Mơ’no nhak tâng rơdêng, on bâ eăng trâ hên mơngiơk lĕm ƀă tâi tâng tíu mơđah tơbleăng châ bro rơnuâ ƀă um mâu tơmeăm kơphế ki to kơphế ki má môi kơphô̆ ngo Pleiku, mâu ngế pêi cheăng dêi Kŏng ti pêi cheăng tiô rơnó BaKa (Pleiku, Gia Lai) kơdrâm phiu ro tơbleăng tơmeăm. Jâ Nguyễn Thị Thanh, Kăn phŏ pơkuâ kŏng ti, tối ăm ‘nâi, tơdroăng kố hiăng châ tơkŭm po rêm hâi tung plâ vâ chê 2 hơnăm kố. Kố xuân cho troăng ki pơhlêh ki kal kum khu tê mơdró tơleăng djâ tơmeăm ki má môi Gia Lai troh kŏng mơngế rôe xúa tung lâp tơnêi têa.

Bu tung môi pơla, tơmeăm dêi khu tê mơdró hiăng mơhnhôk rơpâu ngế séa ngăn, châ mơnhên lối 4,2 hơlŏng. Jâ Nguyễn Thị Thanh tối ăm ‘nâi, rơtế ƀă po rơdâ kơchơ mơdró, khu tê mơdró xuân pêi pro lĕm tro má môi tung tơdroăng mơjiâng tơmeăm khoăng, mơdêk tơmeăm ki dâi lĕm, pro krá lĕm kơtong tâ ƀă tơtrŏng tung tê mơdró kơ’nâi la ngiâ.

“Rêm kơmăng, ngin ai péa ngế livestream sap ing 19 chôu troh 22 chôu. Rêm roh live pơrá châ hbrâ nhên ‘na on trâ bâ eăng, micro, chêh hdrối tơdroăng vâ tơpui. Tíu tê mơdró điê̆n tưh hlo dêi tơná pêi cheăng kơhnâ, vâi tŏng gum ƀă mâu voucher tê kơtê pơto vâ tơmối rôe tơmeăm drêng dế live. Nôkố, mâu tơmeăm dêi BaKa a tíu mơdró điê̆n tưh pơrá châ mơnhên sap ing 4,5 troh 4,9 hơlŏng. Ngin loi tơngah khât pêi cheăng kơtăng kô châ tơƀrê lĕm’’.

Rơtế ƀă kơphế, nôkố hên tơmeăm ki má môi dêi Gia Lai môi tiah têa kơdruâ oăng, tiu, pơ’leăng plâi hôt hiăng tơbleăng tíu tê mơdró điê̆n tưh, ƀă pêi lo liăn tâk pơrá lối 8% rêm hơnăm. Tung tơdroăng pơhlêh xúa kŏng ngê̆, Gia Lai hiăng tŏng gum khu tê mơdró mơjiâng 255 website tê mơdró điê̆n tưh vâ mơnhên inâi tơmeăm tê mơdró, ti tăng xiâm kối ƀă tê mơdró tung xiâm kối xúa kŏng ngê̆. Pakĭng mê, lối 90 tai khoan tê tơmeăm mơ’no tơdrêng tung um tiô troăng hyôh măng hiăng châ mơjiâng ăm 30 khu tê mơdró ki loi tơngah. Pôa Phan Thanh Thiên, Kăn phŏ Hnê ngăn Khu tê mơdró hơnăm ối nếo Gia Lai, tối:

‘’Kố cho ƀâng tê tơmeăm khoăng lĕm tro má môi ăm kong pơlê ƀă kơpong Tây Nguyên. Khu kố kum mâu ngế tơrŭm cheăng a Gia Lai rêm khế krếo mâu KOL, KOC, tiktoker vâ tê tơmeăm, tŏng gum khu tê mơdró mơdêk rơdêi pêi lo liăn’’.

Mâu hơnăm hiăng hluâ, kơvâ kơmăi kơmok tê mơdró Gia Lai hiăng tơkŭm po hên roh hôp, hnê mơhno vâ mơdêk tơdroăng hlê plĕng ƀă troăng tê tơmeăm ăm mâu khu tê mơdró, khu tơrŭm cheăng ƀă kuăn pơlê pêi chiâk deăng tung xúa phân mêm tê mơdró điê̆n tưh. Nếo achê kố, Khu pơkuâ Kơmăi kơmok tê mơdró Gia Lai tơrŭm ƀă Khu Ngế tê mơdró hơnăm ối nếo Gia Lai ƀă môi tíu tê mơdró điê̆n tưh tơkŭm péa roh tê tơmeăm megalive (roh tê tơmeăm mơ’no tơdrêng tung um tiô troăng hyôh măng mơdró kân).

Tơtrŏng má môi, a mâu roh kố, Kăn pơkuâ Khu pơkuâ Kơmăi kơmok tê mơdró hiăng tơdrêng tơno ƀă mơngế ki rôe rơtế teăng mâ inâi tơmeăm. Tơdroăng châ tơƀrê mơdró, 12.700 tơmeăm hiăng châ tê ƀă tâi tâng kơnâ châ 1,8 rơtal liăn. Mơhé mê, tiô pôa Phạm Văn Binh, Kăn pơkuâ Khu pơkuâ Kơmăi kơmok tê mơdró Gia Lai, tê mơdró điê̆n tưh a kong pơlê xuân tung hneăng pơxiâm. Nôkố nếo ai 40% tung kơxô̆ 5.000 khu tê mơdró a kong pơlê ai website tê mơdró điê̆n tưh. Mâu tơdroăng châ tơƀrê mâu roh tê tơmeăm tơdrêng tung um tiô troăng hyôh măng pơla kố nah ăm hlo, tơmeăm pêi lo ing chiâk deăng Gia Lai ai tơmeăm djâ ăm pêi lo liăn hên a mâu tíu tê mơdró điê̆n tưh:

‘’Péa roh livestream pơla kố nah ăm hlo tơdroăng ki tơmâng kân dêi tơmối. Tơdroăng kố mơnhên kơvâ tê mơdró điê̆n tưh, mơhé ối nếo, xuân ai tơmeăm ki kân hên a Gia Lai. Ngin kô tơdjêp ƀă Tiktok ƀă Shopee vâ mơjiâng mâu hâi tê tơmeăm, măng tĭng tê tơmeăm megalive tiô tơdroăng pơxá krê ‘na tơmeăm pêi lo ing chiâk deăng ki má môi Gia Lai. Nôkố, Khu pơkuâ Kơmăi kơmok tê mơdró dế pơkâ rơtế Khu xiâm pơkuâ Kơmăi kơmok tê mơdró mơjiâng tíu tŏng gum tê mơdró điê̆n tưh, chiâng tíu tơdjêp khu tê mơdró a Gia Lai’’.

Tê mơdró điê̆n tưh dế chiâng kông tơdjêp ki kal, djâ tơmeăm pêi lo ing chiâk deăng Gia Lai troh hơngế ing kơchơ mơdró tung tơnêi têa troh tê ngi kong têa ê lâp plâi tơnêi. Kơnôm ƀeăn ƀĕng rơkê ƀă xúa ki pơxúa dêi tê mơdró điê̆n tưh ƀă tơrôu, mâu tơdroăng ki tiâ tối dêi tơmối rôe tơmeăm xuân veăng kum khu tê mơdró ƀă kuăn pơlê pêi chiâk deăng rế thăm pro i lĕm ăm tơmeăm dêi tơná tâ há. Kố cho pơxiâm hên tơdroăng ki pói tơngah ăm môi tơdroăng pêi chiâk deăng tiô rơxông nếo ƀă krá tơniăn a kong pơlê.