VOV4.Xơ Đăng - Pơla hdrối kố nah, a Hà Nội, Khu pơkuâ hnê ngăn xiâm Đảng Kŏng san Việt Nam, Kuô̆k hô̆i, Kăn hnê ngăn tơnêi têa, Chin phuh, Vi ƀan xiâm Măt trâ̆n Tơnêi têa Việt Nam hiăng tơkŭm po kân krip Leh koh tơbâ 60 hơnăm Hâi tơrŭm tơpui kâ ƀă 45 hơnăm Hâi kĭ tơkêa Pro Nhŏng o, tơrŭm Việt Nam ƀă Lếo. A chôu phut leh kân krip kố, pôa Nguyễn Phú Trọng, Kăn xiâm pơkuâ hnê ngăn Đảng tơnêi têa pin pá môi hdroh nếo vêh mơnhên tối, ôh tá pơtê tơdroăng ki pơtối tơbêng tơrŭm cheăng kân kĕng, tơrŭm krá tơniăn ƀă tơrŭm rêm kơvâ cheăng pơla Việt Nam ƀă Lếo.

Hơ’muăn tối mâu tơdroăng tơbâ ‘na tơrŭm tơroâ kơnía git pơla Đảng, Tơnêi têa ƀă kuăn pơlê 2 tơnêi têa Việt Nam – Lếo, pôa Nguyễn Phú Trọng, kăn xiâm pơkuâ hnê ngăn cheăng Đảng tối nhên, xua tơdroăng pơkuâ dêi Đảng Kŏng san Việt Nam ƀă Đảng Nhân yân Kăch măng Lếo, kuăn pơlê péa tơnêi têa hiăng rơtế tơrŭm dêi rơpó sap ing mâu hâi ki apoăng ai hên tơdroăng ki pơloăng mơnúa, pá puât rak vế ƀă mơjiâng Tơnêi têa xah hô̆i chuh ngiah a rêm to kong têa.

Péa Đảng, péa tơnêi têa hiăng tŏng kum dêi rơpó rế hía rế ‘mâi mơnhông cheăng kâ rêh ối pơlê pơla klêi kơ’nâi tơplâ, tơdrêng amê rế hía rế mơjiâng ƀă mơnhông tơrŭm cheăng tung mâu kơvâ cheăng ki xiâm môi tiah cheăng kâ, mơhno túa lĕm tro, rêh ối pơlê pơla, hnê hriâm hnê cheăng pêi, gak kring cheăng lêng ƀă tơpui kâ.

Pôa Nguyễn Phú Trọng, kăn xiâm pơkuâ hnê ngăn Đảng tơpui a rôh leh

Pôa Nguyễn Phú Trọng, Kăn xiâm pơkuâ ngăn Đảng tối nhên, xua troăng bâ eăng mơhno troăng dêi Troăng hơlâ Mác – Lênin, hiâm mơno Hồ Chí Minh a Việt Nam ƀă hiâm mơno tơmiât Cay-xỏn Phôm-vi-hản a Lếo, péa Đảng, péa Tơnêi têa pơtối tơrŭm dêi rơpó, rơtế dêi rơpó tung mâu tơdroăng cheăng hơ’lêh nếo, rơtế pêi klêi mâu tơdroăng ki kân kĭn tung mơnhông mơdêk cheăng kâ rêh ối pơlê pơla, rak vế krá tơniăn tơdroăng kal kí, gak kring, tơniăn tung pơlê pơla, pro pơxúa tơdroăng rêh ối rế hía rế phâi tơtô ƀă tơniăn lĕm ăm kuăn pơlê rêm tơnêi têa.

”Hvái ngăn mâu tơdroăng tung roh ton nah khên tơnôu ki péa hdroâng mơngế hiăng rơtế ƀă dêi rơpó tơkâ luâ, pin chiâng vâ hâk tơngăm ‘na tơrŭm cheăng krá rơdêi, gá tơdrăng lĕm, môi hiâm mơno ƀă dêi rơpó pơla péa Đảng, péa Tơnêi têa ƀă Kuăn pơlê péa tơnêi têa Việt Nam ƀă Lếo. Tơrŭm cheăng ki tơviah pơla Việt Nam – Lếo hiăng châ mâu kăn xiâm pơkuâ cho Hồ Chí Minh, Kăn xiâm hnê ngăn tơnêi têa Lếo pôa Cay-xỏn Phôm-vi-hản ƀă Kăn xiâm hnê ngăn Xu-pha-nu-vông pơkâ tơdroăng ki kal; mơ’no hên ivá mơjiâng, rak vế, tơbêng ƀă têa kơxôu, ivá ƀă tá mơheăm chhá dêi mâu rơxông khu lêng ƀă kuăn pơlê péa tơnêi têa; hiăng chiâng kế tơmeăm kơnía git khât, tơrŭm cheăng ôh tá ai má péa sap ing nah tung lâp plâi tơnêi”.

Tiô pôa Nguyễn Phú Trọng, kăn xiâm pơkuâ hnê ngăn Đảng, péa tơnêi têa Việt Nam ƀă Lếo pơtối mơdêk krá tơniăn, rế hía rế mot trâu hơngế ƀă tơƀrê, ki xiâm cho tơrŭm cheăng kal kí ôh tá la lâi pơtê ‘mâi mơnhông ƀă mơdêk, sap ing “tơrŭm tơroâ khôi hmâ” chiâng “tơrŭm tơrôa kân kĭn” sap ing khế 2/2019, rế hía rế chiâng loi tơngah achê, pơtối tŏng kum pơkâ troăng prôk ăm mâu kơvâ cheăng tơrŭm cheăng ki ê; Tơrŭm cheăng ‘na lêng – gak kring pơtối cho môi tung mâu tơdroăng cheăng xiâm kal má môi tung tơrŭm cheăng pơla péa tơnêi têa.

Tơrŭm cheăng kâ pơtối châ tơmâng mơdêk ƀă hiăng châ hên tơdroăng ki tơƀrê, pro ai pơxúa kal khât ăm kuăn pơlê ƀă khu mơdró kâ péa tơnêi têa; Tơrŭm ‘na hnê hriâm ƀă hnê cheăng pêi kơvâ tơrŭm cheăng la ngiâ pơla péa tơnêi têa, xuân môi tiah tơrŭm mơhno túa lĕm tro, khăm pơlât, troăng prôk ƀă rơxế kơtâu, on tơhrik rế hía rế châ ‘mâi mơnhông ƀă mơdêk rơdêi. Tơrŭm cheăng pơla mâu kong pơlê, malối cho pơla mâu kong pơlê ki tơkoh tíu tơkăng kong péa tơnêi têa rế hía rế chiâng tơrŭm krá ƀă dêi rơpó.

Pôa Bounthong Chitmany, ngế cheăng tung tíu xiâm kal kí, kăn xiâm phŏ hnê ngăn tơnêi têa Kŏng hoà Yân chuh Nhân yân Lếo tơpui

Pôa Nguyễn Phú Trọng, kăn xiâm pơkuâ ngăn Đảng xuân tối tiah kố, tung pơla mâu kong têa tung lâp plâi tơnêi ƀă tung kơpong dế ai mâu tơdroăng ki pơ’lêh rĕng, ôh tá tơniăn ƀă ôh tá ‘nâi hdrối; kuăn mơngế dế trâm ƀă hên tơdroăng ki pơloăng mơnúa kân môi tiah tơplâ, tơxul tơxal, tơxup tơbriât pơla mâu kong têa ki kân, mâu tơdroăng gâk kring khôi hmâ môi pơreăng tâ tú, ôh tá bê on tơhrik, kế kâ; péa Đảng, péa Tơnêi têa ƀă kuăn pơlê péa tơnêi têa rế kal athế tơrŭm, mơdêk tơrŭm cheăng hên tâ nếo vâ rơtế ƀă dêi rơpó tơkâ luâ mâu tơdroăng xơpá, pơtối mơ-eăm pêi pro tơniăn krê hdroâng mơngế ƀă chuh ngiah xah hô̆i; rơtế ƀă dêi rơpó pêi tâi ivá tơná vâ rak vế ƀă ôh tá la lâi pơtê tơbêng ăm tơrŭm cheăng khên tơnôu, tơrŭm tung tâi tâng Việt Nam – Lếo.

“Đảng, Tơnêi têa ƀă Kuăn pơlê Việt Nam đi đo môi tuăn rơdêi, tâi tâng tung hnoăng cheăng hơ’lêh nếo dêi Lếo; tơdrêng amê hlối mơ’no tâi ivá ngăn nhuô̆m ƀă kơjo kum ăm tơrŭm cheăng rế cho pú hmâ, rế cho nhŏng o pơla péa Đảng, péa Tơnêi têa pin. Ngin đi đo rơhêng vâ tơrŭm, tŏng kum tơnêi têa Lếo ƀă hiâm mơno “kum pú cho kum tơná”, ngăn kố cho hnoăng cheăng tung la ngiâ; rơhêng vâ rơtế ƀă Đảng, Tơnêi têa ƀă Kuăn pơlê Lếo ôh tá la lâi pơtê tơbêng tơdroăng ki loi tơngah ‘na kal kí, mơdêk tơrŭm gâk kring, mơdêk tơrŭm cheăng pơla péa tơnêi têa cheăng kâ, ôh tá la lâi pơtê mơdêk ki rơkê plĕng tung hnê hriâm ƀă hnê mơjiâng, rơtế ƀă dêi rơpó mơjiâng tơnêi têa tơniăn krê, mot tơrŭm cheăng trâu hơngế ; rơtế mơ-eăm vâ mâu tơdroăng tơrŭm cheăng rế hía rế tơxâng ƀă ivá dêi tơrŭm cheăng pơla Việt Nam – Lếo”.

Tơpui a rôh leh, pôa Chít-mạ-ni, Ngế cheăng tung tíu xiâm kal kí, kăn pơkuâ ngăn Tíu xiâm Đảng Nhân yân Kăch măng Lếo, kăn phŏ hnê ngăn tơnêi têa Kŏng hòa Yân chuh Nhân yân Lếo tối nhên, Đảng, Tơnêi têa ƀă kuăn pơlê Lếo chôu vế khât ƀă mơnê kơ Pôa Hồ Chí Minh khên tơnôu, kăn xiâm hnê ngăn tơnêi têa Kay-sỏn Phôm-vi-hản ƀă Kăn xiâm hnê ngăn Xu-pha-nu-vông pâ nhuô̆m cho ngế ki mơjiâng ƀă djâ troăng bâ eăng pơla péa tơnêi têa Việt Nam – Lếo chiâng kế tơmeăm tơdjuôm ki kơnía git, cho tơdroăng ki ôh tá chiâng tâi ƀă mơnhông dêi péa tơnêi têa, cho môi tơdroăng pơkâ ki ƀlêi trâng dêi kăch măng rêm tơnêi têa.

“Đảng, Tơnêi têa ƀă kuăn pơlê Lếo ngin đi đo ngăn hnoăng cheăng kố cho hnoăng dêi tơná tung tơdroăng mơdêk khôi hmâ tơrŭm cheăng khên tơnôu, tơrŭm cheăng tung tâi tâng pơla Lếo – Việt Nam châ tơkâ luâ hên hĭn mâu tơdroăng pơloăng mơnúa ƀă mơ-eăm tơbêng ƀă têa kơxôu mơheăm chhá dêi mâu lêng khên tơnôu xuân môi tiah kuăn pơlê Lếo ƀă kuăn pơlê Việt Nam tung mâu rơxông vâ di đo u ối; pro pơxúa kal khât ăm kuăn pơlê péa tơnêi têa, vâ tơxâng ƀă tơdroăng pơla ki ôh tá la lâi kâi hía dêi pôa Kay-sỏn Phôm-vi-hản, kăn xiâm hnê ngăn tơnêi têa: “Ngo chiâng hê têa kroăng chiâng xiâ, la tơrŭm tơroâ pơla Lếo – Việt Nam đi đo krá tơniăn tâ ngo, tâ kroăng”.

Ƀă môi tiah câu thơ dêi Pôa Hồ Chí Minh

“Hâk vâ dêi rơpó to lâi to ngo xuân hếo

To lâi têa kroăng xuân tơkâ, to lâi to văng xuân luâ

Việt Nam – Lếo péa tơnêi têa pin

Tơrŭm trâu hơngế têa kroăng Hồng Hà – Cửu Long”.

VOV 1

Katarina Nga tơplôu ƀă tơbleăng