Ƀăng klâng Đất Đỏ a cheăm Čuôr Knia, tơring Ƀuôn Đôn rơdâ lối 250ha, kơtăn mâu kơpong kuăn pơlê ối  lối 8km. Kố cho kơpong ki pêt kơphế, tiu, báu klâng dêi lối 40 rơpŏng kuăn pơlê tung cheăm. Vâ mot a kơpong pêi chiâk, kuăn pơlê bú ai 2 tơdroăng pêi pro cho prôk tâ tá troăng Ea Bar lơ prôk tơkâ luâ kong têa krơng Nước Trong. Troăng prôk tâ tá luâ cheăm Ea Bar hơngế luâ péa hdrôh, tâng prôk tơkâ luâ kông cho ôh tá tơniăn. Kố cho kông bê tong châ kuăn pơlê tơlo liăn mơjiâng pro sap hơnăm 2005 nah. ‘Na ngiâ  kông rơdâ 2met, ôh tá ai kơnâng kâng, hiăng hlo hên tíu ki rơheăng, tíu hiăng tơhneăng; mâu trăng hiăng tơvê trâu tê. Bú chiâng prôk pơtân tê, kuăn pơlê xo loăng kân xŏn veăng mơrâng kông. Pôa Nông Ngọc Quyết, môi rơpŏng kuăn pơlê a thôn Ea Kning cheăm Ea Bar, tơring Ƀuôn Đôn ai 1,5ha tơnêi pêi kâ a kố, tối:

“Tung kố tơnêi pêi kâ hên, la troăng prôk pá puât, malối tâng prôk tơkâ luâ kông. Kông ki mê ôh tá kâi trâng tơkâ luâ chơ hngăm, rơ-iô khât’’.

Ƀuôn Đôn cho môi tung 2 tơring tơkăng kong dêi kong pơlê Dak Lak. Tơdroăng rêh ối dêi kuăn pơlê ki hên kơnôm to a pêi chiâk. Hên kơpong pêi chiâk troăng prôk pá puât. Tiô pôa Bùi Văn Vinh - Ngế pơkuâ Ƀơrô Cheăng kâ ‘na mơjiâng tơmeăm khoăng tơring Ƀuôn Đôn tối, klêi tí tăng ngăn lâp tơring ai 12 to kong châ mơjiâng pro ăm kuăn pơlê prôk lăm. 4 hơnăm hdrối, ing kơxô̆ liăn tŏng kum dêi Khu ngăn ngăn troăng prôk Việt Nam, tơring hiăng pro 2 to kông vế krá lĕm a mâu cheăm Ea Huar ƀă Ea Wer, tâi tâng kơxô̆ liăn pro 24 rơtal liăn. 10 to kông  ki u ối kơxô̆ liăn kal  pro dâng 35 rơtal liăn la hâi ăm liăn pro. Pôa Bùi Văn Vinh, ăm ‘nâi:

“Tơring hiăng pâ thế Tíu xiâm, kong pơlê veăng kum liăn mơjiâng pro rêm to kông mê dâng 300-400 rơtuh liăn vâ pro kông lĕm krá, ăm kuăn pơlê prôk lăm pê kâ, chơ tơmeăm tơ’lêi hlâu, hok tro châ tơniăn lăm hriâm tung rơnó mêi têa lân lu’’.

Kong pơlê kô cho kong pơlê kong ngo, tơnêi kân rơdâ ƀă hên têa krông têa kroăng, kong pơlê Dak Lak kal mơjiâng tơ’nôm hên kông ăm kuăn pơlê prôk lăm. Tung pơla hơnăm 2016-2022, ing kơxô̆ liăn veăng kum dêi khu xiâm ngăn troăng prôk Việt Nam ƀă Vi ƀan Kuăn ngo, kong pơlê hiăng mơjiâng pro châ 97 to kông, kơnâ 200 rơtal liăn, a mâu cheăm kơpong I,II ƀă III dêi mâu kơpong hngế hngo. Pôa Lê Công Du - Kăn phŏ pơkuâ ngăn troăng prôk rơxế kơtâu kong pơlê Dak Lak ăm ‘nâi, lâp tung kong pơlê nôkố ối 120 to kông hiăng tơ’nhiê, kal mơjiâng pro nếo, tâi tâng kơxô̆ liăn vâ mơjiâng pro dâng 400 rơtal liăn.

 “Tơdroăng kal vâ liăn mơjiâng pro  hên, tung pơla mê mơngế khu ki ‘no liăn vâ pro dêi kong pơlê ôh tá ai hên, ngin hiăng pơtroh hlá mơ -éa pâ liăn  ing xiâm tơnêi veăng gum ‘no mơjiâng pro troăng ăm kong pơlê Dak Lak rĕng châ mơjiâng pro mâu kong u ối ki hiăng tơ’nhiê. Ing mê kơjo gum kuăn pơlê prôk lăm chơ teăm tơ’lêi hlâu’’.

Prôk tơkâ luâ a mâu kông ki hiăng tơ’nhiê ó, kông prôk pơtân mê ai hên tơdroăng ki rơ-iô tơ’lêi trâm xía vâ, la xua vâ rêh kâ ối kuăn pơlê a kơpong hngế hngo Dak Lak xuân thế prôk tơkâ rêm hâi.