Kơxo lơ 25/12, a Pơlê kong kân Đà Nẵng, pơxiâm po Hneăng hôp tơpui tơno túa ki rơkê tơtro pêi cheăng pơla Kuô̆k hô̆i péa tơnêi têa Việt Nam ƀă Kul. Kố cho Hneăng hôp tơpui tơno apoăng pơla péa Khu râ kăn Kuô̆k hô̆i râ má môi nhŏng o, péa Kuô̆k hô̆i tung hneăng Kuô̆k hô̆i hneăng má XV dêi Việt Nam. A hneăng hôp tơpui tơno, kăn teăng mâ péa tơnêi têa tơkŭm tơpui tơno, tối ki rơkê tơtro ‘na hnoăng cheăng dêi Kuô̆k hô̆i Kuô̆k hô̆i tung pro tơniăn ƀă mơnhông mơdêk cheăng kâ – rêh ối pơlê pơla; Tơrŭm cheăng pơla Việt Nam ƀă kong têa Kul tung mơnhông cheăng kâ, mơhno khôi túa lĕm tro, ôm hyô; tơrŭm cheăng kơpong têa kroăng Mekong.

Mâu kăn teăng mâ xuân tơkŭm tơpui tơno mâu troăng thăm tơrŭm cheăng pơla Kơ koan mơjiâng luât péa tơnêi têa ƀă pơla Khu Kăn Kuô̆k hô̆i râ má môi tơrŭm cheăng péa tơnêi têa, kum thăm mơnhông mơdêk tơrŭm cheăng Việt Nam – Kul thăm trâu hơngế, păng ‘nâng ƀă châ tơƀrê tung mâu kơvâ cheăng.