Troăng ví peăng hdroh Pơlê kong kơdrâm Bảo Lộc, kong pơlê Lâm Đồng châ ‘no liăn bro tiô tơkêa BT hiăng athế pơtê bro klêi kơ’nâi hiăng pro châ lối tơdế xua ôh tá bê tŭm liăn. Tơdroăng ki bro troăng ví peăng hdroh pơlê kong kơdrâm Bảo Lộc (Lâm Đồng) cho troăng ki tơ’nôm tung inâi tơdroăng tơkêa ‘mâi mơnhông, rơnêu Troăng kân kơxô̆ 20 tơkâ luâ 2 to kong pơlê Đồng Nai ƀă Lâm Đồng tiô tơdroăng BT (mơjiâng bro – pơcháu).

Troăng kố xŏn 15km ƀă kơxô̆ liăn ‘no hiăng châ ‘mâi rơnêu cho lối 720 rơtal liăn, pơxiâm bro sap ing khế 2/2017. Klêi kơ’nâi bro châ lối tơdế, mê troăng kố hiăng pơtê bro a mơ’nui hơnăm 2020 xua ôh tá ai liăn, tiô riân kal lối 183 rơtal liăn ‘nôi nếo bro klêi.

Maluâ kong pơlê hiăng xing xoăng kơxô̆ liăn sap ing liăn ngân kong pơlê vâ kum ăm tơdroăng ki bro troăng kố la xua tơvâ ‘na mâu troăng hơlâ mê troh nôkố Khu xiâm ngăn troăng prôk ƀă rơxế kơtâu xuân tá hâi ai túa pơkâ vâ tŏng kum. Troăng prôk kố tro pơtê bro hiăng tơdjâk hên tơdroăng, tơ’nhiê ƀă bro mơhrê liăn ngân tê kơtê.