Klăng leh tơbâ 133 hơnăm hâi kot mâ Pôa Hồ Chí Minh, Kăn xiâm hnê ngăn tơnêi têa hneăng apoăng (19/5/1890 – 19/5/2023), kơxo lơ 18/5 a Hà Nội, Khu xiâm tơpui kâ tơkŭm po tơpui tơno “Xúa troăng tơmiât tơpui kâ ƀă kong têa ê Hồ Chí Minh pêi pro troăng tơpui kâ ƀă kong têa ê Hneăng hôp Đảng lâp tơnêi têa roh má 13’’. A hneăng hôp tơpui tơno, mâu rơkong tơpui leăng, xông tơpui hiăng prôk trâu hơngế tâ ‘na tơdroăng xiâm, troăng pêi ƀă ngê̆ thuât tơpui kâ ƀă kong têa ê Hồ Chí Minh ƀă mâu troăng ngăn nếo.

Tơdrêng amê, hên rơkong tơpui xuân tối ‘na tơdroăng nôkố, mơnhên tơdroăng nôkố pêi pro xúa troăng tơmiât Hồ Chí Minh tung tơdroăng tơpui kâ ƀă kong têa ê, túa ki rơkê tơtro, xúa troăng tơmiât pêi rơkê tơpui kâ ƀă kong têa ê Hồ Chí Minh tung tơleăng tơdroăng cheăng rêm hâi.

Xông tơpui mơgêi roh tơpui tơno, pôa Bùi Thanh Sơn, Ngế xiâm tơpui kâ mơnhên mâu rơkong tơpui ki kơnía, ing roh tơpui tơno kô kum tơ’nôm tơdroăng ki plĕng ăm kăn ƀô̆ pêi cheăng ‘na tơpui kâ ƀă kong têa ê, kum hlê plĕng trâu hơngế tâ ki kơnâ dêi troăng tơmiât tơpui kâ ƀă kong têa ê Hồ Chí Minh ‘na xúa rơkê tung tơdroăng rêh ối nếo nôkố.