VOV4.Xơ Đăng Pơtối rôh hôp má 14 dêi Vi ƀan pơkuâ Kuô̆k hô̆i, hâi lơ 11/8 Vi ƀan pơkuâ Kuô̆k hô̆i ăm rơkong veăng tơpui tối ki apoăng ‘na hlá mơéa tối tơbleăng klêi kơ’nâi séa ngăn tơdroăng “Tơdroăng pêi pro troăng hơlâ, luât ‘na pêi pro kơdĭng, hbrâ mơdât mơhrê liăn ngân hneăng hơnăm 2016 – 2021”.

Pôa Trần Quang Phương, kăn xiâm phŏ hnê ngăn Kuô̆k hô̆i ăm ‘nâi, kố cho tơdroăng ki séa ngăn xơpá, séa ngăn tung lâp lu, tơdjâk troh hên kơvâ cheăng ki kal xiâm ƀă tơdroăng kal rêh ối dêi tơdroăng cheăng kâ, troh rêm mâu kơvâ cheăng rêh ối pơlê pơla ƀă hên ki ê. Xua mê, tơdroăng ki mơnhên xiâm kối, mơhno nhên hnoăng cheăng dêi mâu kơ koan, khu tởŭm, mâu ngế krê tung tơdroăng pơkâ ƀă tơkŭm pêi pro troăng hơlâ, luât ‘na pêi pro kơdĭng, hbrâ mơdât mơhrê liăn ngân ai pơxúa  kal khât. Ing mê, pâ thế troăng hơlâ mơdêk tơƀrê hnoăng cheăng pêi pro kơdĭng, hbrâ mơdât mơhrê liăn ngân ƀă pêi klêi troăng hơlâ, luât ki ai tơdjâk.

Katarina Nga tơplôu ƀă tơbleăng