VOV4.Xơ Đăng - Kơxo lơ 29/7, Khu hnê mơhno cheăng xiâm tơnêi têa mâu tơdroăng pơkâ dêi tơnêi têa pơla hơnăm 2021-2025 tơkŭm po Hneăng hôp mơ’no tơdrêng  tung troăng hyôh Internet ƀă mâu kong pơlê pơla hơnăm 2021-2025 tơkŭm po hneăng hôp mơ’no tơdrêng ƀă mâu kong pơlê tối ‘na ki tơ-brê dêi tơdroăng pêi pro tiô pơkâ tơnêi têa 6 khế apoăng hơnăm 2022; tơbleăng mâu tơdroăng cheăng pêi, troăng rơhlâ 6 khế mơ’nui hơnăm 2022.

Pôa Phạm Bình Minh, Ngế pro xiâm phŏ hnê ngăn tơnêi têa, Ngế pơkuâ hnê mơhno Tíu xiâm tơnêi têa mâu tơdroăng pơkâ dêi tơnêi têa pơla hơnăm 2021-2025 pơkuâ hneăng. A hneăng hôp, mâu kăn xiâm, kơvâ cheăng ƀă mâu kong pơlê hiăng tối tơbleăng, tối nhên mâu tơdroăng ki xơpá, tơvâ tơvân; tơkŭm tơpui, tối mâu tơdroăng vâ tơkâ luâ xơpá ki hâi pêi pro tung hơnăm hdrối nah, vâ rĕng pêi châ tơ-brê mâu tơdroăng pơkâ tơnêi têa 6 khế mơ’nui hơnăm 2022.

Pôa Phạm Bình Minh, Ngế pro xiâm phŏ hnê ngăn Chin phuh tối pơchân, mâu khu xiâm, kơvâ cheăng thâ pơkâ mâu hlá mơ-éa hnê tiô hnoăng pơkâ mâu kăn vâ mâu kong pơlê ‘nâi xiâm ki vâ tơbleăng pêi; mâu kong pơlê, pơlê kong kân hnê mơhno pêi kơtăng, tơbleăng pêi tơ-brê 3 tơdroăng pơkâ tơnêi têa, mơ-eăm troh mơ’nui hơnăm hiăng pro klêi hlá mơ-éa vâ châ xo ngân tơnêi têa ki xing xoăng ăm tung hơnăm 2022.

Gương tơplôu ƀă tơbleăng