Drêng tơbâ 92 hơnăm Hâi mơjiâng Khu ngăn vâi kơdrâi Việt Nam, kong măng lơ 18/10, a Hà Nội, Khu ngăn vâi kơdrâi Việt Nam tơkŭm po Tơdroăng ngê̆ thuât “Ki lĕm dêi ếo xŏn Việt”. Troh veăng a rôh po tơdroăng kố ai jâ Đặng Thị Ngọc Thịnh, kăn xiâm phŏ hnê ngăn tơnêi têa hneăng hdrối. A rôh po tơdroăng, mâu ngê̆ sih, diễn viên Hngêi pro pơro Việt Nam tơrŭm mơđah tơbleăng mâu ếo xŏn dêi ngế ki kơchuâ pơchoh Đỗ Trịnh Hoài Nam ƀă mâu Khu ki kơchuâ pơchoh ếo xŏn kơdrâi tiô 3 inâi: “Xiâm kối – Hà Nội nah; Ki lĕm ƀă Tơrŭm”.

Po mơđah mâu ếo xŏn a rôh po tơdroăng

Kố cho tơdroăng ki tơkŭm mâu tơdrá bro pơro ki hơniâp ro pơ-ô pơ-eăng um méa vâi kơdrâi Việt Nam ƀă mâu rôh mơđah tơbleăng ếo xŏn ki bro lĕm tơdroăng hâk vâ ƀă ếo xŏn. Tơdroăng ngê̆ thuât kố cho vâ mơnhông tơdroăng hâk vâ, tơdroăng hâk tơngăm ƀă hnoăng cheăng rak vế, mơdêk ki kơnía dêi ếo xŏn ƀă mơđah tơbleăng ếo xŏn, kuăn mơngế Việt Nam ƀă hên hĕn kuăn pơlê ƀă mâu vâi pú kong têa ê.

Hâi lơ 18/10, Khu pơkuâ vâi kơdrâi kong pơlê Kon Tum tơkŭm po tơdroăng kal ƀă mâu tơdroăng ki kơnía drêng troh leh tơbâ 92 hơnăm Hâi vâi kơdrâi Việt Nam. Ki má lối cho Tơdroăng “Nôu râng ko – Tơdjêp tuăn pâ; Tơpui tơno tơdâng tơ’mô pơla kơnốu - kơdrâi; Hâi vâi kơdrâi pơxiâm tăng cheăng pêi hơnăm 2022 ƀă Mơgêi roh tơ’noăng ‘’Mơjiâng mơngế Vâi kơdrâi Việt Nam tung rơxông nếo’’.

Kăn hnê ngăn Khu pơkuâ vâi kơdrâi kong pơlê Kon Tum diâp kơxuô tơmeăm ăm nôu râng ko ƀă vâi hdrêng kuăn tê

Krê tơdroăng “Nôu râng ko – Tơdjêp tuăn pâ”, mâu khu râ mơhnhôk mơngế pêi cheăng tơdjuôm ivá kum vâi hdrêng kuăn tê ai tơdroăng rêh ối pá puât ƀă   tâi tâng kơxô̆ liăn lối 2 rơtal liăn. Roh kố Khu pơkuâ vâi kơdrâi kong pơlê Kon Tum diâp pri ăm 10/23 troăng tơmiât pơxiâm tê mơdró ƀă pơxiâm tăng cheăng pêi hneăng hơnăm 2021 – 2025; tơkêa tŏng kum 22 troăng tơmiât pêi rơkê dêi nâ vâi kơdrâi ing kơxô̆ liăn mung kơjo dêi Hngêi arak liăn kum Rêh ối pơlê pơla ƀă tâi tâng kơxô̆ liăn lối 5 rơtal liăn.