-Ô ngoh Y Khăm Ta Niê, ƀă hnoăng pro Kăn hnê ngăn chi ƀô̆ dêi pơlê kơpong kuăn ngo mê tơdroăng klâi xiâm ki gum ngoh chân tuăn ‘na tơdroăng kal kí ƀă pơtối rak ki loi nhoăm, mơdêk tơdroăng ki lĕm vâ tơkŭm, môi tuăn tung đảng viên ƀă kuăn pơlê tung pơlê dêi tơná?

Kăn pơkuâ hnê ngăn Chi bộ Y Khăm Ta Niê: Ƀă a, xiâm rêi vâ ai tuăn chân krá tơdroăng kal kí ƀă châ nhoăm pâ tung hdroâng kuăn ngo bă hiâm mơno dêi kuăn pơlê. Tuăn loi mê ôh ti xê to gá hmếo pơ ai xêh, mê châ mơjâng tung tơdroăng cheăng pêi tơpui hlối pêi, đi đo pro troăng lĕm ahdrối tung rêh ối pêi cheăng, rak tro luât dêi Đảng, luât tơnêi têa ƀă túa tơlá, tơdroăng rêh ối ki lĕm tro dêi pơlê. Cho Ngế hnê ngăn chi bô̆ kơpong hdroâng kuăn ngo, a hiăng ‘nâi nhên thế achê kuăn pơlê, hlê kuăn pơlê, tơpui ƀă kuăn pơlê ah kuăn pơlê hlê ƀă pro ăm kuăn pơlê loi.

Drêng kăn ƀô̆, đảng viên rêh ối ƀă kuăn pơlê, tối hơlêm  tơdroăng xơpá rơtế ƀă kuăn pơlê tơmâng tŏng gum kế kâ, tíu ối, tơdroăng rêh ối ăm kuăn pơlê mê kuăn pơlê nếo nhoăm pâ ƀă kuăn pơlê loi pâ nhoăm. Ing mê, tơkŭm châ đảng viên ƀă kuăn pơlê pâ nhoăm môi tuăn mơjiâng pơlê pơla rế ton rế mơnhông tơƀrê kro mơdrŏng.

-Ing tơdroăng cheăng pơkuâ hnê ngăn Chi bô̆ dêi buôn A1 pêi klêi hnoăng cheăng pêi châ hên hơnăm hlối, tiô ngoh tơdroăng ki lâi ngoh pêi pro châ tơƀrê má môi tung tơdroăng pơ’lêh nếo mơdêk cheăng tơbrê tung rêh ối pêi cheăng dê chi ƀô̆, vâ tơdroăng pơkâ dêi Đảng tơnêi têa châ pêi pro tung rêh ối?

Y Khăm Ta Niê: Ing tơdroăng pơkuâ hnê mơhno dêi buôn A1, tiô a tơmiât túa pêi ki tơƀrê má môi vâ hơ’lêh nếo mơdêk tơdroăng tơkŭm hôp pêi cheăng dêi chi ƀô̆ tiô hnê mơhno 50 dêi Tíu xiâm cho hôp rơtế ƀă tơdroăng pêi cheăng dêi pơlê. Chi ƀô̆ ôh tá tơpui tơdroăng cheăng tơdjuôm mê tơkŭm a mâu tơdroăng ki nhên môi tiah xăm kơklêa kơdroh kơtiê, mơjiâng hngêi ối, rak tơniăn pơlê pơla, pơtối rak túa lĕm tro, tăng cheăng pêi.

Pơkâ mê thế ‘nâng ‘nâi, nhên tơdroăng cheăng pêi, nhên mơngế pêi, nhên hâi khế pêi, pêi cheăng thế tơbrê, drêng hôp thế tăng êng ngăn nhên, tối tơdroăng ki pêi pro pakĭng mê pơtối rak môi tuăn dêi rơpó tung tơkŭm hôp trâm mâ. Mơhnhôk mâu đảng viên, khên tơpui tơno, tối tơdrăng, tối khât. Tơdjuôm ƀă hôp dêi chi ƀô̆ hlối hnê tối ƀă tơdroăng pêi pro ki tơtro ƀă kuăn pơlê hdroâng kuăn ngo vâ tơdroăng Pơkâ mê châ xúa khât tung rêh ối.

-Mâu túa Kâu lak bô̆ tŏn chêng lơ tôh tơrŭm pêi cheăng păn ro tung kuăn pơlê ƀă mâu túa cheăng kâ ki ê tơdjâk môi tiah lâi troh tơdroăng pơ’lêh tuăn tơchĕng tơmiât, túa pêi cheăng dêi kuăn pơlê. Ƀă hnoăng cheăng dêi Chi ƀô̆ tung tơdroăng tơrŭm mơjiâng Đảng ƀă mơnhông cheăng kâ rêh ối pơlê pơla ƀă xiâm ki châ mơhnho môi tiah lâi ngoh?

Y Khăm Ta Niê: Mâu túa pêi cheăng môi tiah Kâu lak ƀô̆ tŏn chêng, tơkŭm tơrŭm păn ro hiăng hlo pơ’lêh nhên tung tuăn tơmiât dêi kuăn pơlê. Ing tíu hdrối nah tơkôm tơngah nôkố hiăng ‘nâi tơrŭm, rơtế pêi, rơtế xúa. Ing tơbleăng Kâu lak ƀô̆ tŏn chêng, kuăn pơlê hlo ki pơxúa dêi túa lĕm tro ton nah ôh ti xê to rak túa lĕm tro mê ối veăng mơnhông tuăn vâ, tơbleăng um méa pơlê.

Tơkŭm rak ngăn păn ro kum kuăn pơlê pơ’lêh tuăn tơmiât túa pêi cheăng kŭn chiâng pêi cheăng ai tơrŭm, tơkŭm, ‘nâi tơmiât nhên hdrối vâ pêi, mơ-eăm mơnhông vâ hluăn kơtiê. Hnoăng pêi pro mê dêi Chi ƀô̆ kô mơhno nhên ing troăng hơlâ, hnê tơdjâ, pro ngế ki kơjo kum ăm mâu túa pêi cheăng, xing xoăng đảng viên pơkuâ ngăn veăng pêi tơdrêng.

Ing mê, rơtế mơjiâng Đảng ƀă mơnhông cheăng kâ pơlê pơla, ‘mâi mơnhông tuăn loi dêi kuăn pơlê a ngế pơkuâ hnê mơhno dêi Đảng  pơlê cheăm.

-Châ khĕn kơdeăn klăng tro leh tơbâ 96 hơnăm Hâi mơjiâng Đảng, ngoh vâ pơtroh rơkong tơpui klâi troh mâu đảng viên ối nếo a kơpong hdroâng kuăn ngo, a mâu kơpong tíu tơkăng kong?

Y Khăm Ta Niê:  Châ khĕn kơdeăn klăng rôh leh tơbâ Hâi mơjiâng Đảng cho tơdroăng hâk tơngăm kân khât xuân cho hnoăng cheăng pêi. A púi vâ pơtroh ăm mâu hơnăm ối nếo, đảng viên ối nếo a kơpong tơkăng kong, kơpong kuăn ngo thế rak tuăn lĕm rêh ối lĕm, púi vâ mơ-eăm mơnhông ing pơlê tơná hiăng kot mâ. Pôi tá tơchĕng tơmiât kơpong xơpá cho ki lŭp mê thế ngăn nhên cho tíu ki vâ hriâm tâp rơnêu pât tơná, pleăng hnoăng tơná, tơƀrê hôm.

Hơnăm ối nếo đảng viên khên tơchĕng khên tơmiêt, khên pêi, khên pôu râng hnoăng tơná, kơhnâ hriâm, rak túa lĕm tro, vêa vong kuăn ngo, djâ troăng ahdrối tung mơnhông cheăng kâ, kring vế tíu tơkăng kong, mơjiâng pơlê rế ton rế lĕm ro kro mơdrŏng, rơkê plĕng. Mê cho túa pêi ai pơxúa má môi vâ tơxâng ƀă tơdroăng hmâ pêi pro ing nah ki lĕm dêi Đảng.

-Hôm, mơnê kơ ngoh Y Khăm Ta Niê, Ngế pơkuâ hnê ngăn chi ƀô̆ Buôn A1,  cheăm Ea Súp, kong pơlê Dak Lak