Kơmăng hâi lơ 9/7, a Hngêi hơdruê xuăng Pơlê kong kân Hồ Chí Minh hiăng po Tơdroăng mơđah Hơdruê xuăng tơbâ kơ pôa Lê Duẩn - Kăn xiâm pơkuâ hnê ngăn Đảng hneăng hdrối xua Khu hơdruê xuâng Kuân khu 7 tơrŭm ƀă Hngêi  hơdruê xuăng Kuăn ngo Bông sen tơkŭm po drêng troh tơbâ 37 hơnăm Hâi pôa Lê Duẩn hlâ hâi lơ (10/7/1986 - 10/7/2023). Pôa Võ Văn Thưởng, Kăn xiâm hnê ngăn tơnêi têa veăng leh tơbâ.

Tơdroăng mơđah hơdruê xuăng xuân cho rôh vâ mâu rơxông nôkố pâ troh hlối mơnê kơ môi ngế kăn xiâm hnê ngăn Đảng ki rơkê, kum pin hlê tơ’nôm ‘na tơdroăng rêh ối, pêi cheăng kăch măng dêi pôa Lê Duẩn, Kăn xiâm hnê ngăn Đảng hneăng hdrối nah, malối tơdroăng hơ-ui pâ kuăn pơlê peăng Hdroh, pơlê xiâm Quảng Trị dêi pôa Lê Duẩn.

Plâ tơdroăng mơđah, ƀăng rơkong tơpui tơbleăng ƀă tơdroăng rơhdruê xuăng, tung pơla rêh ối pêi cheăng Kăch măng dêi pôa Lê Duẩn mơhno ki khên tơnôu, ki lĕm. Sap mâu khế hơnăm pôa ối a pơlê xiâm tơná troh mâu khế hơnăm mot cheăng Kăch măng a tơnêi peăng Hdroh tơnêi têa drêng pôa cho Kăn hnê ngăn khu Đảng, klêi mê, troh Rôh lăm plâ Hồ Chí Minh nah... xuân châ tơbâ krip ing tơdroăng pro pơro hơdruê xuăng.