Kố cho Tơdroăng châ tơkŭm tro má môi sap ing 4 tơdroăng pơkâ Tơnêi têa hdrối nah chiâng môi tơdroăng tơdâng tơ'mô, mê cho: Mơjiâng thôn pơlê nếo, kơdroh kơtiê krá tơniăn, mơnhông cheăng kâ - rêh ối pơlê pơla kơpong hdroâng kuăn ngo ƀă kong ngo; Mơnhông mơhno túa lĕm tro; Mơnhông mơdêk tiô túa nếo, mơdêk ki dâi lĕm hnê hriâm ƀă hnê mơjiâng tuăn ngôa rơkê; Rak ngăn ivá, pơ'leăng mâ mơngế ƀă mơnhông mơdêk.

Tâi tâng kơxô̆ liăn pêi pơla hơnăm 2026-2030 cho vâ chê 880.000 rơtal liăn (tung mê liăn ngân Tơnêi têa 345.000 rơtal liăn); kơjo má môi ăm mâu kơpong xơpá. Kơxô̆ liăn dêi tơdroăng tơkêa bro tơkŭm tro pơkâ 'no liăn ăm kuăn pơlê châ pơxúa, khŏm ôh tá xúa vâ mơhá liăn khế lơ tơdroăng pêi cheăng đi đo dêi kơ koan cheăng. Tíu xiâm pơcháu hnoăng ăm râ cheăm rak ngăn mâu tơdroăng tơkêa ki kŭn, kih thuât pêi tơ’lêi hlâu. Mâu tơdroăng tơkêa bro pá kơdâm 500 rơtuh liăn kô chiâng pơcháu tơdrêng ăm kuăn pơlê pêi pro.

A hneăng hôp, pôa Lê Minh Hưng, Ngế pro xiâm hnê ngăn tơnêi têa pơkâ thế tơkŭm mâu tơdroăng pơkâ dêi tơnêi têa thế pro pơhlêh tơƀrê tung pơkuâ, kơdroh tíu xiâm, kơdroh pro mơ-éa ƀă 'mâi rơnêu tơdroăng ki tơvâ tơvân; mơdêk tơƀrê xúa mâu kơxô̆ liăn; tơkŭm liăn tơnêi têa vâ ‘no pêi tơdroăng kal. Ngế pro xiâm hnê ngăn tơnêi têa  pơcháu ăm Kăn hnê ngăn Vi ƀan mâu kong pơlê, pơlê kong kân lăm pêi cheăng tơdrêng pro Kăn hnê ngăn Hnê mơnho râ kong pơlê ƀă pê klêi tơdroăng cheăng dêi tơnêi têa hdrối hâi lơ 25/10 la ngiâ. Mâu kong pơlê thế tơkŭm mơ'no liăn cheăng klêi dâng 12.000 rơtal liăn kơxô̆ liăn pơ'lêh sap ing hneăng hơnăm 2021 - 2025 troh hơnăm kố.