Hneăng tơ’noăng mơgêi râ má pái phôh thong hơnăm 2023 hiăng vâ chê troh, roh kố, mâu hngêi trung râ má pái phôh thong a kong pơlê Gia Lai dế thăm mơdêk hnoăng cheăng hnê tối, hnâ mơhno cheăng veăng kum ăm hok tro vâ rơkê plĕng mâu luât pơkâ tung hneăng tơ’noăng ki kal a la ngiâ. Hneăng tơ’noăng mơgêi râ má pái phôh thong hơnăm 2023 ki xiâm xuân ối tơniăn môi tiah hơnăm 2022, maluâ ti mê, tiô tơdroăng pơkâ luât tơ’noăng a mâu hngêi trung cho  pơrá phá dêi pó, mê mâu vâi o hok tro kal athế rĕng lăm ngăn vâ ‘nâi ahdrối, hbrâ rơnáu mâu tơdroăng cheăng.

Rơtế ƀă tơdroăng ki hnê mơhno tối ăm hok tro hlê plĕng nhên luât tơ’noăng, mâu hngêi trung a Gia Lai xuân dế tơkŭm hnê hriâm rơbot mâu ƀai vâ tơ’noăng. Mâu khu thái cô ki ngăn ‘na môn tơ’noăng xuân hiăng mơjiâng túa hnê hriâm, mơnhên mâu hok tro ki rơkê ki ôh vâ ai troăng hnê tối ki tơtro.

Hneăng tơ’noăng mơgêi râ má pái phôh thong tơnêi têa hơnăm kố, lâp kong pơlê Gia Lai ai lối 15 rơpâu 200 ngế hok tro chêh dêi inâi vâ tơ’noăng; tung mê, ai vâ chê 14 rơpâu 300 ngế hok tro hriâm phôh thong, 483 ngế hriâm yăo yuk thưong xuên, ki ê cho mâu hok tro ki hdrối mê hía nah. Tung tâi tâng mâu hok tro ki chêh inâi tơ’noăng mê ai lối 14 rơpâu ngế hok tro hiăng chêh dêi inâi vâ mơnhên điêm mot hriâm đăi hok, kao đăng. Kong pơlê Gia Lai xuân hiăng ai troăng hơlâ kô po 41 hngêi trung ki tơ’noăng.