Hơnăm kố, kong pơlê Dak Lak ai lối 20 rơpâu ngế hok tro chêh inâi tơ’noăng a 32 to tíu tơ’noăng a 15 tơring, pơlê kong krâm, pơlê kong kơdrâm tung kong pơlê. Vâ hneăng tơ’noăng râ má pái trung hok phôh thong hơnăm 2023 châ tơdroăng tơƀrê má môi, kơvâ ngăn hnê hriâm ƀă hnê mơjiâng tuăn ngoâ rơkê kong pơlê Dak Lak dế hbrâ rơnáu mâu tơdroăng ki pêi pro tơ’lêi hlâu tơdjâk troh hneăng tơ’noăng.

Tung mê tơdroăng ki kal ‘mâi mơnhông mâu tơdroăng ki hiăng hriâm, mơnhên tối ivá hriâm dêi hok tro vâ klâ xoăng rơbot ƀai dế châ tơtrŏng khât. Pôa Phạm Đăng Khoa, Kăn pơkuâ ngăn hnê hriâm ƀă hnê mơjiâng tuăn ngoâ rơkê kong pơlê Dak Lak ăm ‘nâi: Troh nôkố, hnoăng cheăng hbrâ rơnáu ăm hneăng tơ’noăng râ má pái phôh thong hơnăm 2023 dế châ tơbleăng tro tơdroăng.

Pakĭng tơdroăng ki séa ngăn a mâu kơƀăng tăng dâi lĕm rak tơniăn tiô pơkâ thế dêi Khu xiâm ngăn hnê hriâm ƀă hnê mơjiâng tuăn ngoâ rơkê, hnê hriâm ăm kăn ƀô̆ pêi hnoăng cheăng ngăn tơ’noăng. Mâu tơdroăng ki ai hok tro veăng tơ’noăng râ má pái dế kơhnâ mơ-eăm hriâm rơbot mâu tơdroăng ki hiăng châ hriâm, tơkŭm mơnhên tối ivá hriâm tiô ƀô̆ đề tơ’noăng ngăn hdrối Khu xiâm ngăn hnê hriâm ƀă hnê mơjiâng tuăn ngoâ rơkê mơ’no vâ klâ xoăng hok tro rơbot ăm tơtro.

“Tơmiât troh mâu vâi o ki tá hâi tơƀrê khât tung tơdroăng ki tơmâng mâu tơdroăng ki hnê vâ kum mâu vâi o ƀă mâu hngêi trung xuân hiăng xoăng thái cô ki rơkê tung tơdroăng ki hriâm rơbot ƀai ăm mâu vâi o ki kố vâ mâu vâi o ai tŭm tơdroăng ki rơkê ƀă loi tơngah vâ mot tung rôh tơ’noăng kố”.

Tiô pơkâ dêi Khu xiâm ngăn hnê hriâm ƀă hnê mơjiang tuăn ngoâ rơkê, sap ing hâi lơ 4/5, hok tro tung lâp tơnêi têa pơxiâm chêh inâi tơ’noăng Râ má pái trung hok phôh thong hơnăm 2023. Hâi khế chêh inâi troh 17 chôu hâi lơ 13/5. Hok tro dế hriâm lâm 12 a mâu hngêi trung trung hok phôh thong, trung tâm hnê cheăng – yăo yuk thương xuên chêh inâi tơ’noăng tiô tơdroăng ki chêh ing troăng măng, mâu ngế ki ôh ti xê dế hriâm lâm 12 chêh inâi tơdrêng.

Rế vâ chê troh hneăng tơ’noăng râ má pái phôh thong hơnăm 2023, o Phạm Chính Tuyến, hok tro lâm 12, Hngêi trung râ má pái Lương Thế Vinh, Hà Nội rế hlo préa, xua kố châ ngăn cho hneăng tơ’noăng ki kal má môi ‘na tơdroăng ki vâ rah xo kơvâ hriâm cheăng pêi tung la ngiâ.

“Xuân hiăng vâ troh hneăng tơ’noăng ai hên troăng vâ mot hriâm đăi hok. Ngin xuân xơpá vâ rah xo kơvâ cheăng hriâm. Tung măng tĭng mê á ai mơdoh 4 rôh vâ lăm hriâm tơ’nôm troh a kong măng, ƀă mâu rôh ki ôh tá lăm hriâm tơ’noăng mê á kô bro môi to đề Toán, 1 to đề nâl Ănglê klêi rơnêu xêh mâu kâu ki ôh tá tro. Ƀă Văn tâng hâi chôu mê á kô pơchuât ngăn vâ ăm gá hlê tâ ‘na ƀài”.

Xơpá drêng tơkŭm tâi ivá hriâm rơbot hbrâ ăm hneăng tơ’noăng râ má pái cho hiâm mơno tơdjuôm dêi ôh ti iâ hok tro tung pơla bu ối lối 1 khế ‘nôi kô troh Hneăng tơ’noăng. Kố cho hneăng ki kal khât vâ mâu vâi o tơkŭm rơbot mâu tơdroăng ki vâi hiăng châ hriâm dêi mâu môn hriâm tung hneăng tơ’noăng.

Peăng mâu hngêi trung vâ tơdroăng ki rơbot ƀai ăm hok tro châ tơƀrê tâ, rơtế ƀă tơdroăng ki vêh ngăn mâu tơdroăng ki kal tung ƀai hriâm, rơbot ăm hok tro, thái cô ƀô̆ môn ối ăm hok tro pro tiô tơdroăng ki bro môi tiah ƀài tập, ko tơ’noăng mơnúa.

Cô Vũ Thị Minh Trang, cô hnê môn Ngữ văn, Hngêi trung phôh thong liên kâ̆p Alfred Nobel ăm ‘nâi:

“Pakĭng mâu chôu hriâm a lâm mê mâu vâi o ối ai mâu chôu hriâm tơ’nôm ƀă hriâm kơhnâ khât mâu ko ƀai ki cô ăm ƀă tơrŭm ƀă thái cô tung mâu tiêt hriâm a lâm”.

Maluâ tung pơla rơbot vâ tơ’noăng, la mâu thái cô ƀă khu ki rơkê pơrá pơchân hok tro kal tơniăn hiâm mơno, ivá, hbrâ rơnáu hriâm rơbot mâu tơdroăng ki hiăng châ hriâm, tơdroăng ki hriâm tơrêm môn tơ’noăng. Tiê̆n sih Huỳnh Văn Chương, Cục trưởng Cục Pơkuâ ngăn ki rơkê, Khu xiâm ngăn hnê hriâm ƀă hnê mơjiâng tuăn ngoâ rơkê pơchân:

“Nôkố mâu vâi o dế tơkŭm tung tơdroăng ki rơbot tơ’noăng mê peăng Khu xiâm ƀă malối cho Khu pơkuâ ngăn ki rơkê mê ngin pơchân mâu vâi o athế pôi tá préa loi tơngah a dêi tơná ƀă hriâm rơbot nhên tiô tơdroăng ki pơkâ, séa ngăn a mâu ko ƀai dêi hên hơnăm hdrối hía nah, malối ngin nếo tơbleăng dêi hơnăm 2023.

Mâu vâi o mơ-eăm hriăn ngăn nhên mâu túa ƀai ki bro, malối cho mâu khu ki tơchĕng tơmiât vâ pin châ điêm hên má môi, vâ rế châ séa plah râ má pái la tơdrêng amê ối tơtro tung tơdroăng mê cho séa mot hriâm đăi hok ƀă mâu tơdroăng hriâm ki ê”.

Khu xiâm ngăn hnê hriâm ƀă hnê mơjiâng tuăn ngoâ rơkê ăm ‘nâi hiăng hbrâ rơnáu tâi tâng mâu phần mềm, kong ngê̆ thong tin ăm tơdroăng ki chêh inâi tơ’noăng. Khu xiâm ngăn hnê hriâm ƀă hnê mơjiâng tuăn ngoâ rơkê xuân ai khu ki gâk plâ hâi plâ măng vâ kum ‘mêng rơnêu mâu tơdroăng chêh ôh tá tro tâng ai. Hneăng tơ’noăng râ má pái Trung hok phôh thong hơnăm 2023 kô po sap ing hâi lơ 27 troh lơ 30/6. Klêi kơ’nâi tơ’noăng kô châ tơbleăng a hâi lơ 18/7.