VOV4.Xơ Đăng - Kơtăn ing tơdế kong pơlê Kon Tum lối 10km, Đăk Glei cho tơring ối kơpong tíu tơkăng kong má môi, ai vâ chê 90% pơ’leăng mâ mơngế cho hdroâng kuăn ngo, 11/12 to cheăm, pơlê kân ối tung rơpŏng kơtiê xahpá. Kơnôm pêi pro tro hnoăng cheăng mơnhông cheăng Đảng a kơpong hdroâng kuăn ngo, Đăk Glei hiăng pơtối mơdêk hnoăng cheăng kăch măng, mơjiâng kơpong tíu tơkăng kong tơniăn ‘na kring vế cheăng pơkuâ, cheăng kal kí, kring vế tơniăn tơdroăng rêh kâ ối pơlê pơla. Rêm ngế đảng viên đi đo cho mâu ngế ki xiâm, djâ troăng ahdrối, prôk troăng ki ahdrối tung mâu tơdroăng cheăng tơ’noăng pâ nhoăm tơnêi têa.

Ƀă kuăn pơlê a pơlê Đăk Ga, cheăm tíu tơkăng kong Đăk Nhoong, tơring Đăk Glei, kong pơlê Kon Tum, rêm hdroh Chi ƀô̆ ai rah mơngế mot đảng viên nếo cho tơdroăng cheăng ki kal kân tơdjuôm dêi tâi pơlê. Dế nôkố, Chi ƀô̆ pơlê Đăk Ga  hiăng ai 25 ngế đảng viên pơrá cho hdroâng Jêh - Triêng. Ngoh A Cu, Ngế cheăng tung khu pơkuâ hnê ngăn Đảng thôn, xuân cho kăn thôn tối ăm ‘nâi:

“Mot đảng cho hnoăng cheăng ki tơxâng hâk mơnê. Drêng mot Đảng tơná á hiăng hơ’lêh hên tơdroăng. Pin châ hlo, châ ‘nâi hên tơdroăng ki ‘ló, ki tro, ai pơxúa kân khât, ing mê, pin hnê mơhno ăm kuăn pơlê tung thôn. Đảng viên pin athế djâ troăng, po troăng ahdrối hnê ăm kuăn pơlê pêi chiâk pêi deăng. Ki rơhêng vâ tối ki kal má môi, athế hơ’lêh tuăn tơmiât, túa pêi cheăng, pin athế rĕng châ hlo, châ ‘nâi vâ pêi pro tiô tơdroăng ki nếo, ki ‘ló tro. Khôi tuá ki ôh pá tro pin athế kơdroh tah lôi, khôi túa ki lĕm tro athế rak vế. Á cho kăn pơkuâ thôn, mê á hnê mơhnhôk kuăn pơlê athế pêi cheăng kâ mơnhông cheăng kâ mơjiâng tơdroăng cheăng kâ, mơdêk tơdroăng rêh kâ ối tung rơpŏng hngêi châ tơtêk luâ tâ hdrối nah”.

Ngoh A Cu (peăng hơ-ếo), Cheăng tung Khu pơkuâ hnê ngăn Đảng thôn, kăn hnê ngăn thôn Đăk Ga, cheăm Đăk Nhoong, tơring Đăk Glei trâm mâ, mơhnhôk kuăn pơlê tah lôi khôi túa ki ôh pá tro

Cheăm tíu tơkăng kong Đăk Nhoong hiăng châ Khu pơkuâ hnê ngăn Đảng tơring Đăk Glêi séa mơnhên tối cho môi tung mâu cheăm ki pêi pro lĕm tro hnoăng cheăng mơnhông cheăng Đảng kơpong hdroâng kuăn ngo. Dế nôkố, Đảng ƀô̆ cheăm ai 184 ngế đảng viên, tung mê, ai 156 ngế đảng viên cho hdroâng kuăn ngo. 6 khế apoăng hơnăm kố, cheăm hiăng ai tơ’nôm 8 ngế đảng viên nếo. Pôa A Nang, Kăn phŏ pơkuâ hnê ngăn Đảng uỷ cheăm Đăk Nhoong vêh mơnhên, tung hơnăm kố, Đảng ƀô̆ cheăm kô pêi pro klêi hnoăng cheăng rah ‘mot 15 ngế đảng viên nếo. Môi tung mâu tơdroăng cheăng ki hiăng nhên dêi Đảng ƀô̆ mê cho tơdroăng ki seá ngăn hồ sơ athế tơniăn, tơdrêng ƀă tơtro khât:

“Drêng Chi ƀô̆ séa mơnhên ngăn, ngin athế rĕng ngăn mơnhên rế ’ló. Ngin hôp Khu pơkuâ hnê ngăn Đảng rêm khế 1 ngế, 2 ngế ngin xuân pơtroh ăm râ kơpêng ‘nâi. Mâu ngế ki kơ’nâi, hlo ngin rĕng pro mê, seá mơnhên tro tơdroăng, mê hên ngế kơdo mơ-eăm pêi cheăng kơhnâ, rơkê vâ mot Đảng rế hía rế kơdrâm. Tâng pin hmôu pơ lôi hồ sơ ton tĭn 1 măng tĭng, 2 măng tĭng, mê plâ hơnăm ah xuân tá hâi kâi kêi”.         

Đăk Glêi cho môi tung 3 tơring ki ai tơdroăng pêi cheăng kâ - rêh ối xahpá má môi dêi kong pơlê Kon Tum, lâp tơring ai vâ chê 90% pơ’leăng mâ mơngế cho hdroâng kuăn ngo. Kơnôm pêi pro lĕm tro hnoăng cheăng mơjiâng Đảng a kơpong hdroâng kuăn ngo, mê troh nôkố tơring ai lối 2.700 đảng viên, tung mê, ai lối 1.800 ngế đảng viên cho hdroâng kuăn ngo ki iâ mơngế, châ lối 66%.

Mâu đảng viên pơlê Đăk Ung, cheăm Đăk Nhoong đi đo djâ troăng ahdrối tung mâu tơdroăng cheăng dêi pơlê

Pôa A Phương, Kăn phŏ pơkuâ hnê ngăn Đảng tơring Đăk Glei tối ăm ‘nâi, Khu kăn pơkuâ hnê ngăn Đảng hiăng tŏng kum, ngăn khât, rak vế, ‘mâi mơnhông Khu pơkuâ hnê ngăn cheăng Đảng ƀă tăng rah mơngế kơhnâ rơkê mot Đảng a mâu thôn pơlê. Ing mâu tơdroăng cheăng a thôn pơlê, rĕng châ ‘nâi, châ hlo, rĕng hnê mơjiâng mâu ngế ki rơkê kơhnâ vâ mot tung Đảng ƀă hnối hnê mơhno ăm vâi loi tơngah, tuăn hiâm dêi kuăn pơlê hdroâng kuăn ngo hâk mơjo pâ kơ Đảng:

“Ngin hiăng xing xoăng tiô kơ tơdroăng cheăng mê cho Khu pơkuâ hnê ngăn Đảng tơring, klêi mê, khu râ pơkuâ ngăn chu troh a pơlê cheăm vâ tí tăng ‘nâi plĕng, klêi mê, hnê mơhno, tí tăng ngăn mâu ngế ki rơkê kơhnâ dêi hdroâng kuăn ngo. Đảng viên ƀă mâu ngế ki djâ troăng ahdrối, cho mâu ngế ki kuăn pơlê ki djâ troăng. Tơdroăng ki kơdo mơ-eăm mot tung Đảng, ki rơhêng vâ tối cho kơpong kăch măng vâ vâi mot tung Đảng cho vâ kum ăm kuăn pơlê, kum ăm pơlê cheăm, tơnêi têa pin xua nôu pâ vâi chal hdrối nah xuân cho mâu ngế ki lăm pro kăch măng”.

Ƀă hên mâu troăng hơlâ, môi tiah tí tăng rah, châ hlo mâu kuăn pơlê ki rơkê kơhnâ vâ pơtối hnê mơhno; tŏng kum tơdrêng ƀă mâu hồ sơ pâ mot cheăng Đảng, tơkŭm po lâm hnê mơhno tơdroăng cheăng ‘na Đảng tiô kơ khu cheăm tung hơnăm 2015-2020, Đảng ƀô̆ tơring Đăk Glei hiăng châ rah ‘mot 700 mot đảng viên nếo, châ luâ 200 ngế đảng viên tâng vâ pơchông ngăn ƀă tơdroăng hiăng pơcháu. Hneăng hơnăm 2020-2025, Đảng ƀô̆ tơring hiăng pơkâ kô rah ‘mot 600 ngế đảng viên nếo. Tung apoăng hơnăm cho ki apoăng rak vế, pêi pro tiô tơdroăng pơkâ, Đảk Glei hiăng rah ‘mot châ 143 đảng viên nếo. Loi tơngah tung hneăng roh kố, Đảng ƀô̆ ai troăng hơlâ kô mơnhông mơdêk tơdroăng ‘mot mơngế mot đảng viên nếo tung mâu hdroâng kuăn ngo. Ki păng ‘nâng ăm hlo, mâu ngế đảng viên hdroâng kuăn ngo iâ mơngế. Ki păng ‘nâng ăm hlo, mâu đảng viên cho hdroâng kuăn ngo iâ mơngế a tơring Đăk Glei, kong pơlê Kon Tum cho mâu ngế ki djâ troăng ahdrối tung mơnhông pêi cheăng kâ, rêh ối pơlê pơla, mơjiâng kơpong tíu tơkăng kong rế hiá rế krá tơniăn ƀă mơnhông mơdêk.

Khoa Điềm chêh

Nhat Lisa tơplôu ƀă tơbleăng