VOV4.Xơ Đăng - 15 hâi hiăng hluâ a tơring Kon Plông, kong pơlê Kon Tum hiăng ai chât roh tơnêi tơdro ƀă mâu roh tơnêi tơdro kŭn. Ki rơhêng vâ tối kơxê hâi lơ 23/8 ai roh tơnêi tơdro têi 4.7, kân má môi tung dâng 100 hơnăm hiăng hluâ. Drêng ai tơdroăng ôh tá ‘nâi tối hdrối dêi kong prâi pro ôh tá tơniăn kố, tơdroăng tơniăn long rơchôa kơdoăng têa hngêi kơmăi mơjiâng pro on tơhrik, long rơchôa têa vâ hbrâ ví ƀă tơnêi tơdro a Kon Tum dế châ khu râ kăn pơkuâ xuân môi tiah mâu tíu cheăng pơkuâ rơhêng vâ ‘nâi plĕng.

Kơmăi séa ngăn hyôh kong prâi ƀă têa ki chiâng séa ngăn xêh krâ tung long rơchôa têa hngêi kơmăi on tơhrik Thượng Kon Tum

Pôa Lê Đức Tín, Kăn phŏ hnê ngăn Vi ƀan tơring Kon Plông, khu râ kăn pơkuâ tơring hiăng thăm pơkuâ, séa ngăn ƀă péa long, rơchôa hno têa hngêi kơmăi on tơhrik kân, mê cho: Đăk Đrinh ƀă hdoăng lối 248 rơtuh met khô̆i têa ƀă long rơchôa hno têa on tơhrik Thươ̆ng Kon Tum ƀă hdoăng 145 rơtuh met khô̆i têa.

Rơtế ƀă 3 toăng kơmăi séa ngăn tơnêi tơdro hiăng châ krâ, Kŏng ti on tơhrik Thượng Kon Tum tơkêa ƀă Viện Vật lí Địa cầu pơtối krâ tơ’nôm 3 Hngêi kơmăi nếo vâ tơbleăng teăm tơdrêng ƀă kum tung tơdroăng hriăn plĕng trâu hơngế ‘na tơnêi tơdro tung kơpong.

A Sa Ly tơplôu ƀă tơbleăng