VOV4.Xơ Đăng - Têt Trung thu cho roh vâ vâi hdrêng phiu ro xah hêi, râng on tơdrong, ngăn kơhnhon xuâng prếo. Laga, ƀă vâi hdrêng a kơpong hơngế hơngo, kơpong vâi krâ hdroâng kuăn ngo mê kơƀăn trung thu lơ on tơdrong cho mâu kơxuô tơmeăm ki kơnâ. Mâu hâi kố, hên khu tơrŭm cheăng, tíu cheăng hiăng mơhnhôk mâu khu râ veăng tơlo liăn vâ tơkŭm po ăm vâi hdrêng hdroâng kuăn ngo môi hâi Têt Trung thu kơnía. A cheăm Pa Ù, tơring Mường Tè, kong pơlê Lai Châu, mâu thái pơkeăng, ƀok thái pơkeăng Khu lêng 354 (ối tung Kơ koan xiâm tŏng kum parŏng), Vi ƀan Pơ’leăng mâ mơngế Rơpŏng hngêi ƀă vâi hdrêng Khu xiâm pơkuâ lêng tơkŭm po khăm pơlât, hnê mơhno, xing xoăng pơkeăng tê kơtê ăm 367 ngế muăn cho mâu vâi o hok tro Hngêi trung Phôh thong hdroâng kuăn ngo ai tíu ối pơtê kơhâi dế trung râ má péa Pa Ù.

Tung tơdroăng tơkŭm po ‘’Trung thu ăm o hơnăm 2022’’, vâ chê 700 ngế o ối kŭn dêi cheăm Pa Ù ối châ kâ kơƀăn, tơdah nâ Hằng, tăm Cuội, ƀă tơdah hên kơxuô tơmeăm ki kơnâ xua Khu tơkŭm po ƀă mâu ngế ai hiâm mơno tŏng kum diâp ăm. Tâi tâng kơxuô tơmeăm diâp ăm ƀă hnoăng liăn hriâm rơkê tơdâng 4,5 rơtal liăn.

Vâi hdrêng A Lưới, Thừa Thiên Huế phiu ro Têt Trung thu

A kơpong tơkăng kong Thừa Thiên Huế, hrĭng ngế hok tro râ má môi – râ má péa Hồng Thuỷ, cheăm tơkăng kong A Lưới châ phiu ro trung thu phâi hơtô. Mâu tơdroăng pêi dêi mâu khu pú hên, ngế krê ai hiâm mơno tŏng kum ăm mâu vâi hdrêng kơpong pá puât, kơpong hdroâng kuăn ngo, tơkăng kong ƀă hía hé hiăng mơhno khôi túa ‘’pâ vâi ki ê môi tiah pâ dêi châ’’ dêi hdroâng mơngế pin.

A Sa Ly tơplôu ƀă tơbleăng