Pôa hiăng pleăng tâi rơxông tơná ăm tơdroăng cheăng tơleăng lĕm hdroâng mơngế, tơleăng lĕm pơlê pơla, khu râ ƀă tơleăng lĕm kuăn mơngế;ăm tơdroăng cheăng tung la ngiâ bâ eăng dêi hdroâng mơngế Việt Nam ƀă kuăn mơngế rơkê plĕng a kong têa ê.

Hlo tơnêi têa ôh tá tơniăn, hlo tơdroăng xâ ‘mêi ki tơbriât pơkuâ tơnêi têa ‘nêk mơ’nêa kuăn pơlê môi tiah mâu têk, tơdroăng pá puât dêi kuăn pơlê ki pêi cheăng, ngế rơtăm pâ nhoăm tơnêi têa cho Nguyễn Tất Thành mơ-eăm trăng troăng lăm pêi cheăng a kong têa ê klêi mê “kô vêh kum kuăn pơlê’’ tung rơxông tơplâ xâ tăng troăng pro tơleăng lĕm, châ tơbiât pơkuâ tơniăn ăm hdroâng mơngế, tơniăn, hơniâp ro ăm kuăn pơlê.

Hơnăm 1941, klêi kơ’nâi 30 hơnăm lăm a kong têa ê tăng troăng vâ tŏng kum tơnêi têa, Pôa Hồ hiăng vêh a pơlê xiâm tơná, trâm Kăn hnê pơkuâ ngăn tơdroăng mơhnhôk cheăng kăch măng, pêi hnoăng cheăng ki kal dêi Đảng pin, tơplâ châ ƀlêi trâng rak tơniăn ăm Tơnêi têa, tơniăn ăm kuăn pơlê. Troh hâi khế tơplâ, Pôa hiăng pơkuâ hnê kăch măng khế Tơheăm plâ  ƀlêi trâng, pro pơ’lêh tơdroăng rêh ối dêi kuăn pơlê Việt Nam, hdroâng mơngế Việt Nam.

Pôa ối cho tơdroăng vâ pơtih dêi tơdroăng púi vâ hơniâp lĕm dêi tơdroăng tơrŭm tơrôa pơla mâu hdroâng kuăn ngo. Phŏ Yăo sư Tiê̆n sih Bùi Đình Phong, Học viện Chính trị Kuô̆k ya Hồ Chí Minh tối:

“Tơdroăng pêi pro dêi Hồ Chí Minh, mâ ngăn dêi Hồ Chí Minh, túa pêi cheăng Hồ Chí Minh, tuăn mơno Hồ Chí Minh ăm hlo: Hồ Chí Minh, xúa túa lĕm tro môi tiah trếo nheăn, kơxái kât tơrŭm mâu hdroâng kuăn ngo, xut tah ki kơtăn hơngế pơla péa pâ. Drêng tá mơngế Pơhlăng, mơngế Mih mot plâ tơbriêt pơkuâ tơnêi têa pin, pôa xuân tối tiah kố: Tâng vâi mot tơbriât pơkuâ thế plâ, mơheăm ki lâi xuân mơheăm, ngế ki lâi xuân mơngế. Pôa mơjo mơngế Việt Nam xuân mơjo mơngế Pơhlăng, mơngế Mih’’.

Mâu tơdroăng tơmiât dêi Pôa ‘na tơdroăng rêh ối, ki tro, ki krê, pơkâ pêi pro, ki xiâm dêi tơdroăng mơhnhôk mơ-eăm… Ƀă mâu tơdroăng ki pêi pro tiô luât ‘na mơjiâng chuh ngiah xah hô̆i, pêi hnoăng cheăng kring vế tơniăn hdroâng mơngế ƀă chuh ngiah xah hô̆i cho prế khêi mơhno troăng plâ rơxông, tơdroăng pơkâ khŏm mơ-eăm plâ ƀlêi trâng tơdroăng cheăng mơjiâng ƀă kring vế tơnêi têa.

Tiê̆n sih Lê Trung Kiên,  Viện Hồ Chí Minh ƀă mâu Kăn xiâm Đảng tối:

“Tơmeăm khoăng ki krá kak dêi Pôa Hồ Chí Minh - Kăn xiâm hnê ngăn tơnêi têa ki apoăng ‘măn ăm ƀă mâu hdroâng mơngế ƀă rơxông, ki rơkê ƀă ki tơƀrê dêi tơnêi têa cho tơdroăng cheăng rah xo, tăng troăng, vê hdró ƀă mơjiâng troăng rơhlâ rak tơniăn hdroâng mơngế tơtế ƀă Chuh ngiah xah hô̆i a Việt Nam. Malối tung tơdroăng hơ’lêh nếo dêi tơnêi têa mê vêh ngăn nếo tơmeăm khoăng Hồ Chí Minh vâ hlo mâu tuăn mơno, tơdroăng tơmiât dêi Pôa ‘na troăng rơhlâ hơ’lêh nếo hiăng veăng pê klêi tơdroăng tơpui ‘tơno ‘na troăng rơhlâ hơ’lêh nếo dêi Đảng Kŏng sản Việt Nam nôkố’’.

Tơdroăng cheăng dêi kăch măng pôa Hồ Chí Minh - Kăn xiâm hnê ngăn tơnêi têa ki apoăng tíu pơxiâm ƀă tíu ki mơgêi xuân tơdroăng vâ pro tơleăng lĕm ăm kuăn mơngế, tơmâng troh tơdroăng hơniâp lĕm dêi kuăn mơngế. Tơmeăm khoăng Hồ Chí Minh ‘na mơjiâng ƀă mơnhông cheăng kâ, ôh tá pơtê mơdêk tơdroăng rêh ối tơmeăm khoăng ƀă tuăn ngoâ ăm kuăn pơlê, ki hdrối cho kuăn pơlê pêi cheăng.

Pôa xuân ‘măn ăm rơxông kơ’nâi ki kơnía git ‘na mơjiâng Đảng ƀă tơdroăng kal kí vâ xúa ƀă mơnhông mơdêk hriăn plĕng ăm tơtro ƀă tơdroăng dêi hdroâng mơngế, hdroâng kuăn ngo ƀă rơxông nôkố. Tiô Yăo sư Tiê̆n sih Mạch Quang Thắng, tung pơla nôkố kal tơrŭm krá pơla Đảng ƀă kuăn pơlê:

“Đảng xuân lo ing kuăn pơlê. Tơkéa vâ tối Đảng cho kuăn dêi kuăn pơlê, Đảng ai hnoăng cheăng pê kâi tơdroăng cheăng ki lĕm nhoăm pâ nôu pâ dêi tơná cho kuăn pơlê. Pôa Hồ Chí Minh - Kăn xiâm hnê ngăn tơnêi têa ki poăng tối nhên tâ ‘’Đảng cho têk, pêi tơdroăng cheăng ăm kuăn pơlê’’. Tơdroăng mê tung tơdroăng cheăng kăch măng nôkố thăm rế tối nhên khât vâ tơrŭm krá khât ƀă dêi rơpó tro tiô tuăn mơno tơdjâ dêi Hồ Chí Minh cho tơrŭm môi mơheăm môi hơ’nêh pơla Đảng ƀă kuăn pơlê’’.

Tí tăng ‘nâi plĕng, xúa, mơdêk hriăn plĕng tơmeăm khoăng Hồ Chí Minh vâ hlê tŭm tơdroăng tâ, trâu tâ pơxúa kân tơmeăm khoăng dêi Pôa ƀă hdroâng kuăn ngo ƀă dêi kuăn mơngế, hlối mơnhên ki kơnía dêi tơmeăm khoăng Hồ Chí Minh rế krá kak, eăng bâ tơdrêng ƀă hdroâng mơngế ƀă kuăn mơngế. Mơ-eăm rak tơniăn tơmeăm khoăng Hồ Chí Minh, hdroâng mơngế Việt Nam kô pêi pro ƀlêi trâng tơdroăng púi vâ dêi Pôa ‘na Mơjiâng môi tơnêi têa Việt Nam hơniâp ro, lâp tơnêi têa tơrŭm môi, tơniăn, pêi pro tro môi tuăn dêi rơpó, kro mơdrŏng ƀă veăng ‘no hnoăng tơxâng a tơdroăng cheăng pêi dêi kăch măng lâp plâi tơnêi.