho ngế ki lăm pro kăch măng rơxông hdrối nah, nôkố hơnăm hiăng krâ, tối ăm ‘nâi:

‘’Hdrối hâi tơnêi têa tá hâi châ tơleăng lĕm nah, tơdroăng rêh kâ ối dêi kuăn pơlê hdroâng M’Nông ối trâm hên pá puât, hmê kâ tá ai, hmân ếo xâp xuân ti bê. Nôkố, kơnôm ai Đảng, Tơnêi têa tŏng kum, a pơlê dêi Ƀon U2 kố kuăn pơlê hiăng ai tơdroăng rêh ối chía niân tâ, rơpŏng kơtiê bú iâ. Bu ai to mâu ngế ki klâi pêi cheăng mê nếo kơtiê.

Nôkố, ôh tá kâi tâi tơdroăng cheăng pêi, pêt kơxái tiu, kơphế, loăng hôt, pôm loăng, alâi ƀă hên tơmeăm khoăng ki ê, klêi kơ’nâi krí plâi kố troh plâi ki ê, ôh ta ai kơklêa; bê kâ bê xâp. Môi tiah rơpŏng á hơnăm kố pêi châ 70-80 kơxâk báu, bê kâ, ôh tá ai kơklêa’’.