Kơxo hâi lơ 9/5, Vi ƀan pơkuâ Kuô̆k hô̆i pơxiâm po hôp rôh má 23. Hneăng hôp tung 4 hâi, a rôh hôp mê, Vi ƀan pơkuâ Kuô̆k hô̆i ăm hnê tối a 16 tơdroăng ki kal tung tơdroăng hbrâ vâ tơpui a rôh hôp má 5, Kuô̆k hô̆i hneăng 15. Tối tơbleăng a rôh pơxiâm po hôp, pôa Vương Đình Huệ, Kăn xiâm hnê ngăn Kuô̆k hô̆i  pâ thế Vi ƀan pơkuâ Kuô̆k hô̆i tí tăng ‘nâi plĕng ‘na tơdroăng veăng hnê tối ‘na tơdroăng ki kal ‘mâi hơ’lêh, tơ’nôm tơdroăng tơkêa Luât mâu khu ăm mung liăn (‘mâi hơ’lêh).

 Tung kơxo hâi lơ 9/5, veăng hnê tối tơbleăng ‘na mơnhông cheăng kâ rêh ối, liăn ngân mâu khế hơnăm apoăng hơnăm kố, Vi ƀan pơkuâ Kuô̆k hô̆i tối tiah kố: tơdroăng tối tơbleăng hdrối sap khế pŭn troh khế tơdrốu tơdroăng cheăng kâ kố trâm xơpá tâ pái khế apoăng hơnăm, tơdroăng kố pơkâ pơloăng mơnúa kân ƀă Chin phuh tung pơkuâ cheăng kâ kân mâu khế ki pơtối vâ mơ-eăm pêi châ tiô pơkâ tâk GDP 6,5% ăm tung plâ hơnăm.

Ngế xiâm Pơkuâ tơdroăng Pơkâ  hdró ƀă ‘no liăn cheăng - pôa Nguyễn Chí Dũng ăm ‘nâi: tơdroăng cheăng kâ rêh ối khế 4 ƀă 4 khế apoăng hơnăm ai hên tơdroăng tơƀrê, cheăng kâ kân tơniăn, châ séa ngăn ‘na liăn ôh tá kơnâ.