Kơxê lơ 13/6, a tíu pêi cheăng Chin phuh, pôa Trần Hồng Hà, Ngế pro xiâm phŏ hnê ngăn tơnêi têa pơkuâ po rôh hôp pơkâ hnoăng cheăng ‘mâi rơnêu Túa pơkâ tơdjuôm Pơlê kong xiâm Hà Nội troh hơnăm 2045, troăng pêi troh hơnăm 2065. Ngế pro xiâm phŏ hnê ngăn tơnêi têa pơkâ thế Hà Nội rĕng tơbleăng hnoăng cheăng ‘mâi rơnêu Túa pơkâ tơdjuôm pơlê kong xiâm.

Tung mê, Pơkâ athế tơmâng ngăn khât troh tơnêi tơníu ƀă hngêi trăng, troăng klông. Tơdroăng pơkâ dêi Túa pơkâ cho mơnhông Hà Nội chiâng kơphô̆ ki rơkê plĕng tiô chal nôkố, pơkuâ djâ ƀă bro ivá tơdjâk, tơrŭm kơpong kơphô̆, chiâng tíu xiâm, ivá mơdêk mơnhông kơpong tơbăng kroăng Hồng, kơpong cheăng kâ ki xiâm Bắc bộ ƀă lâp tơnêi.

Hà Nội kô mơdêk mơnhông mâu kơphô̆ vệ tinh, pơlê kong kân ối tung tơnêi têa; pơkuâ ngăn krá tơniăn tơdroăng ki bro hngêi ối xŏn râ a kơpong tíu xiâm; tơbleăng tơdâng tơ’mô mâu tơdroăng hơ’lêh, ‘mâi rơnêu, veh bro kơphô̆; mơjiâng tơnêi tơníu kơphô̆; mơjiâng kơpong thôn pơlê tơtro ƀă kơphô̆, rak vế khôi túa lĕm tro tiô khôi hmâ, rak vế kong prâi tơnêi tơníu, bro ivá krá tơniăn ton.