Hneăng tơ’noăng mơgêi râ má pái phôh thong hơnăm 2023 ki xiâm cho rak vế tơniăn môi tiah hơnăm 2022, maluâ ti mê, túa ki tơ’noăng a mâu tơdroăng ki nếo pơkal athế mâu hok tro athế hlê plĕng i nhên. Cô Lê Thị Minh Huế, cho cô pơkuâ lâm 12A5, Hngêi trung râ má pái phôh thong Mạc Đĩnh Chi, tơring Chư Pah tối ăm ‘nâi:

“Vâ kum mâ vâi o hlê plĕng nhên ‘na mâu tơdroăng ki nếo tung luât ki pơkâ tơ’noăng hơnăm kố mê thái cô ki pơkuâ ngăn lâm ƀă hên tơdroăng cheăng, ki má môi cho tung chôu ki tơpui tơno apoăng 15 phut, cho chôu ki tơpui tơno rêm măng tĭng kô pơtroh ing Zalo vâ tối pơtâng ăm mâu vâi o ‘nâi ai mâu tơdroăng ki nếo tung hneăng tơ’noăng kố vâ vâi o rak vế, pêi pro tro tiô tơdroăng pơkâ’’.

O Nguyễn Thị Anh Thơ, lâm 12A7, Hngêi trung râ má pái phôh thong Mạc Đĩnh Chi, tơring Chư Păh tối ăm ‘nâi:

‘’Tiô á, vâ tí tăng hlê plĕng mâu tơmeăm ki vâ ‘mot tung veăng tơ’noăng mê cho loăng chêh, kra-yong, kơmăi tĭnh ki kŭn, cho kơmăi ki ôh tá chiâng chêh tối ki klâi ôh, ôh tá khoh djâ tơvế mâu tơmeăm ki chiâng hrik, xup up, ki maluâ phôn râng kŏng’’.

Tơdrêng ƀă tơdroăng ki mơhno tối vâ hok tro châ hlê plĕng nhên túa ki tơ’noăng, mâu hngêi trung a Gia Lai xuân hiăng tơkŭm pêi pro hên ‘na tơdroăng cheăng ki vâ pơxiâm mot tung hneăng tơ’noăng. Mâu khu ki ngăn ‘na tơdroăng tơ’noăng xuân hiăng môi tuăn chêh tối ‘na tơdroăng ki xiâm, hnoăng pêi pro, mơnhên khu hok tro vâ ai troăng prôk ki tơtro.

Thái Đỗ Văn Hiếu, hngêi trung râ má pái Đinh Tiên Hoàng, tơring Krông Pa tối ăm ‘nâi:

‘’ ‘Na môn văn, ngin hiăng klâ xing xoăng ăm khu hok tro, mâu hok tro ki hriâm rơkê khât, rơkê krâ kơvâ, krâ kơvâ ƀă lot, maluâ ƀă hok tro ki hriâm plong ai tơdroăng rêh ối xahpá, mê ngin kô tŏng kum hên tâ, hnê mơhno ăm vâi hên tâ vâ vâi o hmiân tuăn tung hneăng tơ’noăng la ngiâ’’.

Thái Trịnh Văn Bình, Kăn phŏ hngêi trung râ mái pái phôh thong Đinh Tiên Hoàng tối ăm ‘nâi, hngêi trung hiăng tơkŭm po lâm mơhriâm ăm hok tro vêh hriâm dêi mâu tơdroăng ki hriâm, hnê mơhno tối vâ vâi o pro mâu ƀai tơ’noăng, hmiân tuăn vâ pro ƀai:

“Mơ’nui khế 5 mê hngêi trung kô tơkŭm po hneăng tơ’noăng ki mơnúa râ má pái phôh thong a hngêi trung, hngêi trung kô hnê mơhno tối, pơkâ tơdroăng tơ’noăng ăm mâu vâi o hdrối vâ mot hneăng tơ’noăng mơnúa mơgêi râ má pái phôh thong. Kơdo mơ-eăm hơnăm kố kố châ 98,5%. Cheăng ki rơbot ƀai hngêi trung kô pơkâ pêi pro tiô tơdroăng ki vâi o hiăng pói vâ’’.

Hneăng tơ’noăng mơgêi râ má pái phôh thong tơnêi têa hơnăm kố lâp kong pơlê Gia Lai ai lối 15 rơpâu 200 ngế hok tro chêh dêi inâi vâ tơ’noăng; tung mê, ai vâ chê 14 rơpâu 300 ngế hok tro phôh thong, 483 ngế hok tro yăo yuk thơng xuên, ki u ối cho hok tro mâu hơnăm hdrối mê hía nah.

Tung tâi tâng kơxô̆ hok tro ki chêh dêi inâi mê ai lối 14 rơpâu hok ki chêh dêi inâi vâ séa mơnhên ngăn hok ƀă mot hriâm đăi hok, kao đăng. Kong pơlê Gia Lai hiăng pơkâ kô ai 41 tíu tơ’noăng.

Pơla hdrối kố nah, Khu xiâm ngăn ‘na hnê hriâm ƀă hnê mơjiang tuăn ngôa rơkê hiăng ai hlá mơ-eá pơtroh ăm Khu hnê hriâm ƀă hnê mơjiang tuăn ngôa rơkê kong pơlê, Khu ngăn ‘na hngêi trung dêi Khu xiâm ngăn ‘na lêng ‘na tơkŭm po hneăng tơ’noăng mơgêi râ má pái phôh thong hơnăm 2023, tung mê ai chêh tối nhên ‘na hneăng tơ’noăng kố.

Tiah mê, hneăng tơ’noăng mơgêi râ má pái phôh thong hơnăm 2023 châ tơkŭm po a mâu hâi lơ 27, 28, 29 ƀă lơ 30/6/2023, tung mê, mâu hok tro ki chêh bro hlá mơ-éa a hdrối a peăng xêi hâi lơ 27/6, kô tơ’noăng tung pơla 2 hâi, lơ 28 ƀă lơ 29, troh lơ 30/6 cho hâi ki tơ’noăng vâ hbrâ tê. Lich ki tơ’noăng a tơrêm môn pơrá châ pơkâ nhên tiah kơ’nâi kố: Hâi lơ 28/6, peăng kơxo má tơ’noăng môn Ngữ văn, peăng xê tơ’noăn môn Toán; hâi lơ 29/6, peăng kơxo tơ’noăng 2 môn cho Khoa hok tự nhiên ƀă Khoa học xã hội; peăng xêi tơ’noăng nâl Ănglê.

Pơkâ ‘na tơdroăng hbrâ tơ’noăng, tơkŭm po hneăng tơ’noăng mơgêi râ má pái phôh thong hơnăm 2023, Khu xiâm ngăn ‘na hnê hriâm ƀă hnê mơjiâng tuăn ngôa rơkê pơkâ thế khu pơkuâ ngăn hnê hriâm ƀă hnê mơjiâng tuăn ngoâ rơkê hnê tối mâu hngêi trung thôh thong séa mơnhên ngăn, chêh tối mâu tơdroăng ki nếo ai dêi mâu hok tro dế hriâm lâm 12, ngăn tiô kơ hlá mơ-éa ki hiăng chêh tối tung hok ƀă, mâu tơdroăng ki ai tơdjâk troh hok tro ƀă mâu tơdroăng ki hriâm rơkê dêi hok tro.

Tiô tơdroăng tối pơtâng dêi Khu xiâm ngăn ‘na hnê hriâm ƀă hnê mơjiâng tuăn ngôa rơkê ăm ‘nâi, troh a 8 chôu hâi lơ 18/7, mâu Khu hnê hriâm ƀă hnê mơjiâng tuăn ngoa rơkê, mâu khu ki chêh tơdroăng tơ’noăng kô tối tơbleăng ‘na ki tơƀrê dêi hneăng tơ’noăng mơgêi râ má pái phôh thong hơnăm 2023 ƀă mâu hngêi trung râ má pái athế pêi pro klêi tơdroăng ki vêh mơnhên tơdroăng ki hiăng hriâm klêi râ má pái, ki vâ hrá hlái cho a hâi lơ 20/7.

Ki hrá hlái mê hok tro kô châ xo dêi ƀâng mơgêi râ má pái ki pơtân, hok ƀă mâu mâu hlá mơ-éa ai tơdjâk ki ê.