Laga, xuân ai mâu tơdroăng pá puât tơvâ tơvân kal châ thâ tah lôi. Troh tâi khế 10, kong pơlê Dak Lak nếo xo kơxô̆ liăn xúa tơnêi châ 1.364 rơtal liăn, châ 45,8% tiô tối hdrối Hô̆i đong kuăn pơlê kong pơlê pơcháu, tung mê, râ kong pơlê bu châ 1,2% pơkâ pêi. Xiâm kối cho troăng hơlâ pơhlêh tá hâi ai tơdroăng ki tơdâng tơ’mô. Mơhé Luât tơnêi tơníu hơnăm 2023 ai xêt khât sap ing hâi lơ 1/7/2024 laga troh nôkố ai mâu troăng hơlâ tơdjâk troh tơdroăng pơkuâ xo liăn môi tiah xo liăn hnoăng mơhá tơnêi xuân tá hâi ai Pơkâ inhên ƀă Tơdroăn pơkâ hnê mơhno.

Pôa Phạm Ngọc Nghị, Kăn hnê ngăn Vi ƀan kuăn pơlê kong pơlê Dak Lak pơkâ mâu kơ koan cheăng a kong pơlê hriăn plĕng inhên mơ-éa ƀă rơtế dêi pó tơpui tối troăng tah lôi pá puât. Mâu tơdroăng ối tung hnoăng, kong pơlê kô mơ-eăm tơleăng. Tâng hluâ hnoăng, mâu tíu cheăng kal tơbleăng vâ kong pơlê pơtroh pâ thế Tơnêi têa.