Troh a go pơlê Canh Tiến, cheăm Canh Vinh, kong pơlê Gia Lai, rơkong hơdruê mâu vâi o ro tơniâ ing hngêi trung mầm non hiăng chuât xơtó troh tơdế kong ngo. Tung lâm hriâm ai 32 ngế hok tro, mâu vâi o dế hak ro xuăng tiô idrâp ing um tơvi nếo ai. Idrâp ƀai hơdruê, rơkong vâi o hâk tó, pro chiâng tơdroăng ki hơniâp ro. O Đinh Thị An, 8 hơnăm, phiu ro tối:

“Hdrối nah, á lăm hriâm hâi ai on tơhrik, achê kố lăm hriâm hiăng ai on tơhrik, ai ki pê ăm rơngiâp ƀă ai um tơvi, á hlo hriâm cô hnê rĕng hlê, ai ki pê rơxôh kong tô tâ rơngiâp”.

2 hơnăm hmâ ƀă hngêi trung kơpong hơngế Canh Tiến, cô Nguyễn Thị Mỹ Trinh, 28 hơnăm, nôkố kơdrâ rơrêk tung hiâm mơno hlo mâu tơdroăng pơ’lêh. Xua kơtăn kố hâi teăm ton, tíu kố ối pá puât, troh tơdroăng ngăn vâi hơdruê tung um tơvi ki ai tiê ing hơngế cho tơdroăng hôm ó ‘nâng. Cô Trinh, plâ 2 hơnăm hnê, rêm hâi troh a lâm xuân cho tơdroăng pơloăng mơnúa. Troăng prôk hơngế 20km ing hngêi troh a lâm hếo ngo chu rơnâk, kong mêi trâp hliâk, thế to plong prôk troăng ví ton mơdoh hên chôu. La nôkố, rêm hâi vâ troh a hngêi trung cô tâ ro xua hiăng ai troăng prôk  tơ’lêi hlâu.

“Drêng hiăng ai troăng prôk lêm thái cô prôk tơ’lêi hlâu, hngêi trung hriâm châ sơng ăm lĕm nếo, drêng ai on tơhrik hiăng gum ăm thái cô ƀă hok tro châ ngăn tivi, châ hơdruê ƀă ngăn mâu tơdroăng mơđah ki pơxúa tâ, kum ăm mâu thái cô hmiân tuăn hnê hriâm kơhnâ khât tâ”.

Ôh tá xê to mâu thái cô ing tíu ê troh, hên xông kân a cheăm kơtiê xơpá Canh Tiến xuân rah xo tơdroăng cheăng vêh cheăng dêi a pơlê veăng ‘no hnoăng cheăng mơnhông dêi pơlê. Cô Đinh Thị Trang, 22 hơnăm, nếo klêi hriâm kao đăng sư phăm hiăng nâp đơn pâ hnê a hngêi trung dêi pơlê. Nôkố, kơ’nâi 2 khế pêi cheăng, cho  cô pơkuâ ngăn lâm 2C, hngêi trung râ má péa Canh Tiến, cô Trang ‘nâi nhên ki pơ’lêh dêi tơná, xua mâu tơdroăng hnê hriâm hên luâ tơdroăng tâng vâ pơchông ƀă mâu hơnăm hdrối mê hía nah:

“Tâng pơchông ƀă mâu hơnăm hdrối mê hơnăm kố châ tơmâng khât tâ dêi Vi ƀan kuăn pơlê cheăm, hiăng gum ăm hngêi trung mâu tơmeăm vâ hnê hriâm tŭm ăm hok tro, mâu hok tro xuân tơƀrê tâ ƀă châ xúa mâu tơmeăm hriâm ki nếo tâ ƀă mâu vâi o kô ôh tá kơdrâ môi tiah rôh apoăng. Thái cô kal thế ‘nâi hơ-ui ki pá hlối chông djâ ăm hok tro chôa lâng hvêa prôk ƀă mơdoh hên chôu tơmâng khât vâi o  tâ, hnê inhên tâ vâ vâi hlê hlối kơjo kum tơbâ hnê rêm rôh hriâm vâ ing mê mâu vâi o kô hlê ‘nâi tơmiât rơhêng vâ mơ-eăm tâ “.

Hok tro phiu ro, thái cô thăm rế ro tâ ‘na mâu tơdroăng pơ’lêh a pơlê xiâm Canh Tiến, cheăm Canh Vinh, kong pơlê Gia Lai. La ro tâ tŭm tá nôu pâ hok tro, xua tơmeăm khoăng kal há ’na xah hêi hriâm tâp dêi kuăn ‘nĕng hiăng ai tŭm, vâi kô hmiân tuăn pêi cheăng kâ. Nâ Đinh Thị Yến, ai kuăn hriâm a hngêi trung râ má Môi Canh Tiến, tối:

“Tâng pơchông ƀă hdrối nah nôkố tơmeăm khoăng hiăng tŭm tâ, bo cheăng, kơdrum hngêi trung châ pro kơnâng kâng hlối ai tơvi, thái cô po ăm hok tro ngăn mâu tơdroăng hriâm ƀă vâi o rĕng hlê  hên tâ há. Hlo dêi kuăn hriâm tâng vâ pơchông ƀă hdrối nah nôkố hiăng tơƀrê tâ, kuăn a vêh a hngêi hiăng ‘nâi kơ’nhon xuăng, hơdruê, pơchuât thơ tâng vâ pơchông ƀă hdrối nah hiăng tơƀrê tâ’’.

Tiô pôa Dương Hiệp Hòa, Kăn hnê ngăn Vi ƀan kuăn pơlê cheăm Canh Vinh, cheăm ki ‘no 300 rơtuh liăn ăm péa to hngêi trung mầm non ƀă hngêi trung râ má môi, tâi tâng pro tơ’nôm 5 to lâm hriâm, ai veăng krâm ăm vâi o hok tro mot mơhriâm.

“Ƀă tuăn vâ khât pêi cheăng gum kuăn pơlê mâu thái cô xuân mơ-eăm hnê ton hơnăm a hngêi trung ai tơdroăng hnê hriâm tơniăn tro tiô pơkâ. Hok tro hngêi trung Canh Tiến phiu ro, malối hơnăm hriâm kố nah mâu vâi o rôh apoăng tâ tơná châ leh mot hơnăm hriâm nếo, hdrối nah, vâi ôh tá châ leh, thái cô mơhno hiâm mơno ki hâk vâ khât ƀă tơdroăng hnê xua vâi hlo dêi hok tro ối pá puât mê kal thế gum. La ngiâ kố ah cheăm pâ thế po rơdâ tơ’nôm ‘mâi rơnêu po  nếo, roê tŭm tơmeăm xúa ăm hok tro hriâm vâ ai tiô tơdroăng púi vâ hnê ƀă hriâm”.

A tơdế kong ngo kân rơdâ, mâu lâm hriâm mơ’no on eăng a Canh Tiến hâi kố ôh ti xê to tơdroăng phiu ro dêi vâi o, mê ối cho tơdroăng ki mơ’no ing mơ-eăm ôh tá la lâi pơtê dêi thái cô, dêi mâu kăn cheăm ƀă kuăn pơlê. Canh Tiến xuân môi tiah kơpong xơpá ki ê dêi Gia Lai xuân châ Tơnêi têa ‘no liăn tŏng gum tơdrêng, ai tŭm ivá vâ tơrŭm mơnhông tơdrêng ƀă tơnêi têa tung chal nếo.