VOV4.Xơ Đăng - Peăng xêi lơ 23/9, a Hà Nội, Khu xiâm ngăn ‘na tơdroăng nếo ai ƀă hnê mơhno tơdroăng kal hiăng tơrŭm cheăng ƀă Rơ’jíu xiâm Việt Nam, Um tơvi xiâm Việt Nam tơkŭm po hneăng ‘’Thăm mơdêk ivá cheăng ing tơpui tung rơ’jíu kơxô̆, ki xiâm dêi tơdroăng mơ’no um tơvi dêi tơnêi têa’’ xua Khu xiâm ngăn ‘na tơdroăng nếo ai ƀă mơhno tơbleăng tơdroăng kal hiăng tơrŭm ƀă Rơ’jíu Việt Nam, Um tơvi xiâm Việt Nam.

Lâp tơnêi têa dế nôkố ai 72 tíu ki pêi ‘na hnoăng cheăng rơ’jíu, um tơvi. Tiô mâu kăn ai tối, rơ’jíu ƀă um tơvi cho tíu ki xiâm vâ tơkŭm tơrŭm pơla tơdroăng ki kal ƀă kih thuât. Tung pơla cheăng kơmăi kơmok kơxô̆ tiah nôkố, kal athế xúa kơmăi kơmok chal nếo ki rơkê plĕng mê, ing mê tơpui tối, mơ’no mơđah um vâ tối tŭm têk mâu tơdroăng pêi cheăng kâ-rêh ối pơlê pơla, tung mê ai tá tơdroăng ki hnê djâ troăng tiô kơ hlá tơbeăng, rơ’jíu, um tơvi.

Thăm mơdêk ‘na tơdroăng cheăng ‘no hyôh tơdroăng tơpui tung Rơjíu, ing troăng ki mơdêk ing Um tơvi dêi tơnêi têa

Kong ngê̆ kơxô̆ kô hơ’lêh mâu tơdroăng cheăng dêi rơjíu, um tơvi ƀă kum mâu rơ’jíu, um tơvi mê pêi pro thăm rế mơnhông hnoăng cheăng dêi tơná lĕm tro tâ, tơtro tâ, tơ’lêi hlâu tâ tung chal nếo nôkố. Ki xiâm ing tơdroăng ki tơpui mơ’no tung rơ’jíu kum ăm kuăn pơlê chiâng châ hmâng, châ tâng mâu tơdroăng ki tơpui tung rơ’jíu dêi Việt Nam rêm hdroh, rêm tíu, tá tơdroăng ki tơpui tơno ƀă kuăn pơlê, mâu vâi krâ-nhŏng o ki rêh kâ ối a kong têa vâi ê.

Rơ’jíu xiâm Việt Nam dế mơjiâng Tơdroăng tơkêa pêi tiô kơ cheăng kơmăi kơmok kơxô̆ dêi tơnêi têa ƀă tiô tối hdrối apoăng khế 9 hơnăm 2023 kô pêi cheăng tiô túa ki nếo păng ‘nâng.

Nhat Lisa tơplôu ƀă tơbleăng