Kơxo hâi lơ 14/6, Trung tướng Tô Ân Xô, Ngế  tơpui kâ xiâm Kŏng an ăm ‘nâi, tơdroăng tung lâp kong pơlê Dak Lak hiăng vêh tơniăn tiah hmâ nếo, tơ’nôm ai môi ngế mơhnŏng mơhno dêi châ, vâ châ kơdroh tơdroăng ki pro xôi. Tiô tối tơbleăng dêi khu xiâm Kŏng an kong pơlê Dak Lak, tơdroăng kring tơniăn tung lâp kong pơlê Dak Lăk hiăng vêh tơniăn tiah hmâ nếo, ôh tá ai tơdroăng klâi hơ’lêh.

Tơdroăng rêh ối vêh môi tiah mâu hâi hdrối nah a hâi lơ 11/6. Tung kơmăng hâi lơ 13/6 hiăng ai môi ngế veăng tung khu ki pro ôh tá tơniăn mê hiăng lăm tơbleăng tối tơná. Tiah mê, troh nôkố hiăng ai 3 ngế  veăng tung khu râng djâ pháu lăm plâ a tíu pêi cheăng kŏng an péa to cheăm Ea Tiêu ƀă Ea Ktur lo tối tơbleăng tơná vâ châ kơdroh tơdroăng xôi.

Riân troh kơxo hâi lơ 14/6, mâu lêng, kŏng an, khu râ pơkuâ cheăng hiăng châ rup tâi tâng 46 ngế ki pro tơdroăng ôh tá tơniăn lăm plâ a tíu pêi cheăng Vi ƀan péa to cheăm Ea Tiêu ƀă Ea Ktur. Kŏng an kong pơlê Dak Lak pơtối krếo mâu ki  “hyông troăng mê” thế lo, mơhno dêi châ, tối tơbleăng dêi tơdroăng xôi tơná vâ châ kơdroh tơdroăng xôi.