Ôh tá xê cho roh vâ mơhnhôk tâi tâng kuăn pơlê veăng pơtâp ivá, mơđah tơbleăng um méa Ƀuôn Ma Thuột – Dak Lak troh ƀă kuăn pơlê ƀă tơmối, pri kơtâu Dak Lak Marathon ối djâ ki kơnâ pơlê pơla ƀă tơdroăng mơjiâng kơxô̆ liăn vâ diâp hnoăng liăn hriâm rơkê, ƀaoh hiêm khăm pơlât ăm hok tro ai tơdroăng rêh ối pá puât ƀă tŏng kum hngêi tuăn pâ ăm mâu rơpŏng ai hnoăng tơnêi têa pá puât ‘na hngêi ối.

Mơgêi roh tơ’noăng, Khu tơkŭm po hiăng diâp mâu pri má môi, má péa, má pái ăm mâu ngế tơ’noăng rơkê tŭm 3 tơdroăng. Tơdrêng amê diâp hnoăng liăn rơkê tŏng kum mơjiâng 1 toăng hngêi tuăn pâ, tŏng kum hnoăng liăn hriâm rơkê Bâ eăng troăng tơmiât  dêi Khu pơkuâ Đoân droh rơtăm kong pơlê Dak Lak, diâp chêng khŏng, rơxế mái ƀă kơxuô tơmeăm ăm hok tro kơtiê tơkâ hluâ pá puât.