Rôh tơ’noăng mơgêi hriâm râ má pái phôh thong hơnăm kố kô po sap hâi lơ 27 troh hâi lơ 30/6 kô la ngiâ. Nôkố, Khu xiâm ngăn ‘na hnê hriâm ƀă hnê mơjiâng tuăn ngôa rơkê hiăng mơjiâng 63 khu lăm séa ngăn tơ’noăng, châm điêm a 63 Tíu xiâm ngăn hnê hriâm ƀă hnê mơjiâng tuăn ngôa rơkê. Khu xiâm ngăn hnê hriâm kô mơjiâng 10 khu lăm séa ngăn trâu ‘na tơdroăng hbrâ rôh tơ’noăng troh 20 to kong pơlê tung lâp tơnêi têa.

‘Na séa ngăn, tí tăng mơnhên tơdroăng tơ’noăng a mâu kong pơlê, Khu xiâm ngăn hnê hriâm ƀă hnê mơjiâng tuăn ngôa rơkê mơjiâng 63 khu kăn séa ngăn troh 63 Khu xiâm ngăn hnê hriâm ƀă hnê mơjiâng tuăn ngôa rơkê (ôh tá riân Khu kăn Hnê mơhno râ tơnêi têa).

Xuân tiô pôa Nguyễn Đức Cường, Kăn séa ngăn dêi Khu xiâm ngăn hnê hriâm ƀă hnê mơjiâng tuăn ngôa rơkê, kơxô̆ kăn ƀô̆ ki iâ gá pêi tơdroăng séa ngăn tung pơla tơ’noăng a mâu tíu tơ’noăng hơnăm kố ai pơ’lêh tiô troăng kơdroh  tơtro ƀă tơdroăng rêh ối khât.

Vâ tơniăn tơdroăng séa ngăn, tí tăng ngăn pêi pro tro tiô pơkâ, Khu xiâm ngăn hnê hriâm ƀă hnê mơjiâng tuăn ngôa rơkê tơkŭm mâu rôh hôp hnê hriâm ăm mâu kăn ƀô̆ xiâm dêi mâu hngêi trung đăi hok, Khu xiâm ngăn hnê hriâm ƀă hnê mơjiâng tuăn ngôa rơkê mâu kong pơlê ‘na tơdroăng ngăn tơ’noăng, châm ƀai tơ’noăng, klêi mê mâu ki mê kô cho mâu ki xiâm vâ tơkŭm po mâu rôh hôp tơpui tơno hriâm tâp a mâu tơring.