Ing mê, tung 2 hâi (sap hâi lơ 25 - 26/3/2026), ai lối 90 ngế kăn hiăng châ rah xo pro kăn Kuô̆k hô̆i hneăng 16 lo ing 15 to kong pơlê pơlê kong kân kơpong Tơdế ƀă peăng hdroh Tơnêi têa kô châ hriâm tơ’nôm, tăng ‘nâi plĕng mâu tơdroăng Tâi tâng ‘na Kuô̆k hô̆i; “Tơbleăng ‘na pơ’lêh kơxô̆ ƀă phần mềm ki pơxúa tung pêi cheăng dêi Kuô̆k hô̆i, hnê xúa App Kuô̆k hô̆i kơxô̆ 2.0; hnê vâ rơkê tung séa ngăn, veăng hnê tối tung mơjiâng luât dêi mâu kăn Kuô̆k hô̆i; tơdroăng rơkê tơpui drêng trâm mâ kuăn pơlê, trâm mâ mâu ngế chêh hlá tơbeăng  dêi mâu kăn Kuô̆k hô̆i.

Tơbleăng hnê mơhno a rôh Hôp, Thươ̆ng tươ̆ng Trần Quang Phương - Phŏ kăn xiâm hnê ngăn Kuô̆k hô̆i tối nhên, hneăng tâ phĭu rah xo kăn Kuô̆k hô̆i ƀă Hô̆i dong kuăn pơlê rêm râ hneăng hơnăm 2026 - 2031 hiăng klêi tơniăn, cho rôh ki hdró tung mơjiâng tiô tuăn mơno pói rơhêng vâ dêi kuăn pơlê tiô troăng xah hô̆i chuh ngiah dêi tơnêi têa.

Ƀă kơxô̆ kuăn pơlê lăm tâ phĭu hên má môi riân sap ing nah ta troh nôkố, châ 99,7%, kuăn pơlê hiăng tâ tŭm 500 ngế kăn ki veăng tung Kuô̆k hô̆i hneăng 16. Ƀă tơdroăng cheăng bă tuăn loi khât, kuăn pơlê hiăng mơhno tuăn vâ rơtế ƀă Đảng, Tơnêi têa ƀă malối cho pơtroh tơdroăng tơngah a ki hơ’lêh nếo dêi Kuô̆k hô̆i hneăng ki nếo ƀă hnoăng cheăng pêi, khên tơnôu, tuăn ngôa rơkê dêi tơrêm ngế kăn Kuô̆k hô̆i.