VOV4.Xơ Đăng - Kơxê lơ 21/8, tơdroăng ăm ‘nâi ing Khu xiâm pơkuâ ngăn Mố đô̆i gak tơkăng kong dêi kong pơlê Kon Tum ăm ‘nâi mâu mố đô̆i dêi đông tơrŭm ƀă Mố đô̆i gak tơkăng kong Tây Ninh hiăng tơkŭm châ tŏng kum môi ngế kơdrâi 16 hơnăm a cheăm Đăk Xú, tơring Ngọc Hồi, kong pơlê Kon Tum tro vâi hêak pơloi tê kê̆n kong têa Kul, mâu khu ‘mêi tơhrâ ƀă gá lăm pêi cheăng pro kŏng nhân tơdroăng cheăng pêi ôh tá hngăm la liăn khế kâ hên.

Y Liên châ tŏng kum djâ vêh a Việt Nam ing bo cheăng tê mơdró tơkăng kong Mộc Bài, Tây Ninh

Tơdroăng ki mê apoăng Y Liên tối ăm mâu khu lêng mố đô̆i gak tơkăng kong   ngế ki mê Lê Ngọc Nhất hmâ tung măng xah hô̆i Facebook tê ngế kơdrâi ăm kŏng ti apoăng ƀă yă 1.800 dollars, klêi mê Y Liên pơtối tro vâi tê ăm kŏng ti ki ê nếo. Xua tơdroăng cheăng pêi tơbrêi tơbrêk thế pêi hên ôh tá kâi, Y Liên pâ pơtê cheăng vâ vêh a Việt Nam la kŏng ti thế gá khŏm nâp 3.500 rơtuh dollars tâng ôh thế gá tăng lông 4-5 ngế ki ê nếo mot cheăng ăm kŏng ti mê nếo châ prếo vêh dêi a tơnêi têa.

Mơhúa Y Liên châ mâu lêng Mố đô̆i gâk tơkăng kong Kon Tum ƀă Tây Ninh tơrŭm tŏng kum gá. Klêi châ tŏng kum, kơxê lơ 20/8/2022, Y Liên hiăng châ mâu mố đô̆i gak tơkăng kong Kon Tum ƀă Tây Ninh djâ vêh a Việt Nam ing bo cheăng Tê mơdró tơkăng kong Mộc Bài, Tây Ninh bă hlối vêh dêi a Kon Tum vêh ối ƀă dêi nôu pâ.

Gương tơplôu ƀă tơbleăng