Mố đô̆i gak tíu tơkăng kong Dak Lak ‘nâi nhên kô pê klêi tơdroăng tâ phĭu rĕng hdrối tâ, hlối tơniăn tung rôh tâ phĭu. Khu kăn pêi cheăng dêi Khu pơkuâ Mố đô̆i gak tơkăng kong dêi kong pơlê Dak Lak hiăng lăm tăng ngăn a mâu đông lêng, mê cho: Mâu Đông tơkăng kong Ea H’Leo,  Vi ƀan Ia Rvê, Yok M’Bre, Srêpok, Bo Heng, Yok Đôn, Bo cheăng tơkăng kong Dak Ruê ƀă Tiểu đoàn Huấn luyện – Cơ động.

mâu đông, khu kăn hiăng tơmâng ngế pơkuâ đông lêng tơbleăng tơdroăng hiăng klêi hbrâ hdrối vâ tâ phĭu, tung mê, ai tơmâng pêi pro ‘na mâu tơdroăng ai chêh tung hlá mơ-éa hnê mơhno dêi râ kơpêng; tơdroăng hnê tối, tơbleăng luât tâ phĭu ăm kăn ƀô̆, mâu lêng ƀă kuăn pơlê kơpong tơkăng kong; tơdroăng pro tơniăn tung kơpong tâ phĭu; hbrâ mâu tơmeăm, rơnuâ pro kơpong tâ phĭu, kơthung tâ phĭu, ƀă kơthung kơthung tâ phĭu ki vâ rĕng tâ hdrối.

Ƀă mâu đông lêng tôh tâ phĭu rĕng tâ, khu pêi cheăng tối pơchân ăm râ ủi, khu pơkuâ mâu đông lêng kal tơrŭm krá khât ƀă mâu kăn cheăm kong pơlê pêi tro tơdroăng hbrâ, tơniăn ăm kơpong tâ phĭu mê krip, ro, tro tiô pơkâ hbrâ tŭm mâu kơthung tâ phĭu vâ tơkŭm tâ phĭu ukố umê a mâu tíu gak ngăn a tơkăng kong, pro hlâu ăm mâu kăn ƀô̆, mâu lêng ki dế pêi hnoăng cheăng xuân veăng tâ phĭu tŭm, tơniăn tro tiô pơkâ dêi Luât.