Hneăng hôp châ tơdjêp mơ'no tơdrêng tiô troăng hyôh măng ing cheăm Phú Thiện troh mâu cheăm, bêng: Ayun Pa, Ia Rbol, Ia Sao, Pờ Tó, Ia Pa, Ia Tul, Phú Túc, Ia Dreh, Ia Rsai, Uar, pro pro tơ'lêi hlâu vâ kơdrâm kuăn pơlê veăng, tối tơbleăng hiâm mơno, tơdroăng púi vâ ƀă pâ thế troh Kuô̆k hô̆i, mâu kơ koan Tíu xiâm tơnêi têa ƀă kong pơlê. Kuăn pơlê mâu cheăm, bêng hiăng tối hên tơdroăng 'na tơdroăng rêh ối: tơdroăng 'mâi rơnêu, tŏng kum tơmeăm khoăng klêi kơ'nâi kong prâi pro ôh tá tơniăn, 'mâi rơnêu troăng prôk pơla cheăm, 'mâi rơnêu mâu tíu chuâ têa krúa, tơdroăng tŏng kum ăm mơngế pêi cheăng pơtê tiô pơkâ 178.

Pakĭng mâu tơdroăng rêh ối, kuăn pơlê xuân tối tô tuăn 'na tơdroăng rah xo bro lế lĕm tíu pêi cheăng tơnêi têa. Tơmâng xo rơkong tơpui tối dêi kuăn pơlê, pôa Nguyễn Hồng Diên, Phŏ kăn xiâm hnê ngăn Kuô̆k hô̆i tối nhên, Tíu xiâm ôh tá ai troăng hơlâ pơtối tơ'mot chiâng môi râ kong pơlê, râ cheăm. Ngăn tiô kơ tơdroăng kal vâ dêi tơrêm kong pơlê kô séa ngăn tơdroăng rah xo bro lế lĕm tro râ cheăm ăm tơtro, châ tơƀrê tâ.