Tâng ngăn têa dế hiu têi, pôa Rơ Lah Kem ối a cheăm Čư̆ Rcăm, tơring Krông Pa, hiâm têi khéa hơ’nêng: 1 ha tơnêi dêi rơpŏng rơtế dâng 100 ha tơnêi dêi vâi krâ kuăn pơlê ƀuôn H’Lang hiăng tro têa kroăng Pa ‘’rơnôa’’:

“Hdrối nah, 1 ha mê pin châ xo sap ing 5 troh 6 tâ̆n. Tơnêi nôkố tơhnâp tâi tâng, têa mơhiu. To lâi toăng hngêi a kố hiăng xĕn u ê tâi tâng, ôh tá prôk ôh tá chiâng, tíu kố hiăng vâ tơhnâp. To lâi ngế a kố hiăng prôk u ê tâi tâng’’.

Kuăn pơlê Ƀuôn H’Lang hbrâ xĕn troh tíu ối nếo vâ ví tơhnâp (um: Nguyễn Thảo)

Pôa Hà Văn Đường, Kăn hnê ngăn Vi ƀan cheăm Čư̆ Rcăm tối ăm ‘nâi, pakĭng 100 ha tơnêi pêt dêi kuăn pơlê a ƀuôn H’Lang tro hía tâi tâng, tơdroăng tơhnâp têa kroăng Pa xuân dế mơnhâu tơdroăng rêh ối lối 100 rơpŏng kuăn pơlê a kố. Kông Lệ Bắc, tơdjêp 2 cheăm Čư̆ Rcăm ƀă Ia Rsươm hiăng tro tơhnâp vâ chê kông 2 pâ kĭng.

Vâ tơniăn ăm kuăn pơlê, mơ’nui hơnăm 2020, Vi ƀan tơring Krông Pa hiăng kĭ tơdroăng tơkêa bro Mơ’no liăn cheăng mơjiâng tơmeăm, tơniăn tơdroăng rêh ối  kuăn pơlê a ƀuôn H’Lang, ƀăng deăng vâ chê 7 ha vâ xĕn lối 102 rơpŏng kuăn pơlê Jarai tung kơpong tơ’lêi tơhnâp. Vi ƀan Kuăn pơlê cheăm Čư̆ Rčăm xuân hiăng ai pâ thế tơring ti tăng troăng xing xoăng tơnêi ăm vâi krâ kuăn pơlê hdroâng kuăn ngo tro tơhnah tơhnâp tâi tơnêi:

“Nôkố, gá cho troăng têa hiu ki xiâm dêi têa kroăng Pa xua mê gá ‘nhê kơpong mê. Peăng kố, gá ‘nhê mot kơpong ilâng kiâ ƀă kơpong kuăn pơlê rêh ối xua mê thế pêi pro tơdroăng xĕn kuăn pơlê. Gá tơdjâk kân, mê cho hía tâi ƀăng deăng mê mâu rơpŏng achê têa kroăng. Ki pá cho tơnêi pêt mơjiâng tơmeăm dêi cheăm Čư̆ Rčăm ôh tá hên, nôkố thế pơ’lêh tơnêi kơdroh tơnêi pêt mơjiâng tơmeăm ăm kuăn pơlê’’.

Lối 100 ha tơnêi pêi chiâk deăng dêi kuăn pơlê Ƀuôn H’Lang hiăng chiâng tung dế têa kroăng (um: Nguyễn Thảo)

Pôa Hồ Văn Thảo, Kăn hnê ngăn Vi ƀan tơring Krông Pa tối ăm ‘nâi, tơring ai 13 tíu tơhnâp dro kĭng xŏn 45 km tíu têa kroăng Pa hiu hluâ 8 cheăm, pơlê kân. Kơpong tơhnâp ó má môi a 2 cheăm Ia Rsai ƀă Čư̆ Rčăm. Tung pơla kố nah, drêng ai iâ kơxô̆ liăn dêi tơring kơtiê, tơring nếo tơkŭm tơniăn ăm kuăn pơlê ƀă tơdroăng pêi pro tơdroăng xĕn kuăn pơlê kơpong tơhnâp. Pơtối mê, hneăng hơnăm 2012 – 2014, tơring pêi pro tơdroăng tơkêa bro xĕn lối 870 pơ’leăng mâ mơngế a 4 pơlê dêi cheăm Ia Rsai.

Hơnăm 2019, tơring pơtối tơdroăng tơkêa bro xĕn kuăn pơlê thâ ăm 31 rơpŏng, 166 pơ’leăng mâ mơngế a 2 cheăm Ia Rsươm ƀă Ia Rsai. Hơnăm 2020 la ngiâ, pơtối pêi pro tơdroăng tơkêa bro xĕn lối 102 rơpŏng kuăn pơlê ƀuôn H’Lang. Troh nôkố tơdroăng tơhnâp drô têa kroăng Pa xuân dế ai rêm hâi mê tá hâi ai troăng pêi ki lâi kơdroh.

Pôa Hồ Văn Thảo, tối ăm ‘nâi.

“Pơtân mê tơniăn châ chăn, tơmeăm khoăng dêi kuăn pơlê, tơmeăm hngêi tơnêi cho kơjo má môi. Liăn pro tíu kâng tât têa pơlê H’Lang mê kô xĕn ăm rĕng, mê tíu kâng tât têa to lâi hrĭng met cho pro châ hrĭng rơtal. Vi ƀan tơring hiăng riân tâi tâng vâ kĭ Vi ƀan kong pơlê, kong pơlê pơkâ Khu xiâm pơkuâ ‘na pêi chiâk deăng ƀă mơnhông mơdêk thôn pơlê’’.

Tơdroăng rêh ối dêi kuăn pơlê dế xahpá xua hmâ tro têa lân luô troh nôkố tá hâi ai troăng hơlâ tŏng kum

Khu râ kăn pơkuâ xuân môi tiah kuăn pơlê Krông Pa, Gia Lai, pói vâ mâu khu râ kơvâ cheăng ing tơnêi têa troh kong pơlê rĕng ai mâu troăng pêi ki xiâm vâ tơleăng tâi tơdroăng tơhnah tơhnâp têa kroăng Pa, tơniăn tơdroăng rêh ối ăm kuăn pơlê.