VOV4.Xơ Đăng - Tung mâu hâi hdrối kố nah, a Pơlê kong kân Hồ Chí Minh hiăng po hneăng Tơ’noăng pơchuât tung rơ’jíu lâp tơnêi têa rôh má 15 hơnăm 2022. Bă pơxá “Rơkê ƀeăn tung pơ'lêh - hmâ mơnhông tơƀrê”. Hneăng tơ’noăng rôh kố ai kơxô̆ mâu tíu pêi cheăng veăng tơ’noăng hên (ai 86 tíu pêi cheăng) ƀă mâu ƀai tơ’noăng  ki hôm rơkê, ƀă lối 500 ƀai. Kô cho “Hâi leh’’ tơdroăng cheăng pêi ki kân dêi mâu ngế chêh, pơchuât tung rơ’jíu, tơbleăng rơdêi lâp lu tung kuăn pơlê.

Tơ’noăng chêh ƀai mơ’no tiô troăng Rơ’jíu lâp tơnêi têa tơkŭm po rêm hneăng 2 hơnăm 1 xôh, vâ châ hlo, pơ-ôu pơ-eăng mâu ngế chêh, ƀai chêh ki rơkê má môi dêi mâu ngế chêh hlá tơbeăng lâp tơnêi têa. Tơ’noăng chêh ƀai mơ’no tiô troăng rơ’jíu lâp tơnêi têa roh má XV – hơnăm 2022 dó inâi cho ‘’Ƀeăn ƀĕng pơhlêh – kâi trâng, xông tơtêk’’. Sap lối 500 ƀai veăng tơ’noăng (hên má môi sap ing hdrối nah troh nôkố), Khu tơkŭm po hiăng rah xo 203 ƀai mot tung roh Mơgêi a mâu ƀai chêh tối tơdroăng nếo ai pơlê pơla, kơ-êng, tơdroăng hơ’muăn pro pơro, ƀai chêh tơpui mơ’no tơdrêng ƀă hía hé.

Ki nếo dêi Tơ’noăng roh kố cho Khu tơkŭm po xuân tơkŭm po tơ’noăng ƀă diâp pri Rơkong pơchuât Mêa, diâp pri mâu ăm ngế pêi kih thuât thâu hrik rơkê ƀă mâu tơdroăng thâu hrik phân mêm kơmăi tĭnh tiô rơxông nếo ƀă hía hế.

Pôa Đỗ Tiến Sỹ, Kăn xiâm pơkuâ VOV tôu hơkâ pơxiâm po Tơ’noăng chêh hlá tơbeăng mơ’no tiô troăng rơ’jíu lâp tơnêi têa

Kố cho roh má péa, Tơ’noăng châ tơkŭm po a Pơlê kong kân Hồ Chí Minh ƀă cho hâi leh hô̆i dêi mâu ngế chêh hlá tơbeăng mơ’no tiô troăng rơ’jíu lâp tơnêi têa. Pôa Phan Văn Mãi, Kăn hnê ngăn Vi ƀan Pơlê kong kân Hồ Chí Minh tối, Tơ’noăng ôh tá xê to tơdroăng pêi cheăng ki loi tơngah khât mê ối cho tơdroăng tuăn pâ dêi mâu ngế chêh hlá tơbeăng mơ’no tiô Rơ’jíu ƀă Pơlê kong kân Hồ Chí Minh, tíu ki lối môi hơnăm hdrối trâm pơreăng kân COVID-19 tá hâi chói ai sap ing nah:

‘’Mâu khu chêh hlá tơbeăng rơtế ƀă khu ki pêi cheăng mơdât pơreăng ƀă kuăn pơlê lâp tơnêi têa, pú hmâ lâp plâi tơnêi hiăng troh a tíu ai pơreăng xông tâ tú râ ó má môi. Ƀă kơnôm tơdroăng ki ai mâ mê, lâp tơnêi têa plĕng nhên tâ, kum dêi pó tâ, rơtế ƀă pơlê kong kân, pơlê kong kân châ mơhnhôk, mơ-eăm tâ mê vâ tơkâ hluâ hneăng pá puât má môi.

Ƀă tung pơla mê, pin hiăng hlo tơdroăng ki kal dêi luât drêng hiăng mơnhông mơdêk hnoăng dêi tơná’’.

Tơ’noăng chêh ƀai mơ’no tiô troăng Rơ’jíu lâp tơnêi têa roh má XV a Pơlê kong kân Hồ Chí Minh cho ‘’hâi leh’’ tơdroăng cheăng kân dêi mâu ngế chêh hlá tơbeăng mơ’no tiô troăng rơ’jíu hiăng mơhnhôk tơdroăng ki tơmâng dêi mâu ngế tơmâng rơ’jíu ƀă mâu khu pêi cheăng chêh hlá tơbeăng. Pakĭng mâu tơdroăng ‘na kal kí ki tô má môi châ kuăn pơlê rơhêng vâ ‘nâi plĕng mê mâu ngế ki châ krếo troh dêi mâu kơ koan veăng tơ’noăng xuân djâ troh tơdroăng tơ’noăng hên tơdroăng ki rơrêk tung hiâm mơno.

Mê cho mâu tơdroăng tŏng xo mơngế hliăng tiâ xua kong prâi pro ôh tá tơniăn, têa kân lân lu, on chếo. Tơdroăng ‘’ôh tá kơtong’’ dêi Hoàng Thị Mũ ƀă tuăn pâ rak vế dêi pó phâi hơtô dêi mâu cô kơpong kong ngo, tơdroăng ki ai khât dêi khu lêng tơpâ on chếo hiăng pro rơrêk têi tung mâu ngế ki tơmâng rơ’jíu.

Ôh tá kơbố ngăn kơbố, mâu kơto têa mâ rơrêk tung hiâm mơno. Ngoh Nguyễn Huy Hoàng, ngế chêh hlá tơbeăng Ƀang troăng klông Pơlê kong kân Hồ Chí Minh tối:

‘’Ing tơ’noăng mơ’no tiô troăng Rơ’jíu, mâu tơdroăng môi tiah dêi thiê̆u tă Thành dêi o Mũ pro á châ hlo ôh tá xê ‘na tơdroăng cheăng mê ối ‘na mơngế, pói tơngah kố cho mâu tơdroăng lĕm troh lâp lu hên tâ, xuân cho môi tơdroăng mơhnhôk troh lâp lu hên tâ vâ mâu ngế chêh hlá tơbeăng môi tiah ah vâ pơtroh mâu tơdroăng tro ro troh mơngế tơmâng’’.

Pôa Nguyễn Văn Nên, Kăn pơkuâ hnê ngăn cheăng Đảng Pơlê kong kân Hồ Chí Minh ƀă pôa Đỗ Tiến Sỹ, Kăn xiâm pơkuâ VOV diâp reăng ăm mâu ngế châm điêm tơ’noăng

Pôa Nguyễn Trọng Nghĩa, Kăn pơkuâ hnê ngăn cheăng Đảng tơnêi têa, Kăn xiâm pơtâng tối tơdroăng kal tơnêi têa tối, tơ’noăng tơkŭm po tung pơla tâi tâng Đảng, tâi tâng kuăn pơlê ƀă tâi tâng khu lêng pin dế mơ-eăm tơ’noăng, khŏm ƀlêi trâng Pơkâ Hneăng hôp kăn teăng mâ tâi tâng tơnêi têa roh má 13 dêi Đảng; môi hiâm mơno, tơdjuôm ivá pêi pro mâu troăng pơkâ pêi, troăng hơlâ dêi Đảng ƀă Tơnêi têa vâ rak tơniăn ƀă mơnhông mơdêk cheăng kâ – rêh ối pơlê pơla klêi kơ’nâi pơreăng kân COVID-19.

Tung rơxông Pơ’lêh pêi cheăng xúa kơmăi kơmok 4.0, rơtế ƀă tơdroăng mơnhông mơdêk dêi tơdroăng chêh hlá tơbeăng sap ing ton nah, tơdroăng chêh hlá tơbeăng nếo môi tiah hlá tơbeăng điê̆n tưh ƀă facebook, zalo lo ƀă  mơnhông mơdêk rơdêi, chiâng tơdroăng ki tơxup tơbriêt kơtăng khăng ƀă  hlá tơbeăng ton nah.

Xua mê, Rơ’jíu Việt Nam ƀă kơvâ rơ’jíu Việt Nam kal đi đo pơ’lêh nếo troăng tơmiât, ti tăng plĕng, tơmiât pêi troăng ki nếo vâ ƀeăn ƀĕng tung pơ’lêh, kâi trâng ƀă troăng chêh hlá tơbeăng tung rơxông nếo. Rơ’jíu Việt Nam kal chiâng ƀâng tiâ tối pơlê pơla, xiâm kối cho mơjiâng troăng hơlâ tro, ai ivá rêh tung tơdroăng nôkố, kum rak tơniăn kal kí – rêh ối pơlê pơla ƀă  mơnhông mơdêk tơnêi têa, po rơdâ kuăn pơlê pơkuâ dêi hnoăng cheăng, mơdêk ivá pơkuâ dêi Đảng, pơkuâ dêi Tơnêi têa ƀă pơlê pơla.

Pôa Nguyễn Trọng Nghĩa tối rơdêi:

‘’Rêm ngế chêh hlá tơbeăng mơ’no tiô troăng Rơ’jíu kal mơnhông mơdêk tâ mê nếo hiâm môn hriâm xêh, pơtâp xêh, mơdêk tơdroăng kal kí, hiâm mơno tung tơdroăng pêi cheăng; hriâm xêh tơdroăng ki nếo, tơdroăng cheăng chêh hlá tơbeăng, ai tơmiât krê, tơmiât tiâ tối hdrối rêm tơdroăng.

Rêm ngế chêh hlá tơbeăng kal prôk trâu hơngế, achê tung tơdroăng rêh ối, chêh tối nhên tơdroăng rêh ối, mot ƀă kuăn pơlê, rêh ối tung hiâm mơno kuăn pơlê, tiah mê nếo chiâng vâ chêh mâu tơdroăng ki kơnâ, pêng păm tơdroăng mơnhên troăng tơmiât, khôi túa lĕm kuăn mơngế, tơdroăng ki ai khât nôkố ƀă cho vâ pơxúa ăm tơnêi têa, hdroâng mơngế’’.

Mâu hâi tơkŭm po Tơ’noăng chêh hlá tơbeăng mơ’no tiô troăng Rơ’jíu lâp tơnêi têa roh má XV a pơlê kong kân Hồ Chí Minh, pakĭng mâu tơdroăng pêi cheăng kơdrâm mơngế, ối ai mâu hneăng hôp ăm mâu ngế chêh hlá tơbeăng mơ’no tiô troăng Rơ’jíu Việt Nam trâm mâ tơpui tơno ƀă hnê dêi pó túa ki rơkê tơtro. Mê cho mâu tơdroăng pêi môi tiah ‘’Tơdroăng châ tơ-[rê mơnhông mơdêk dêi Pơlê kong kân Hồ Chí Minh’’, hneăng hôp tơpui tơno lâp plâi tơnêi ‘’Mơjiâng tíu pêi lo liăn ăm mâu Rơ’jíu – Um tơvi tung troăng pêi cheăng xúa kơmăi vi tĭnh – phân mêm’’, hneăng hôp tơpui tơno kih thuât ‘’Pơloăng mơnúa dêi rơ’jíu tung hneăng pơ’lêh xúa kơmăi vi tĭnh phân mêm’’, hneăng hôp ‘’Mơjiâng tơdroăng tơpui mơ’no tung Rơ’jíu tung pơla ai hên tơdroăng xah mơ’no tơdrêng tung um tiô troăng măng’’.

Mê cho khât ‘’hâi leh’’ tơdroăng cheăng kân dêi mâu ngế chêh hlá tơbeăng mơ’no tiô troăng rơ’jíu, mơhno tơdroăng ‘’Ƀeăn ƀĕng pơ’lêh – kâi trâng xông tơtêk’’.

VOV chêh

A Sa Ly tơplôu ƀă tơbleăng