*A Plông kân Ƀlêi trâng (bêng Quy Nhơn), kong pơlê Gia Lai tơkŭm po Leh pơcháu lêng hơnăm 2026 tung tơdroăng ki hơniâp ro phiu niu. Veăng ai mâ ai pôa Lê Hoài Trung, Ngế cheăng tung Khu xiâm kal kí, Ngế xiâm tơpui kâ; Thươ̆ng tươ̆ng Trương Thiên Tô, Phŏ Ngế xiâm ngăn cheăng kal kí Khu lêng kuăn pơlê Việt Nam; rơtế ƀă kăn pơkuâ mâu kong pơlê, kăn ƀô̆, mố đô̆i ƀă hên hĭn mâu kuăn pơlê.

Hơnăm 2026, kong pơlê Gia Lai ai vâ chê 5.700 ngế rơtăm lăm pro mố đô̆i. Cheăng rah xo ƀă krếo thế pro mố đô̆i châ tơbleăng pêi kơtăng, tro pơkâ, rak vế tơbleăng tơdrăng, tơniăn krê, tŭm kơxô̆ ngế lăm pro, thăm mơnhông ki rơkê. Leh pơcháu lêng hơnăm 2026 a Gia Lai chiâng hâi leh kân dêi mâu hơnăm ối nếo kong pơlê, gum tơ’nôm ivá vâ mâu vâi o krá rơdêi tung tơdroăng mơjiâng ƀă rak vế Tơnêi têa.

*Tơrŭm phiu ro Hâi leh lăm pro lêng, vâ chê 5.500 ngế rơtăm châ rah xo lăm pro lêng dêi kong pơlê Dak Lak, pêi pro tro hnoăng cheăng ki tĭng ƀă tơnêi têa. A 15 tíu pơcháu xo mâu ngế lăm pro lêng dêi mâu kơpong hbrâ rơnáu tung kong pơlê. 

Tơdroăng ăm hlo nhoăm pâ, hên ngế kơdrâm kơdrĕng pêng tơdroăng khíu hơ’nêng rơrêk lo têa mâ. Tơdroăng pơcháu mâu ngế lăm pro lêng hơnăm kố ai hên tíu ki nếo klêi pêi pro tơdroăng tơ’mot mâu kăn kong pơlê 2 râ ƀă tơ’mot khu râ kơvâ cheăng râ kong pơlê. Hơnăm kố, Dak Lak ai 4.600 ngế tro hơnăm lăm pro lêng ƀă 849 ngế lăm pro lêng kong an kuăn pơlê. Ki tơƀrê, lâm hriâm dêi mâu ngế lăm pro lêng a Dak Lak hơnăm kố pơtối tơƀrê, vâ chê 330 ngế rơtăm hriâm đăi hok, kao đăng, trung kâp.

*Kong pơlê Lâm Đồng tơkŭm po leh pơcháu, tơdah xo lêng lăm pro mố đô̆i hơnăm 2026 a 12 tíu a kong pơlê, chiân lối 4.600 rơpâu ngế rơtăm lăm pro mố đô̆i rak vế Tơnêi têa. Hơnăm kố, tâi tâng kơxô̆ ngế lêng ki lăm pro mố đô̆i dêi kong pơlê Lâm Đồng cho 4.607 ngế. Mâu rơtăm ki châ rah xo pơrá ai tŭm tơdroăng ki tơnêi têa kal, hiâm mơno lĕm, hriâm lâm kân, ivá mo sêi; hên ngế hiăng hriâm klêi đăi hok, kao đăng, vâ mơdêk tung tơdroăng ki kal rah xo mâu ngế ki rơkê plĕng tung rôh rah xo pro mố đô̆i.

Cheăng rah xo rơtăm pro mố đô̆i châ tơbleăng pêi tơniăn, tơdrăng; mâu rôh ki lăm tăng rah mâu ngế vâ lăm pro mố đô̆i, rôh rah xo, khăm ivá châ pêi pro kơtăng, tro pơkâ.

*Tung chôu phut krip, rơrek tung hiâm mơno, mâu cheăm tung lapa  kong pơlê Khánh Hòa pêi pro hên hĭn tơdroăng tơkŭm po leh pơcháu mơngế lăm pro lêng, xo lêng hơnăm 2026, chiên 3.573 ngế rơtăm lăm pro lêng.

Hơnăm kố, mâu lêng kong pơlê Khánh Hòa châ pơcháu  hên mê: Lưh đoàn 957 (Kơpong 4 lêng tuk), Hngêi trung Sĩ quan Không quân, Sư đoàn Phòng không 377, Sư đoàn 2, Sư đoàn 305, ƀă Khu xiâm pơkuâ ngăn lêng kong pơlê: Vâ tơniăn tơƀrê tơdroăng rah mơngế lăm pro lêng, tung pơla hdrối kô nah, kơ koan lêng rêm râ hiăng tơrŭm krá ƀă râ ủy, mâu kăn, Măt trâ̆n ƀă mâu khu grup mơdêk hnê tối ‘na luât pro lêng; Rak ngăn krá kuăn pơlê tro hơnăm vâ hbrâ lăm pro lêng; mơnhên ki tơtro ƀă tơdroăng kal kí, kơtăng, pêi tŭm tơdroăng  pơkâ tŏng hum ƀă mâu rơtăm lăm pro lêng.