VOV4.Xơ Đăng - Hâi lơ 5/10, a pơlê kong kơdrâm Nha Trang, kong pơlê  Khánh Hòa po hneăng hôp tơpui tơno ‘na têa Kơxĭ rôh má 9 pơxá “Tí tăng ‘nâi plĕng Khoa hok ‘na têa kơxĭ: Mơjiâng tuăn lo ƀă rak hyôh kong prâi tơniăn lĕm’’. Tơdroăng mê xua Học viện khoa hok ngoại giao cho Tíu xiâm tơpui kâ, Kăn teăng mâ a Việt Nam, Khu rak liăn ‘măn kơdĭng Konrad Adenauer Stiftung (KAS) tơkŭm po.

Rơtâ tá hneăng hôp

Tơpui ‘na Têa kơxĭ roh má 9 tơ’mot hên vâ chê 200 ngế kăn tung lâp plâi tơnêi ƀă tung tơnêi têa veăng hôp ƀă hôp tiô troăng hyôh Internet. Phŏ Yăo sư Tiê̆n sih Nguyễn Chu Hồi, Kăn phŏ hnê ngăn khu Păn tơnăng ká xi xŏng Việt Nam ăm ‘nâi, khoa hok kŏng ngê̆ cho ki xiâm kal khât tung mơnhông cheăng kâ, kring vế hnoăng pơkuâ tơnêi têa.

Chiâng tơnêi têa ki rơdêi ‘na têa kơxĭ mê thế ai Khoa hok kŏng ngê̆ rơkê, tí tăng păn tơnăng ká xi xŏng vâ tơƀrê, têa kơxĭ thế châ rak ngăn. Phŏ Yăo sư -Tiê̆n sih Nguyễn Chu Hồi pơkâ thế, ing tơdroăng tơpui kâ, mâu kong têa mơjiâng tuăn loi kal kí vâ tơrŭm cheăng khoa hok ‘na têa kơxĭ. Pakĭng mê, mơjiâng kơ koan xing xoăng tơdroăng cheăng tí tăng ‘nâi plĕng khoa hok ‘na Biển Đông.

VOV/Tơplôu: Gương