Kơxo lơ 28/10 hiăng po Rôh hôp Vi ƀan cheăng tung Chin phuh Việt Nam- Hàn Quốc rôh má 19. Tơdroăng pơkâ dêi rôh hôp mê séa ngăn tơdroăng cheăng tơrŭm pơla péa tơnêi têa tung mâu kơvâ cheăng dêi rôh hôp má 18 troh nôkố, hlối pơkâ troăng rơhlâ tơrŭm cheăng tung la ngiâ. Péa pâ hiăng tơpui ‘na tơdroăng ƀă mâu troăng rơhlâ mơdêk tơrŭm cheăng tung mâu kơvâ cheăng; tê mơdró, ‘no liăn cheăng, pêi lo liăn ngân... ƀă mâu tơdroăng cheăng pêi ki ê. Tơdroăng tơrŭm cheăng Việt Nam - Hàn Quốc pơtối ai mâu hnoăng mơnhông mơdêk rơdêi tung hơnăm hdrối a tâi tâng mâu kơvâ cheăng pro pơxúa ƀă hlê plĕng, loi nhoăm dêi rơpó ăm tŭm tá péa pâ.

Hneăng hôp dêi Chin phuh Việt Nam - Hàn Quốc rôh  má 19

Hơnăm kố hdró 30 tơdroăng mơjiâng tơrŭm cheăng tơpui kâ ƀă tơrŭm mơnhông cheăng kâ Việt Nam - Hàn Quốc hiăng châ pêi pro hên hnoăng ki kân. Riân troh khế 9 hơnăm kố, Hàn Quốc hiăng ai 9.438 tơdroăng tơkêa ki ối xêt, ƀă tâi tâng kơxô̆ liăn ‘no dâng 80,5 rơtal dollars, cho kong têa ki tơrŭm má môi dêi Việt Nam ‘na tơdroăng ‘no liăn cheăng ing kong têa ê.