Kơxê măng lơ 27/12, a Hngêi Kuô̆k hô̆i, Ƀơrô cheăng Kuô̆k hô̆i pơkuâ po rôh tơkŭm Leh tơbleăng Pri Hlá tơbeăng lâp tơnêi têa ‘na Kuô̆k hô̆i ƀă Hô̆i đong hnê ngăn kuăn pơlê (pri Diên Hồng) rôh má môi. Tơdroăng ki tơkŭm po Pri hlá tơbeăng kô veăng kum bro ivá vâ mơdêk ki rơkê, tơƀrê tung hnoăng cheăng tối tơbleăng tơdroăng kal, hnê tối ‘na tơdroăng cheăng dêi Kuô̆k hô̆i ƀă Hô̆i đong hnê ngăn kuăn pơlê; veăng kum mơdêk ki rơkê ƀă kơxô̆ mâu ƀai chêh hlá tơbeăng ‘na Kuô̆k hô̆i ƀă Hô̆i đong hnê ngăn kuăn pơlê.

Pôa Trần Thanh Mẫn, Kăn xiâm phŏ hnê ngăn Kuô̆k hô̆i rơhêng vâ tiah kố, mâu khu chêh hlá tơbeăng, mâu ngế ki rah chêh pơtối mơdêk dêi hiâm mơno pôu râng tơdroăng cheăng, hriâm pât ivá khên tơnôu kal kí, mơdêk tơdroăng ki rơkê, hiâm mơno rêh ối lĕm tung tơdroăng cheăng, đi đo pêi pro kơtăng tiô troăng hơlâ pơkâ dêi Đảng, luât dêi Tơnêi têa; teăm tơbleăng rĕng , tro ƀă ai mâu tơdroăng pêi pro trâu hngế ‘na tíu pêi cheăng, hnoăng cheăng, ivá, tơdroăng cheăng dêi Kuô̆k hô̆i, Vi ƀan pơkuâ Kuô̆k hô̆i, Hô̆i đong hdroâng kuăn ngo, mâu Vi ƀan dêi Kuô̆k hô̆i, Khu kăn Kuô̆k hô̆i ƀă Hô̆i đong hnê ngăn kuăn pơlê.