Troh nôkố, Khu ngăn vâi kơdrâi tơring Lâm Hà hiăng tơrŭm ƀă Hngêi rak liăn tŏng kum rêh ối pơlê pơla, Hngêi rak liăn Pêi chiâk deăng ƀă Mơnhông thôn pơlê tŏng kum vâi kơdrâi châ mung, xúa tơƀrê mâu kơxô̆ liăn ăm mung. Ing mê, hiăng ai lối 5 rơpâu ngế nâ o châ mung ƀă tâi tâng kơxô̆ liăn lối 140 rơtal liăn; rak vế 107 tôh kơdĭng ƀă mung liăn ƀă lối 4 rơpâu ngế nâ o veăng kơdĭng ƀă tâi tâng kơxô̆ liăn lối 9 rơtal liăn.

Túa pơkâ pêt lagim tung hngêi nhĕng a cheăm Phi Tô, tơring Lâm Hà

Ƀă tơdroăng ki xúa kơxô̆ liăn mung tơƀrê hiăng kum ăm 480 rơpŏng kơtiê xua vâi kơdrâi pro ngế pơkuâ hluăn ing kơtiê. Jâ K’Soanh, Kăn hnê ngăn vâi kơdrâi cheăm Phi Tô, tơring Lâm Hà ăm ‘nâi:

“Tung mơnhông cheăng kâ mê a cheăm xuân ai mâu ngế ki djâ troăng ahdrối tung mơdêk cheăng kâ rơpŏng hngêi, tơdroăng rêh ối cheăng kâ rơpŏng hngêi chía niân tâ tâng pơchông ƀă rơpŏng ki ê. Pakĭng mê, mâu nâ o kố ối ‘nâi ai kuăn preăng kuăn iâ, ‘nâi xúa khoa hok kih thuât tung pêi chiâk deăng, môi tiah túa ki pro hngêi hlâm, hngêi nhĕng pro pơxúa ‘na cheăng kâ”.