A roh pêi cheăng, Phŏ Kăn xiâm hnê ngăn Kuô̆k hô̆i kheăn kơdeăn tơdroăng ki hbrâ, pôu râng hnoăng cheăng dêi cheăm tung tơdroăng hbrâ. Mâu hnoăng cheăng châ pêi pro kơtăng, krá, tơniăn tiô tơdroăng pơkâ; tơdroăng hôp tơno cheăng kal kí, hbrâ mơngế pêi cheăng châ pêi pro tro pơkâ; tơdroăng gâk kring châ thăm pêi pro, mơjiâng xiâm kối tơ’lêi hlâu ăm hâi tâ phĭu.

‘Na hnoăng cheăng tung la ngiâ, Phŏ Kăn xiâm hnê ngăn Kuô̆k hô̆i pơkâ cheăm pơtối hlê plĕng pêi pro tŭm mâu mơ-éa hnê mơhno dêi Tơnêi têa ƀă Hô̆i đong Tâ phĭu Tơnêi têa; hbrâ inhên rêm tơdroăng vâ hâi tâ phĭu păng ‘nâng chiâng hâi xah hêi ro dêi tâi tâng kuăn pơlê. Ki xiâm cho thăm hnê tơ’nôm, hnê mơhno tơdroăng pêi cheăng ăm mâu tíu tâ phĭu, tôh tâ phĭu; tơdrêng amê, hbrâ po rơkê tíu tâ phĭi tiô khoa hok, tơtro troăng mot, troăng lo ƀă tĕm inâi mơngế ki tâ phĭu tŭm, inhên.