VOV4.Xơ Đăng - Klêi kơ’nâi 4 hơnăm pêi pro tơdroăng pơkâ 522 hơnăm 2018 dêi Ngế pro xiâm hnê ngăn Chin phuh, kĭ pơkâ tơdroăng pơkâ chêh tung hlá mơ-éa Hnê hriâm tơdroăng cheăng ƀă pơkâ xing xoăng hok tro, hnoăng cheăng xing xoăng hok tro klêi râ má péa hiăng hlo pêi pro ki khât, rế mơdêk tơƀrê tung tơdroăng cheăng dêi hngêi trung hnê cheăng pêi ƀă tíu xiâm hnê hriâm đi đo, rế mơdêk ki rơkê tung tơdroăng ki hok tro pơxiâm mot hriâm râ má pái. Laga, tơdroăng ki ôh tá bê hngêi trung hnê cheăng xuân dế pro tơdroăng ki xing xoăng hok tro a hên kong pơlê tung kơpong ôh tá pêi châ tơdroăng pơkâ.

Hơnăm kố, kơxô̆ hok tro hiăng klêi hriâm râ má péa plah tơ’noăng a Dak Nông chêh inâi hriâm a hngêi trung Cao đẳng Cộng đồng Dak Nông hên tâ rêm hơnăm. Krê to tung rôh má 1 kố hiăng ai vâ chê 300 ngế ƀă rôh má péa mơni kô châ tơ’mot 100 ngế nếo. Pôa Nguyễn Hữu Lành, Ngế pơkuâ hngêi trung ăm ‘nâi, pêi pro tiô tơdroăng xoăng hriâm tiô pơkâ 522 hơnăm 2018 dêi Ngế pro xiâm hnê ngăn Chin phuh hiăng kum hngêi trung riân ngăn hdrối kơxô̆ hok tro vâ rah xo mot hriâm ƀă ai pơkâ tung tơdroăng rah xo mot hriâm, hbrâ tơmeăm kơƀăng tăng ƀă kơxô̆ thái kô hnê ăm tơtro, rak tơniăn hnê cheăng pêi hlối tơƀrê rơtế ƀă mâu tơdroăng hnê túa lĕm tro, kum mâu hok tro ai hên tơdroăng vâ rah xêh tơdroăng púi vâ.

Pôa Nguyễn Hữu Lành ăm ‘nâi:

“Akố mâu vâi o ki hên cho hriâm cheăng mê ki khât. Laga mâu vâi o xuân chiâng vâ rah xo tơdroăng hriâm tiô tơdroăng giáo dục thường xuyên lơ hriâm ‘na tơdroăng hriâm há hlối hriâm cheăng. Tâng giáo dục thường xuyên, mâu vâi o xuân ối châ tơ’noăng mơgêi hriâm mơ’nui râ ki mê ah xuân môi tiah mâu vâi o ki hriâm râ má pái ki hmâ mê há.Tâng hriâm văn hóa nghề mê mâu vâi o kô châ vâ hriâm to râ cao đẳng. Tơkéa vâ tối hriâm tơ’nôm 2 hơnăm nếo, tơ’nôm hriâm văn hóa nghề cho 2 hơnăm tơdế mê mâu vâi o kô châ liên thông to hriâm cao đẳng hlối’’.

Vâ chê 300 ngế hok tro cho khu ki chêh inâi vâ hriâm a Cao đẳng Cộng đồng Dak Nông hơnăm hriâm 2022-2023

Xuân ai kơxô̆ hok tro hiăng klêi hriâm tâi râ má péa tâk hên, hơnăm kố kong pơlê Dak Lak hiăng pêi pro tơdroăng klâ xoăng tíu hriâm ƀă lối 5 rơpâu ngế vâi o hok tro. Tung mê, 16 Tíu hrâm hnê cheăng pêi ƀă hnê giáo dục thường xuyên a râ kong pơlê tơdah xo 4.934 ngế hok tro. Xuân tiô pôa Hà Ngọc Hướng, Ngế pơkuâ hngei trung giáo dục thường xuyên ƀă hnê cheăng pêi ăm tơring Ƀuôn Đôn, klâ xoăng kơxô̆ hok tro hriâm nôkố hiăng hlo luâ tơdroăng ki tô tuăn ‘na tuăn ngôa tơmiât dêi hok tro ƀă nôu pâ.

A mâu hngêi trung hnê giáo dục thường xuyên hlối hnê cheăng pêi, mâu vâi o châ tơkŭm hriâm môi ki kal, châ hnê cheăng pêi, rĕng ‘nâi tơdroăng cheăng vâ lăm cheăng tơ’nôm, kơdroh ki xơpá ăm rơpŏng hngêi.

“Môi tiah rêm hơnăm, xuân cho mâu ki mê, lăm hriâm râ má 3, hriâm troh môi chât to lâi môn mê ki hên hriâm ôh tá kâi. Nôkố lăm hriâm a tíu kố hriâm dâng 7 môn tê, má péa nếo, hnê nhên tâ mê mâu vâi o hriâm râ má pái kô tro tâ. Pakĭng mê, hlối lăm hriâm hlối lăm pêi cheăng mê mâu vâi o kô hlê, chôu pâ mâu tơdroăng hriâm ƀă pêi cheăng hlối ai liăn iâ vâ xúa dêi tung rêh ối’’.

Xoăng kơxô̆ hok tro hriâm râ má péa hiăng ăm hlo mâu tơdroăng ki pơxúa a mâ ƀă tá hok tro ƀă mâu hngêi trung hnê cheăng pêi ƀă hnê giáo dục thường xuyên, la hơnăm hriâm 2022-2023, hơnăm má pŭn pêi pro tiô pơkâ 522/2018 dêi Ngế pro xiâm hnê ngăn Chin phuh, a Tây Nguyên nếo ai kong pơlê Lâm Đồng klâ xoăng hriâm kơpêng 24% ngế hok tro hiăng klêi hriâm râ má péa, ki u ối ing 10% troh 20%.

Ki xiâm cho ôh tá ai hngêi trung lâm ăm hok tro hriâm cheăng pêi, ôh tá ai tơdâng tơ‘mô pơla hnê hriâm ƀă hnê văn hóa. Môi tiah a Dak Nông, ai Hngêi trung giáo dục thường xuyên râ tơring bú hnê to cheăng pêi sơ cấp tê mê ôh tá ai tơdroăng hnê hriâm văn hóa. Tiô pôa Nguyễn Văn Toàn, Ngế pơkuâ ngăn hnê hriâm ƀă hnê mơjiâng tuăn ngôa rơkê kong pơlê Dak Nông, xua tơdroăng ki mê, pơkâ xoăng 2 rơpâu ngế hok tro hriâm hơnăm kố, bú châ pêi pro tơdế  tê:

“A kơpong kơtiê xơpá tơdroăng xoăng hok tro hriâm kô ôh tá châ vâi vâ hriâm cheăng, xua tung mâu hngêi trung hnê cheăng pêi hiăng pá. Mê khu xiâm  hiăng veăng tí tăng ‘nâi plĕng ăm Vi ƀan kong pơlê tơ’nôm pơkâ rah xo tâi mâu hok tro hriâm a mâu kơpong ki xơpá. Ƀă mâu kơpong tơ’lêi hlâu khu xiâm bú hnê mơhno tro tiô pơkâ, bú ối 900 ngế hok tro nếo tê’’.

Hrá klâ xoăng xuân cho tơdroăng ki ăm hlo khât a Dak Lak. Tiô pôa Phạm Đăng Khoa, Ngế xiâm pơkuâ ngăn hnê hriâm ƀă hnê mơjiâng tuăn ngôa rơkê kong pơlê Dak Lak, khu xiâm dế mơ-eăm mơdêk rĕng, má lối ing hơnăm hriâm 2023-2024.

“Klâ xoăng cho môi tung mâu tơdroăng ki pá dêi tơdroăng hnê hriâm a Dak Lak. Môi tiah rêm hơnăm mê ngin kô rah lối 80% ngế hok tro hiăng klêi hriâm râ má péa ăm mot hriâm lâm 10, mê hơnăm hriâm 2022-2023 ngin hiăng kơdroh 80%. Hơnăm pơtối kô kơdroh bú ối 75%. 25% ki u ối kô ăm hriâm cheăng pêi. Ƀă tiah mê kô tơniăn tơdroăng pơkâ klâ xoăng tiô Chin phuh pơkâ”.

Klâ xoăng hok tro hriâm râ má péa cho tơdroăng ki kal dêi tơdroăng Tơkêa bro ‘’Hnê cheăng pêi ƀă troăng rơhlâ klâ xoăng hok tro tung tơdroăng hnê hriâm phôh thong pơla hơnăm 2018-2025’’, châ kĭ tiô pơkâ kơxô̆ 522/QĐ-TTg hâi lơ 14/5/2018 dêi Ngế pro xiâm hnê ngăn Chin phuh.

Tiô tơdroăng tơkêa bro mê, troh hơnăm 2025, mâu kong pơlê thế klâ xoăng iâ gá 40% hok tro klêi hriâm râ má péa, ƀă kơpong kơtiê xơpá, kơxô̆ klâ xoăng ki iâ ai 30%. Laga, tơdroăng ôh tá tŭm lâm hriâm, ôh tá tơdâng tơ’mô pơla hnê- hriâm văn hoă ƀă hnê cheăng pêi hlo hên a mâu râ tơring kơpong Tây Nguyên, dế cho xiâm ki pro pá ƀă tơdroăng pơkâ dêi tơdroăng tơkêa bro.

VOV Tây Nguyên

Gương tơplôu ƀă tơbleăng