Tíu pêi cheăng dêi mâu droh rơtăm rơxông nếo kong pơlê Dak Lak rơdâ 3 ha, a bêng Tự An, pơlê kong kơdrâm Ƀuôn Ma Thuột. Tơmeăm khoăng mê ai môi to hngêi, tung mê ai hên tíu pêi cheăng xah hêi 2 râ, pro a tơnêi rơdâ 3.000m2; môi to tíu klê têa ƀă péa troăng to hngêi ti dế, tíu pơ’lêh tu hmân ếo, plông bê tông rơdâ 1.500m2 ƀă ai bo cheăng, kơnâng kâng meăm tiah mơnât kring vế rơtâ tá.

Tơmeăm khoăng mê ai tâi tâng kơxô̆ liăn ‘no mơjiâng pro vâ chê 62 rơtal liăn. Tơmeăm khoăng mê châ mơjiâng pro sap hơnăm 2013 nah ƀă pro klêi a hơnăm 2017. La tơmeăm khoăng ki mơjiâng pro chât rơtal liăn mê hiăng tro lôi chúa xap ing mê nah ta troh nôkố. Pôa Võ Đình Thận, ngế pêi cheăng dêí tíu xiâm mê ăm ‘nâi:

“Á pêi cheăng a kố hiăng 5 hơnăm, hlo to ton đoân viên ai hôp 1-2 hdrôh mê ‘lo. Sap hâi á ối ôh tá ai on tơhrik, ôh tá ai têa, thế lăm hnêng têa kuăn pơlê vâ xúa ôu kâ. Tơmeăm khoăng mơjiâng pro hiăng tơ ‘nhiê, hngêi xi kơchoh a râ má 2, peăng ‘na ngiâ khía pê hiăng tơtêa kuâ’’.

Tơmeăm khoăng châ mơjiâng pro a tơnêi kân rơdâ ki hiăng lôi chúa, mê kuăn pơlê xúa pro tíu têng dêi tơmeăm ƀă pro ‘núa kơ’nêi ro. Nâ Nguyễn Thị Thanh Mai, hngêi ki achê Tíu xiâm pêi cheăng dêi mâu droh rơtăm rơxông nếo kong pơlê Dak Lak ăm ‘nâi:

“A hlo iâ pêi cheăng, rôh hdrối ai pơreăng COVID-19 mê xuân hlo peăng đoân droh rơtăm troh trâm mâ hơdruê xuâng 1-2 hdrôh, klêi ai pơreăng á ôh pá hlo xếo . Klêi mê lôi chúa, tâng ôh mâu kuăn pơlê kơ’nêi dêi kơpôu, ro tung mê; tơmeăm têng to ton hlo kuăn pơlê lăm têng amê’’.

Nâ H’Giang Niê, Kăn hnê ngăn Đoân Droh rơtăm kong pơlê Dak Lak tối, Tíu xiâm pêi cheăng dêi mâu droh rơtăm kong pơlê Dak Lak vâ tối oh tá pêi cheăng tung plâ 5 hơnăm hdrối. Nôkố hên mâu tơmeăm khoăng rế vâ tơ’nhiê ó. Ki xiâm cho xúa luât pơkâ, ôh tá mơjiâng khu kăn pơkuâ. Khu pơkuâ ngăn Đoân Droh rơtăm dế kal ai 18 ƀiên chê̆ pêi cheăng, tung pơla mê pơkâ nố xuân ôh tá ăm mơjiâng nếo tíu pêi cheăng.

Pakĭng mê, drêng tơmeăm khoăng hiăng pêi klêi a hơnăm 2017 mê mâu troăng kân tung kơpong kố hâi pro klêi. Nâ H’Giang Niê ăm ‘nâi, Khu pơkuâ ngăn Đoân Droh rơtăm hiăng chêh hlá mơ-éa pơtroh pâ thế Vi ƀan kong pơlê Dak Lak tơ’nôm kơxô̆ liăn ‘mâi rơnêu pro mâu tíu ki hiăng tơ‘nhiê; hlối xoăng mơngế pêi cheăng mơjiâng khu pêi cheăng pơkuâ ngăn pêi cheăng a tíu kố; tơrŭm ƀă khu grup, mâu kăn kong pơlê rơtế veăng vâ djâ tíu xiâm pêi cheăng.

“Ngin hiăng hnê mơhno khu pơkuâ ngăn Đoân Droh rơtăm pơlê kong kơdrâm Ƀuôn Ma Thuột rơtế ‘no ivá pêi cheăng ƀă mâu đoân viên droh rơtăm Kong pơlê pêi mâu tơdroăng cheăng dêi droh rơtăm vâ tơniăn lĕm ăm mơnâ mâ tíu pêi cheăng mê. Tơrŭm ƀă Vi ƀan bêng Tự An  hnê tối, mơhnhôk mâu rơpŏng kuăn pơlê pôi tá kơ’nêi kơpôu ro, pôi tá têng tơmeăm a plông mê.

Pakĭng mê, Khu pơkuâ ngăn Đoân Droh rơtăm kong pơlê xuân hnê tối ăm mâu rơpŏng kuăn pơlê ki ối rơtâ tá hnê tối tá ăm dêi kuăn ‘nĕng mot tung kơpong long klê têa vâ ví trâm tơdroăng xiá vâ.