Tung mâu tơmeăm mơhno túa lĕm tro dêi hdroâng mơngế, Đền Hùng ƀă hâi xối tơbâ Pơtáu Hùng cho vâ mơhno tuăn pâ tơnêi têa ƀă ivá rơdêi môi tuăn dêi rơpó tâi tâng kuăn pơlê. Loi tĭng xối Pơtáu Hùng hiăng chiâng túa lĕm tro, tơdroăng ki lĕm ton nah dêi mơngế Việt Nam pin. Mơhé pêi ki klâi, ối ulâi, rêm ngế kuăn tơnêi Việt Nam xuân pâ troh dêi xiâm rêi, pâ troh jâ pôa ƀă hiâm mơno nhoăm pâ.

Hơnăm 2023, Leh tĭng xối tơbâ Pơtáu Hùng ƀă măng tĭng Túa lĕm tro - Ôm hyô Đất Tổ châ kong pơlê Phú Thọ tơkŭm po sap hâi lơ 20 troh lơ 29/4/2023 (tơkéa vâ tối sap hâi lơ 1 troh lơ 10/3 hơnăm Qúy Mão) a pơlê kong kơdrâm Việt Trì, Kơpong tíu xối tơbâ tơmeăm ton nah dêi Đền Hùng ƀă mâu tơring, pơlê kong krâm tung kong pơlê.

Peăng leh châ kong pơlê Phú Thọ hnê mơhno tơkŭm pro tơniăn tơtro, pro kân krip, môi tiah tung pơlê tơkŭm a mâu tơdroăng pêi pro ki xiâm: Tĭng xối tơbâ Đức Quốc Tổ Lạc Long Quân ƀă chôu nhang tơbâ Jâ Xiâm Mẫu Âu Cơ; Tĭng xối tơbâ Pơtáu Hùng ƀă têk pleăng reăng a Um kơchuâ ‘’Pôa Hồ tơpui ƀă kăn ƀô̆, mâu lêng ki rơkê djâ troăng a hdrối‘’; Leh chôu nhang a mâu tíu xối tơbâ Pơtáu Hùng, mâu ngế rơkê, mâu lêng ki rơkê dêi chal pơtáu Hùng tung kong pơlê. Tĭng têk nhang tơbâ troh Khu Pơtáu Hùng dêi mâu tơring, pơlê kong kơdrâm, kong krâm tung kong pơlê.

Pakĭng mâu hâi leh xối tơbâ tiô ton nah, mâu tơdroăng pêi pro dêi Tĭng hơnăm kố ai hên tơdroăng ki nếo, rơtế tơkŭm pêi ƀă ‘na tơdroăng ôm hyô, pro chiâng ai mâu tơdroăng pêi pro tung Măng tĭng mơhno Túa lĕm tro - Ôm hyô, mơhno túa lĕm tro vêa vong ki tơviah ton nah dêi kơpong Đất Tổ.

Ki hlo hên tâ cho tơdroăng pơxiâm po “Tĭng xối tơbâ Đền Hùng ƀă Măng tĭng Túa lĕm tro - Ôm hyô Đất Tổ hơnăm 2023’’ ƀă ‘’Măng tĭng tơmeăm khoăng kơnía ton nah châ UNESCO chêh ‘mot tung mơ-éa a 20 chôu hâi lơ 21/4/2023 a Plông kân Hùng Vương; Hôp tơpui tơno lâp plâi tơnêi “Hôp tơpui tơdroăng ôm hyô, túa lĕm tro, tơmeăm kơnía ton nah ƀă tơdroăng mơnhông Việt Nam krá tơniăn”; Tơ’noăng ivá ƀă vo plong tâng ối a long Kŏng viên Văn Lang; Tơ’noăng kơtú ƀa long tơbriât xo Cup Pơtáu Hùng; po kơchơ Ôm hyô peăng Mâ hâi lu pa Kơnhŏng hơnăm 2023; Po kơchơ mơđah tơbleăng tơmeăm tê mơdró kơpong peăng Mâ hâi lo pa kơnhŏng - Phú Thọ hơnăm 2023; Leh mơhno túa lĕm tro ‘na Kế kâ Đất Tổ; Tĭng pro hơpăm mơhno túa lĕm tro ƀă mơđah hơdruê xuăng tiô túa ton nah ăm kuăn pơlê ngăn tung hâi xối tơbâ Pơtáu Hùng.

Pakĭng mâu tơdroăng pêi pro ‘na mơhno túa lĕm tro, tơ’noăng ivá, ôm hyô rêm hơnăm, mê hơnăm kố ối pêi pro mâu tơdroăng ki lĕm ro tơviah ki ê nếo, tơkŭm pêi pro tơtro pơla mâu tơdroăng mơhno túa lĕm tro ton nah ƀă tơdroăng lĕm nếo nôkố vâ tơleăng lâp lu ‘nâi, môi tiah: Mơđah tơbleăng ‘’Tơmeăm khoăng lĕm tro roh ton nah, lăm ôm hyô mâu kơpong pơlê xiâm Việt Nam’’; Tĭng ếo xŏn vâi hdrêng Việt Nam “Pêi pro troh tơdroăng xiâm rêi nah’’; mơđah xap ếo xŏn mâu kuăn ngo Việt Nam; Tơ’noăng to rơxế mái tiô mơhnhôk dêi mâu kâu lăk bô̆ Việt Trì po rơdâ; Tơkŭm khu famtrip ‘’Lăm ôm hyô ngăn mơngiơk lĕm kơpong tơdế kong ngo’’ ƀă hên ki ê. Ing mê, kum tơmối châ ngăn tơdroăng pro mơdĭng ‘na Loi tĭng xối tơbâ Pơtáu Hùng ƀă mâu tơmeăm ôm hyô  rơté ƀă túa lĕm tro Đất Tổ.

Malối, hơnăm kố kong pơlê Phú Thọ pơtối mơhnhôk thế mâu rơpŏng hngêi tung kong pơlê hbrâ rơnáu xêh tơmeăm hmê kâ têk pleăng, thế rak tơniăn, tơtô vâ tơbâ hnoăng hiăng ‘no ki kân dêi jâ pôa pin roh nah tung hâi leh mơdĭng lơ 10/3 âm lịch.  

Hâi Xối tơbâ Pơtáu Hùng hlâ lơ 10 khế Pái âm lĭch rêm hơnăm hiăng chiâng tíu tơhrâ troh dêi tuăn mơno loi tĭng dêi rêm ngế kuăn pơlê tơnêi têa Việt Nam, ai pơxúa hên túa lĕm tro ton nah ‘na tơdroăng pâ nhoăm tơnêi têa, mơhno hiâm mơno mơnê khât kơ Khu Pơtáu Hùng  ƀă mâu jâ pôa pin mâu ngế ki rơkê hiăng ai hnoăng mơjiâng tơnêi têa ƀă rak vế tơnêi têa; hlối ‘mâi mơnhông ki tơrŭm môi tuăn dêi rơpó tâi tâng mâu hdroâng mơngế Việt Nam tung tơdroăng mơjiâng ƀă kring vế Tơnêi têa.