Hâi lơ 4/1, Pơlê kong kân Hồ Chí Minh tơkŭm po hneăng hôp pêi pro pơkâ mơnhông kơvâ pêi chiâk deăng ƀă mơnhông thôn pơlê hơnăm 2023. Tiô tơbleăng, tâi tâng tơmeăm tung pơlê kong kân GRDP dêi kơvâ pêi chiâk deăng Pơlê kong kân Hồ Chí Minh hơnăm 2022 châ vâ chê 8.400 rơtal liăn, tâk 3,74% tâng pơchông ƀă roh kố hơnăm nah. Ki kơnâ mơjiâng tơmeăm dêi khu tơmeăm ki xiâm châ vâ chê 13.000 rơtal liăn.

Tơdroăng tơkŭm pêi pro rơdêi tiô troăng pêi chiâk deăng tung kơpong kơdrâm kuăn pơlê rêh ối châ kheăn kơdeăn laga xuân tá hâi châ môi tiah pói vâ. Tiô pôa Võ Văn Hoan, Kăn phŏ hnê ngăn Vi ƀan Pơlê kong kân Hồ Chí Minh, kơvâ pêi chiâk deăng pơlê kong kân kal ngăn tơdrăng a mâu tơdroăng ki tá hâi rơkê tơtro, ki nhên tơdroăng tơkêa bro hdrê pêt, mơnăn păn.

Pakĭng mê, tơkŭm xúa kŏng ngê̆ mơjiâng tơmeăm pêi lo ing chiâk deăng kơpong kơdrâm kuăn pơlê rêh ối, mê pơ’lêh pêi cheăng xúa kơmăi kơmok vâ tơbleăng mơdêk ki kơnâ tơmeăm ƀă hía hé. Vâ chiâng pêi pro tơdroăng kố, kơvâ pơkuâ ‘na pêi chiâk deăng Pơlê kong kân Hồ Chí Minh drêng pơkâ pêi thế rơtế pêi pro tơdrêng ƀă troăng tŏng kum khu tê mơdró, rơpŏng kuăn pơlê pêi chiâk deăng.