Pơlê vâi hdrêng SOS Đà Lạt nôkố dế rak ngăn, păn roăng 46 ngế vâi hdrêng kuăn tê, vâi hdrêng ki tro lôi ƀă vâi hdrêng ai tơdroăng rêh ối pá puât, sap ing 5 troh 18 hơnăm. Pakĭng mê, 34 ngế dế hriâm a mâu hngêi trung đăi hok, kao đăng xuân pơtối châ tŏng kum ing pơlê.

Hriâm a hngêi trung kố hiăng 8 hơnăm, o Huỳnh Thị Như Ngọc, hok tro lâm 8, hlo kố môi tiah rơpŏng hngêi ki kân, tíu mâu ngoh mâu nâ, o hâk vâ, gum dêi pó tung hriâm tâp ƀă tơdroăng rêh ối:

“A pơlê mâu vâi ngoh vâi nâ tung hngêi vâi hâk nhuô̆m dêi rơpó ƀă hlối ai hên pú rơtế hơnăm tung pơlê mê ngin xah xuân ro, hriâm tâp mê êng ƀai dêi rơpó. Rôh leh mâu vâi xăng, vâi tăm đi đo tơmâng ngăn, tŏng gum ăm ngin. Trung thu hơnăm kố ngin tơdah hên khu ki lăm troh pôu ƀă hbru tơmeăm ăm ngin akố”.

Mâu rơnó Trung thu hdrối nah, mâu vâi o châ ngăn hơdruê xuăng, kơtú ƀa long, xah ro ƀă veăng tung mâu tơdroăng xah ƀă mâu vâi pú. Hơnăm kố,  Đà Lạt kong mêi hên la xuân ối tơkŭm po Trung thu hơniâp ro. Mâu vâi o xuân ối châ trâm, châ xo mâu tơmeăm ƀă mâu chôu phut tơkŭm ối ƀă dêi rơpó. Ƀă Hoàng Thị Thu Thủy, Têt Trung thu a pơlê cho tơdroăng ki hơniâp ro ki o đi đo chôu vế:

“Rêm rôh Trung thu troh ngin muăn châ mâu vâi ngoh vâi nâ troh akố tơkŭm po tơdroăng, hbrâ ăm mâu kơƀăn, xah mâu tơdroăng ki ro. Ngin muăn ro khât. Hơnăm kố kong mê hên la mâu vâi xăng vâi tăm xuân ối troh akố hbru ăm ngin muăn mâu tơmeăm. Ngin mơnê hên khât ƀă mơnê mâu rôh Trung thu môi tiah kố”.

Môi to kơƀăn, môi to on kơđĕng tơdrong lơ tơmeăm tung kơmăng khế mơniâ ôh tá kân 'na liăn ngân, la ƀă mâu vâi hdrêng ki dế xông kân a Pơlê SOS Đà Lạt, mê cho tơdroăng ki tơmâng ngăn, cho tơdroăng ki hơ-ui pâ ƀă veăng gum. Pôa Trần Bảo Long, Kăn pơkuâ pơlê vâi hdrêng SOS Đà Lạt, ăm 'nâi, pakĭng kơxô̆ liăn dêi khu SOS, tơdroăng rak ngăn vâi hdrêng a pơlê kố ối châ xo tơdroăng tŏng kum dêi khu râ kăn pơkuâ kong pơlê ƀă mâu khu ki ai hiâm mơno hơ-ui:

“Ƀă mâu vâi hdrêng môi hơnăm ai rôh Têt: Têt Lo hơnăm nếo, Têt Vâi hdrêng lơ 1/6 ƀă Têt Trung thu. Tết Trung thu dêi pơlê hơnăm kố tâi tâng mâu vâi muăn tung pơlê châ tơdah hên tơdroăng ki pâ nhuô̆m dêi mâu khu râ kăn pơkuâ cheăm bêng, dêi mâu khu ki hiâm mơno hơ-ui rơhêng vâ djâ troh ăm mâu vâi muăn ai môi rôh Trung thu ai tŭm tơdroăng, hơtôu, hơniâp ro”.