VOV4.Xơ Đăng - Pơtối rôh hôp ‘na luât, kơxo kố lơ 23/9 Vi ƀan pơkuâ Kuô̆k hô̆i ăm rơkong veăng tơpui tối ‘na kơxop hlá mơéa Túa pơkâ séa ngăn nhên ‘na đề cương mâu hlá mơéa tối tơbleăng dêi Khu kăn séa ngăn dêi Kuô̆k hô̆i ‘na “Tơdroăng mơhnhôk, rak ngăn ƀă xúa mâu kơxô̆ liăn kum ăm hnoăng cheăng hbrâ mơdât pơreăng COVID-19; tơdroăng ki pêi pro troăng hơlâ, luât ‘na khăm pơlât”. A hneăng hôp má 3, Kuô̆k hô̆i hiăng têk kŏng tơbleăng tơdroăng pơkâ ‘na mơjiâng Khu kăn séa ngăn “Tơdroăng mơhnhôk, rak ngăn ƀă xúa mâu kơxô̆ liăn kum tung hnoăng cheăng hbrâ mơdât pơreăng COVID-19; tơdroăng pêi pro tơdroăng luât khăm pơlât, tơdroăng khăm pơlât hbrâ mơdât.

Tơdroăng séa ngăn cho mơnhên tối klêi kơ’nâi hiăng pêi pro klêi, xơpá, tơvâ tơvân, mơnhên xiâm kối, mơhno tối nhên hnoăng cheăng dêi mâu kơ koan, khu tơrŭm, mâu ngế krê tung mơhnhôk, rak ngăn ƀă xúa mâu kơxô̆ liăn kum ăm hnoăng cheăng hbrâ mơdât pơreăng COVID-19; pêi pro troăng hơlâ, luât ‘na khăm pơlât a kong pơlê ƀă khăm pơlât hbrâ mơdât. Tơdrêng amê, hlối pâ troăng hơlâ mơdêk tơƀrê tung mơhnhôk, rak ngăn ƀă xúa mâu liăn hbrâ mơdât pơreăng; pêi pro troăng hơlâ luât ‘na khăm pơlât a mâu kong pơlê, khăm pơlât hbrâ mơdât ƀă pêi klêi troăng hơlâ, luât ki ai tơdjâk.

Katarina Nga tơplôu ƀă tơbleăng